عِبْرَانِيِّين 10
10
قُدْرة ضحيّة المسيح
1شُرُوطْ التَّوْرَاةْ مَا يِوَصُّفُوا بِالصَّحِيحْ كُلَّ الْخَيْر الْيَجِي وَرَاهُمْ. هُمَّنْ يِوَصُّفُوا عَلَامْتَهْ بَسْ. وَ حَسَبْ شُرُوطْ التَّوْرَاةْ، وَاجِبْ يِقَدُّمُوا دَايْماً نَفْس الضَّحَايَا كُلِّ سَنَةْ. وَ الضَّحَايَا دَوْل أَبَداً مَا يَقْدَرَوْا يِطَهُّرُوا طِهَارَةْ كَامِلَةْ النَّاسْ الْيِدَوْرُوا يَعَبُدُوا اللّٰهْ. 2وَ كَنْ صَحِيحْ الضَّحَايَا دَوْل يِطَهُّرُوا النَّاسْ، أَكِيدْ قَدِّمِينْهُمْ يَقِيفْ لَاكِنْ مَا وَقَفْ. أَشَانْ كَنْ النَّاسْ الْيَعَبُدُوا اللّٰهْ لِقَوْا الطِّهَارَةْ الْكَامِلَةْ خَلَاصْ، هُمَّنْ مَا يِفَكُّرُوا بَتَّانْ فِي ذُنُوبْهُمْ.
3لَاكِنْ سَنَةْ بَعَدْ سَنَةْ بِالضَّحَايَا دَوْل، النَّاسْ يِفَكُّرُوا فِي ذُنُوبْهُمْ. 4أَشَانْ دَمّ التِّيرَانْ وَ دَمّ الْغَنَمْ أَبَداً مَا يَقْدَرْ يَمْحَا ذُنُوبْ النَّاسْ. 5وَ فِي شَانْ دَا، وَكِتْ الْمَسِيحْ جَاءْ فِي الدُّنْيَا، هُو قَالْ:
<إِنْتَ مَا دَوَّرْت
وَ لَا ضَحِيَّةْ وَ لَا هَدِيَّةْ
وَ لَاكِنْ إِنْتَ جَهَّزْت لَيِّ
جِسْمِي الْإِنْسَانِي.
6إِنْتَ مَا رِضِيتْ بِضَحَايَا مُحَرَّقِينْ
وَ لَا ضَحَايَا لِكَفَّارَةْ الذَّنِبْ.
7وَ خَلَاصْ، أَنَا قُلْت:
«يَا اللّٰهْ، أَنَا جِيتْ
حَسَبْ الْكَلَامْ الْيُخُصِّنِي
الْمَكْتُوبْ فِي الْكِتَابْ الْمَلْفُوفْ.
أَنَا جِيتْ
أَشَانْ نِسَوِّي الشَّيّءْ الْإِنْتَ تِدَوْرَهْ.»>#10:7 الكلام دا تلقوه في زَبُور 40:6-8، حسب الترْجمة اليونانيّة.
8وَ أَوَّلْ هُو قَالْ: «إِنْتَ مَا دَوَّرْت وَ لَا ضَحِيَّةْ وَ لَا هَدِيَّةْ وَ لَا ضَحَايَا مُحَرَّقِينْ وَ لَا ضَحَايَا لِكَفَّارَةْ الذَّنِبْ.» وَ فِي الْكَلَامْ دَا، هُو حَجَّى بِالضَّحَايَا الْوَاجِبْ يِقَدُّمُوهُمْ حَسَبْ شُرُوطْ التَّوْرَاةْ. 9وَ بَعَدْ دَا، هُو قَالْ: «دَاهُو أَنَا جِيتْ. أَنَا جِيتْ أَشَانْ نِسَوِّي الشَّيّءْ الْإِنْتَ تِدَوْرَهْ.» وَ مِثِلْ دَا، هُو يِبَطِّلْ الضَّحَايَا الْأَوَّلْ وَ يِثَبِّتْ ضَحِيَّةْ نَفْسَهْ. 10وَ بِالْيِدَوْرَهْ اللّٰهْ دَا، عِيسَى الْمَسِيحْ قَدَّمْ جِسْمَهْ مَرَّةْ وَاحِدَةْ وَ نِهَائِيَّةْ وَ الضَّحِيَّةْ دِي سَوَّتْنَا خَاصِّيْن لِلّٰهْ.
