هُوشَع 4
4
اللّه يجيب بني إسرائيل في الشريعة
1يَا بَنِي إِسْرَائِيلْ، أَسْمَعَوْا كَلَامْ اللّٰهْ! هُو قَالْ:
«أَنَا اللّٰهْ نَشْكِي سُكَّانْ الْبَلَدْ دِي
أَشَانْ مَا فِي أَمَانْ وَ مَا فِي رَحْمَةْ
وَ مَا فِي مَعْرَفَةْ اللّٰهْ فِي الْبَلَدْ.
2فَوْقهَا إِلَّا اللَّعَنَةْ وَ الْكِدِبْ
وَ الْكَتِلْ وَ السِّرْقَةْ وَ الزِّنَى.
يِسَوُّوا عُنُفْ
وَ يِدَفُّقُوا دَمّ وَرَاءْ دَمّ.
3فِي شَانْ دَا، الْأَرْض تَيْبَسْ
وَ سُكَّانْهَا يِأَيُّسُوا
وَ مَعَاهُمْ حَيْوَانَاتْ الْكَدَادَةْ
وَ طُيُورْ السَّمَاءْ
وَ حَتَّى حُوتْ الْبَحَرْ كُلَ يَبْقَى مَا فِي.
4«أَنْقَرْعُوا! خَلِّي نَادُمْ مَا يَشْكِي كُلَّ النَّاسْ
وَ مَا يُلُومْهُمْ.
أَنَا نَشْكِيكُو إِنْتُو بَسْ،
يَا رُجَالْ الدِّينْ!
5إِنْتُو تِتَّرْتَعَوْا بِالنَّهَارْ
وَ النَّبِي الْمَعَاكُو كُلَ يِتَّرْتَعْ بِاللَّيْل.
وَ أَنَا نِدَمِّرْ أَمُّكُو إِسْرَائِيلْ.
6شَعَبِي أَدَّمَّرَوْا
أَشَانْ مَا عِنْدُهُمْ الْمَعْرَفَةْ.
أَشَانْ إِنْتُو أَبَيْتُوا الْمَعْرَفَةْ،
أَنَا كُلَ نَابَاكُو
وَ إِنْتُو مَا تَبْقَوْا لَيِّ رُجَالْ دِينْ.
وَ مِثِلْ إِنْتُو نِسِيتُوا شُرُوطِي
الْفِي التَّوْرَاةْ هَنَايِ أَنَا إِلٰـهْكُو،
أَنَا كُلَ نَنْسَى عِيَالْكُو.
7«وَ رُجَالْ الدِّينْ كُلُّهُمْ أَذْنَبَوْا ضِدِّي
وَ بَيْدَا، أَنَا نِبَدِّلْ شَرَفْهُمْ بِإِهَانَةْ.
8يِعِيشُوا بِلَحَمْ ضَحَايَا كَفَّارَةْ الذَّنِبْ هَنَا شَعَبِي
وَ فِي شَانْ دَا، هُمَّنْ قَرْمَانِينْ لِذُنُوبْهُمْ.
9الشَّعَبْ وَ رُجَالْ الدِّينْ يُكُونُوا سَوَا سَوَا.
نِعَاقِبْهُمْ حَسَبْ دَرِبْهُمْ الشَّالَوْه
وَ نِكَافِيهُمْ حَسَبْ عَمَلْهُمْ.
10هُمَّنْ يَاكُلُوا وَ لَاكِنْ مَا يَشْبَعَوْا
وَ يَزْنَوْا وَ لَاكِنْ مَا يَلْدَوْا عِيَالْ
أَشَانْ هُمَّنْ أَبَوْا
مَا شَالَوْا دَرْبِي أَنَا اللّٰهْ.
11«الزِّنَى وَ الْمَرِيسَةْ وَ الْخَمَرْ
يِلِفُّوا رُوسَيْهُمْ.
12شَعَبِي يَسْأَلَوْا صَنَمْهُمْ هَنَا الْحَطَبْ.
أَيْوَى، يَحْسُبُوا عُودْهُمْ يُرُدّ لَيْهُمْ!
أَشَانْ رُوحْ الشَّرْمَطَةْ وَدَّرْهُمْ
وَ الشَّرْمَطَةْ بَعَّدَتْهُمْ مِنِّي أَنَا إِلٰـهُّمْ.
13فِي رُوسَيْ الْجِبَالْ،
يِقَدُّمُوا ضَحَايَا لِإِلٰـهَاتْهُمْ
وَ فِي الْحُجَارْ،
يِحَرُّقُوا لَيْهُمْ بَخُورْ.
وَ يَعَبُدُوا تِحِتْ شَدَرْ الْبَلُّوطْ
وَ اللُّبْنَى وَ الْبُطُمْ
أَشَانْ ضُلُّهُمْ بَارِدْ.
يَا شَعَبِي، بِسَبَبْ دَا،
بَنَاتْكُو يَبْقَنْ شَرَامِيطْ
وَ عَوِينْ أَوْلَادْكُو يَبْقَنْ زَانِيَاتْ.
14«أَنَا مَا نِعَاقِبْ بَنَاتْكُو
بِسَبَبْ شَرْمَطَتْهِنْ
وَ لَا نِعَاقِبْ عَوِينْ أَوْلَادْكُو
بِسَبَبْ زِنَاهِنْ.
أَشَانْ رُجَالْ الدِّينْ ذَاتْهُمْ
يِنْفَرْدُوا بِالشَّرَامِيطْ
وَ يِلْقَاسَمَوْا أَكِلْ الضَّحَايَا
مَعَ الزَّنَّايَاتْ الْمُخَصَّصَاتْ.
الشَّعَبْ الْمَا يَفْهَمَوْا
يِوَدُّرُوا نُفُوسْهُمْ.»
15يَا بَنِي إِسْرَائِيلْ، كَنْ إِنْتُو أَشَّرْمَطْتُوا كُلَ،
خَلِّي بَنِي يَهُوذَا مَا يَخْطَوْا!
مَا تَمْشُوا لِبَكَانْ الْعِبَادَةْ فِي قِلْقَالْ
وَ لَا تَطْلَعَوْا عَلَيْ بَيْت إِيلْ الْفَسْلَةْ
وَ مَا تَحَلْفُوا بِاللّٰهْ الْحَيّ.
16أَيْوَى، بَنِي إِسْرَائِيلْ حَرَّانْ
مِثِلْ الْبَقَرَةْ
وَ بَيْدَا، كِكَّيْف اللّٰهْ يَقْدَرْ يِسَرِّحْهُمْ
مِثِلْ غَنَمْ فِي مَرْعَى أَخْضَرْ؟
17نَاسْ أَفْرَايِمْ أَنْرَبَطَوْا زِيَادَةْ مَعَ الْأَصْنَامْ
وَ بَيْدَا، خَلِّيهُمْ بَسْ!
18وَكِتْ سَكَرْهُمْ كَمَّلْ،
يُقُمُّوا يِشَّرْمَطَوْا
وَ كُبَارَاتْهُمْ يِحِبُّوا الْإِهَانَةْ.
19خَلَاصْ، الرِّيحْ تِشِيلْهُمْ فِي جَنَاحَيْهَا
وَ ضَحَايَاهُمْ يِجِيبُوا لَيْهُمْ الْعَيْب.
Currently Selected:
هُوشَع 4: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
