إشَعْيا 19
19
الكلام ضِدّ مَصِر
1مُحَاكَمَةْ مَصِرْ.
دَاهُو فِي سَحَابَايْ سَرِيعَةْ اللّٰهْ
جَايِ فِي مَصِرْ.
وَ إِلٰـهَاتْ مَصِرْ قَاعِدِينْ يَرْجُفُوا قِدَّامَهْ
وَ الْمَصْرِيِّينْ قَلِبْهُمْ أَنْقَطَعْ.
2أَنَا نِحَرِّشْ الْمَصْرِيِّينْ يِلْحَارَبَوْا،
وَاحِدِينْ يُقُمُّوا ضِدّ الْآخَرِينْ.
أَيِّ وَاحِدْ يُقُمّ ضِدّ أَخُوهْ
وَ أَيِّ وَاحِدْ يُقُمّ ضِدّ جَارَهْ،
مَدِينَةْ ضِدّ مَدِينَةْ
وَ مَمْلَكَةْ ضِدّ مَمْلَكَةْ.
3وَ أَنَا نِوَدِّرْ شَجَاعَةْ الْمَصْرِيِّينْ
وَ نِبَرْجِلْ شَوْرِتْهُمْ.
خَلَاصْ، هُمَّنْ يَسْأَلَوْا الْإِلٰـهَاتْ
وَ الشَّوَّافِينْ
وَ الْيِكَلُّمُوا مَعَ الْمَيْتِينْ
وَ الْيِحَجُّوا مَعَ الْجِنّ.
4وَ نِسَلِّمْ الْمَصْرِيِّينْ فِي إِيدْ سِيدْ قَوِي
وَ هُو مَلِكْ جَايِرْ يَحْكِمْ فَوْقهُمْ.
وَ دَا كَلَامْ اللّٰهْ الرَّبّ الْقَادِرْ.
5وَ أَلْمِي الْبَحَرْ يِكَمِّلْ
وَ النِّيلْ يَيْبَسْ
وَ أَلْمِي الْبَحَرْ يَشْرَبْ
وَ هُو يَبْقَى يَابِسْ.
6وَ الْبُحُورْ يِنْشَمَّوْا عَفْنِينْ
أَيْوَى، رُجُولْ مَصِرْ يَنْقُصُوا وَ يَيْبَسَوْا
وَ التِّبِنْ وَ الْبِرْدِي يِجِفُّوا.
7وَ الْقَشّ الْفِي خَشُمْ النِّيلْ
وَ كُلَّ نَبَاتْ النِّيلْ يَيْبَسَوْا
وَ يِشِتُّوا وَ يَبْقَوْا مَا فِيهُمْ.
8وَ الْحَوَّاتِينْ يَقُنْتُوا
وَ الْيَزْقُلُوا جَنْبَاتْهُمْ فِي النِّيلْ يَحْزَنَوْا
وَ الْيَزْقُلُوا شَرَكْهُمْ فِي خَشُمْ الْأَلْمِي يِأَيُّسُوا
9وَ النَّاسْ الْيَخْدُمُوا فِي الْكَتَّانْ يِعِيبُوا
وَ الْيِتِرُّوا وَ الْيُدُقُّوا التَّشاكَةْ عَشَمْهُمْ يِنْقَطِعْ.
10ضَرَّابِينْ التَّشاكَةْ هَنَا مَصِرْ يَتْعَبَوْا
وَ كُلَّ الْخَدَّامِينْ الْمُؤَجَّرِينْ يَزْعَلَوْا.
11أَيْوَى، مَسَائِيلْ حِلَّةْ صُعَانْ مُنَافِقِينْ
وَ الْحُكُمَاءْ مُسْتَشَارِينْ فِرْعَوْن
سَوَّوْا مَجْلَسْ هَنَا مَطَامِيسْ.
وَ إِنْتُو! كِكَّيْف تَقْدَرَوْا تُقُولُوا لِفِرْعَوْن:
«أَنَا وِلَيْد حُكُمَاءْ.
أَنَا وِلَيْد مُلُوكْ هَنَا زَمَانْ.»
12يَا فِرْعَوْن، مُسْتَشَارِينَكْ وَيْن؟
خَلِّي يِأَوْرُوكْ وَ يِعَلُّمُوكْ
قَرَارْ اللّٰهْ الْقَادِرْ الشَّالَهْ ضِدّ مَصِرْ.
13وَ مَسَائِيلْ حِلَّةْ صُعَانْ مَا عِنْدُهُمْ رَاسْ
وَ مَسَائِيلْ حِلَّةْ مَمْفِيسْ أَنْغَشَّوْا
وَ كُبَارَاتْ الْقَبَايِلْ وَدَّرَوْا مَصِرْ.