11وَ أَيِّ رَاجِلْ دِينْ يَقِيفْ كُلِّ يَوْم بِطُولَهْ فِي بَكَانْ خِدِمْتَهْ وَ يِقَدِّمْ نَفْس الضَّحَايَا الْأَبَداً مَا يَقْدَرَوْا يَمْحَوْا الذُّنُوبْ. 12لَاكِنْ عِيسَى الْمَسِيحْ قَدَّمْ ضَحِيَّةْ وَاحِدَةْ بَسْ لِكُلَّ الذُّنُوبْ وَ بَعَدْ دَا، هُو قَعَدْ جَنْب اللّٰهْ إِلَى الْأَبَدْ فِي نُصَّهْ الزَّيْنَايْ. 13وَ هَسَّعْ، يَرْجَى لَحَدِّي اللّٰهْ يُخُطّ عُدْوَانَهْ تِحِتْ رِجِلَيْنَهْ. 14أَشَانْ الْمَسِيحْ قَدَّمْ ضَحِيَّةْ وَاحِدَةْ بَسْ وَ بَيْهَا هُو كَمَّلْ مَرَّةْ وَاحِدْ طِهَارَةْ النَّاسْ الْيَبْقَوْا خَاصِّيْن لِلّٰهْ.
15وَ الرُّوحْ الْقُدُّوسْ كُلَ شَاهِدْ فِي الْكَلَامْ دَا. أَشَانْ أَوَّلْ هُو قَالْ: 16<دِي هِي الْمُعَاهَدَةْ النِّسَوِّيهَا مَعَاهُمْ بَعَدْ الْيَوْم دَا. أَنَا نُخُطّ وَصِيَّاتِي فِي فِكِرْهُمْ وَ نَكْتِبْهُمْ فِي قُلُوبْهُمْ. وَ دَا كَلَامْ اللّٰهْ.>#10:16 الكلام دا تلقوه في إرْمِيا 31:33. 17وَ بَعَدْ دَا، هُو قَالْ: <مَا نِفَكِّرْ فِي ذُنُوبْهُمْ بَتَّانْ وَ لَا فِي عِصْيَانْهُمْ.>#10:17 الكلام دا تلقوه في إرْمِيا 31:34. 18وَ وَكِتْ اللّٰهْ غَفَرْ لِلنَّاسْ ذُنُوبْهُمْ، بَتَّانْ مَا وَاجِبْ يِقَدُّمُوا ضَحِيَّةْ لِلذُّنُوبْ.
نمْشوا قِدّام بالإيمان
19خَلَاصْ يَا أَخْوَانِي، أَكِيدْ بِسَبَبْ دَمّ عِيسَى نَقْدَرَوْا نَدْخُلُوا فِي الْبَكَانْ الْمُقَدَّسْ بِأَمَانْ. 20وَ الدَّرِبْ الْمَفْتُوحْ لَيْنَا دَا، جَدِيدْ وَ هُو عِيسَى الْحَيّ إِلَى الْأَبَدْ. وَ بِقَدِّمِينْ جِسْمَهْ، هُو فَتَحْ لَيْنَا السِّتَارْ. 21وَ أَنِحْنَ عِنْدِنَا رَاجِلْ دِينْ عَظِيمْ وَ هُو مَسْؤُولْ فِي بَيْت اللّٰهْ. 22أَشَانْ دَا، خَلِّي نِقَرُّبُوا لِلّٰهْ بِقَلِبْ مُخْلِصْ وَ بِإِيمَانْ كَامِلْ، بِقُلُوبْنَا الْمُطَهَّرِينْ بِدَمَّهْ وَ أَجْسَامْنَا كَمَانْ مِثِلْ نَضَّفْنَاهُمْ بِالْأَلْمِي الصَّافِي.
23خَلِّي نَشْهَدَوْا دَايْماً لِرَبِّنَا الْعَشَمْنَا قَاعِدْ فَوْقَهْ وَ مَا نِشَكُّكُوا أَشَانْ الْأَنْطَانَا الْوَعَدْ، هُو دَايْماً صَادِقْ. 24خَلِّي نِفَكُّرُوا فِي كِكَّيْف نِشَّاجَعَوْا أَمْبَيْنَاتْنَا أَشَانْ نِتَابُعُوا دَرِبْ الْمَحَبَّةْ وَ نِسَوُّوا الْخَيْر. 25خَلِّي دَايْماً نِلِمُّوا وَ مَا نِتَابُعُوا عَادَاتْ النَّاسْ الْوَاحِدِينْ الْمَا يِدَوْرُوا يِلِمُّوا. تَعَرْفُوا كَدَرْ يَوْم جَيَّةْ الْمَسِيحْ قَرَّبْ وَ أَشَانْ دَا، أَشَّاجَعَوْا بِزِيَادَةْ.