14وَ اللّٰهْ نَزَّلْ
فِي أُسُطْهُمْ رُوحْ هَنَا بَرْجَالْ
وَ هُمَّنْ وَدَّرَوْا مَصِرْ فِي عَمَلْهَا التِّسَوِّيهْ
مِثِلْ وَدَارْ السَّكَّارِي فِي لُبّ قَدِيفَهْ.
15وَ نَادُمْ مَا يَقْدَرْ
يِسَوِّي شَيّءْ لِمَصِرْ
وَ لَا الرَّاسْ وَ لَا الدَّنَبْ
وَ لَا النَّخَلْ وَ الْعَقَيْق.
مُسْتقْبل مَصِر
16وَ فِي الْيَوْم دَا، نَاسْ مَصِرْ يَبْقَوْا مِثِلْ عَوِينْ وَ يَخَافَوْا وَ يَرْجُفُوا وَكِتْ يِشِيفُوا إِيدْ اللّٰهْ الْقَادِرْ مَرْفُوعَةْ ضِدُّهُمْ. 17وَ بَلَدْ يَهُوذَا تِخَوِّفْ الْمَصْرِيِّينْ. أَشَانْ أَيِّ مَصْرِي الْيِفَكِّرْ فَوْقهَا يَرْجِفْ فِي شَانْ الْقَرَارْ الشَّالَهْ اللّٰهْ الْقَادِرْ ضِدّ مَصِرْ.
18وَ فِي الْيَوْم دَا، خَمْسَةْ مُدُنْ فِي مَصِرْ يِكَلُّمُوا بِلُغَّةْ الْعِبْرَانِيِّينْ وَ يَحَلْفُوا كَدَرْ يَعَبُدُوا اللّٰهْ الْقَادِرْ. وَ وَاحِدَةْ مِنْ الْمُدُنْ دَوْل يِسَمُّوهَا مَدِينَةْ الْحَرَّايْ.
19وَ فِي الْيَوْم دَا، يُكُونْ مَدْبَحْ لِلّٰهْ فِي أُسُطْ بَلَدْ مَصِرْ وَ يُغُزُّوا حَجَرْ لِلّٰهْ فِي حُدُودْهَا. 20وَ الْحَجَرْ دَا يَبْقَى عَلَامَةْ وَ شَهَادَةْ كَدَرْ اللّٰهْ الْقَادِرْ قَاعِدْ فِي بَلَدْ مَصِرْ. وَ وَكِتْ يِكَوْرُكُوا لِلّٰهْ فِي شَانْ الْيَظُلْمُوهُمْ، هُو يِرَسِّلْ لَيْهُمْ مُنَجِّي الْيِحَامِي لَيْهُمْ وَ يِخَلِّصْهُمْ. 21وَ اللّٰهْ يِبَيِّنْ نَفْسَهْ لِلْمَصْرِيِّينْ. وَ فِي الْيَوْم دَا، الْمَصْرِيِّينْ كُلَ يَعَرْفُوهْ وَ يَعَبُدُوهْ. وَ يَعَبُدُوهْ وَ يِقَدُّمُوا لَيَّهْ ضَحَايَا وَ هَدَايَا وَ يِسَوُّوا نَذِرْ لِلّٰهْ وَ يِتِمُّوهْ. 22وَ وَكِتْ اللّٰهْ يَضْرُبْ الْمَصْرِيِّينْ بِشِدَّةْ، هُو يَشْفِيهُمْ. أَشَانْ هُمَّنْ يِقَبُّلُوا لِلّٰهْ وَ هُو يَقْبَلْ سُؤَالْهُمْ وَ يَشْفِيهُمْ.
23وَ فِي الْيَوْم دَا، يُكُونْ دَرِبْ مِنْ بَلَدْ مَصِرْ لَحَدِّي بَلَدْ أَشُورْ وَ الْأَشُورِيِّينْ يَمْشُوا مَصِرْ وَ الْمَصْرِيِّينْ يَمْشُوا أَشُورْ. وَ الْمَصْرِيِّينْ وَ الْأَشُورِيِّينْ يَعَبُدُوا اللّٰهْ سَوَا.
24وَ فِي الْيَوْم دَا، إِسْرَائِيلْ تَبْقَى التَّالِتْ لِمَصِرْ وَ أَشُورْ. وَ دَا يِجِيبْ الْبَرَكَةْ فِي أُسْط الْأَرْض. 25أَشَانْ اللّٰهْ الْقَادِرْ يِبَارِكْهُمْ وَ يُقُولْ: «مُبَارَكِينْ الْمَصْرِيِّينْ شَعَبِي وَ الْأَشُورِيِّينْ السَّوَّتْهُمْ إِيدِي وَ بَنِي إِسْرَائِيلْ شَعَبِي وَ وَرَثَتِي.»
Currently Selected:
إشَعْيا 19: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