26كَنْ عِرِفْنَا كَلَامْ الْحَقّ وَ بَعَدَيْن نُقُمُّوا نِتَابُعُوا الذُّنُوبْ، مَا يِفَضِّلْ لَيْنَا ضَحِيَّةْ بَتَّانْ التَّمْحَا الذُّنُوبْ. 27لَاكِنْ مَا فِي شَيّءْ يِفَضِّلْ لَيْنَا إِلَّا نَرْجَوْا بِخَوْف شَدِيدْ الْحِسَابْ وَ النَّارْ الْمُحْرِقَةْ هَنَا غَضَبْ اللّٰهْ التَّاكُلْ كُلَّ الْعَاصِيِينْ. 28نَعَرْفُوا كَدَرْ أَيِّ نَادُمْ الْأَبَى مَا تَابَعْ شُرُوطْ تَوْرَاةْ مُوسَى وَ شُهُودْ إِتْنَيْن أَوْ تَلَاتَةْ شَهَدَوْا فَوْقَهْ، النَّادُمْ دَا يَكْتُلُوهْ بَلَا مَحَنَّةْ. 29هَايْ! فَكُّرُوا فِي الْعِقَابْ الْوَاجِبْ لِلنَّادُمْ الْخَلَّى دَرِبْ الْمَسِيحْ! هُو حَقَرْ إِبْن اللّٰهْ حُقْرَةْ شَدِيدَةْ. دَمّ الْمُعَاهَدَةْ الْبَيَّهْ هُو بِقِي خَاصّ لِلّٰهْ، هُو جَعَلَهْ مَا عِنْدَهْ قِيمَةْ. وَ عَيَّرْ الرُّوحْ الْأَنْطَاهْ الرَّحْمَةْ. 30نَعَرْفُوا اللّٰهْ بَسْ الْقَالْ: <التَّارْ هَنَايِ، أَنَا بَسْ النِّشِيلَهْ.>#10:30 الكلام دا تلقوه في تَثْنِية 32:35. وَ بَتَّانْ مَكْتُوبْ: <اللّٰهْ يِحَاكِمْ شَعَبَهْ.>#10:30 الكلام دا تلقوه في تَثْنِية 32:36. 31فِي يَوْم الْحِسَابْ، الْعَذَابْ لِلْيَقَعْ فِي إِيدْ اللّٰهْ الْحَيّ!
32فَكُّرُوا فِي الْوَكِتْ الْفَاتْ وَكِتْ أَوَّلْ مَرَّةْ دَخَلْتُوا فِي نُورْ اللّٰهْ. فِي الْوَكِتْ دَاكْ، إِنْتُو جَاهَدْتُوا وَ صَبَرْتُوا صَبُرْ قَوِي فِي الضِّيقَةْ. 33وَاحِدِينْ مِنْكُو عَيَّرَوْهُمْ قِدَّامْ النَّاسْ وَ تَعَّبَوْهُمْ وَ وَاحِدِينْ مِنْكُو شَارَكَوْا مَعَ النَّاسْ فِي التَّعَبْ التِّعِبَوْه. 34وَ إِنْتُو حَنَّيْتُوا لِلْمَسَاجِينْ. وَ وَكِتْ النَّاسْ نَهَبَوْا مَالْكُو، إِنْتُو فَرْحَانِينْ أَشَانْ عِرِفْتُوا كَدَرْ عِنْدُكُو مَالْ أَخَيْر مِنَّهْ قَاعِدْ قِدَّامْكُو وَ الْمَالْ دَا يَقْعُدْ دَايْماً.
35وَ فِي كُلَّ الْكَلَامْ دَا، نُقُولْ لَيْكُو مَا تِخَلُّوا إِيمَانْكُو الْقَوِي الْيِجِيبْ لَيْكُو أَجُرْ كَبِيرْ بِلْحَيْن. 36هَسَّعْ دَا، وَاجِبْ تَصْبُرُوا صَبُرْ قَوِي وَ تِسَوُّوا الشَّيّءْ الْاللّٰهْ يِدَوْرَهْ أَشَانْ تَلْقَوْا مِنَّهْ الْبَرَكَةْ الْهُو وَاعَدْ بَيْهَا. 37أَشَانْ فِي الْكِتَابْ، اللّٰهْ قَالْ:
<الْوَكِتْ الْفَضَّلْ شِيَّةْ بَسْ
أَشَانْ الْجَايِ يَجِي
وَ يَجِي بَلَا تَأخِيرْ.
38وَ بِإِيمَانَهْ،
الصَّالِحْ يَحْيَى
وَ كَنْ يِكَسْكِسْ مِنَّهْ،
أَنَا مَا نَرْضَى بَيَّهْ.>#10:38 الكلام دا تلقوه في حَبَقُوق 2:3-4.
39وَ لَاكِنْ أَنِحْنَ مَا مِنْ النَّاسْ الْيِكَسْكُسُوا وَ يَمْشُوا لِلْهَلَاكْ. أَنِحْنَ مِنْ نَاسْ الْإِيمَانْ وَ نَمْشُوا لِلنَّجَاةْ.
Currently Selected:
عِبْرَانِيِّين 10: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
