حِزْقِيال 19
19
نواح للمُلوك المِثِل ديدان
1اللّٰهْ قَالْ لَيِّ نِغَنِّي نُوَاحْ الْحِزِنْ لِمُلُوكْ بَنِي إِسْرَائِيلْ. 2وَ نُقُولْ:
«أَمَّكْ مَا دُودَايْ وَلَّا؟
هِي رَاقْدَةْ فِي أُسْط الدِّيدَانْ.
وَ فِي لُبّ فُرُوخْ الدِّيدَانْ،
هِي تِرَبِّي عِيَالْهَا.
3هِي رَبَّتْ وَاحِدْ مِنْ عِيَالْهَا
وَ هُو كِبِرْ وَ بِقِي مَلِكْ الدِّيدَانْ.
وَ هُو عَلَّمْ كِكَّيْف يِشَرِّطْ صَيْدِتَهْ
وَ يَاكُلْ النَّاسْ.
4وَ الْأُمَمْ سِمْعَوْا بَيَّهْ
وَ رَمَوْه فِي نُقْرِتْهُمْ.
أَيْوَى، كَرَبَوْه
وَ وَدَّوْه بِزُمَامْ فِي بَلَدْ مَصِرْ.#19:4 وَدَّوْه بِزُمَامْ فِي بَلَدْ مَصِرْ: المَثَل دا يحجّي بالملك يَحَاز هنا مملكة يَهُوذَا. و التاريخ دا تلقوه في 2 أخبار 36:4.
5«وَكِتْ الدُّودَايْ شَافَتَهْ،
عَشَمْهَا أَنْقَطَعْ.
وَ هِي شَالَتْ آخَرْ مِنْ عِيَالْهَا
وَ سَوَّتَهْ مَلِكْ الدِّيدَانْ.
6وَ هُو مَشَى فِي أُسْط الدِّيدَانْ
وَ بِقِي مَلِكْهُمْ.
وَ عَلَّمْ كِكَّيْف يِشَرِّطْ صَيْدِتَهْ
وَ أَكَلْ النَّاسْ.
7هُو دَمَّرْ قُصُورْهُمْ الْقَوِيِّينْ
وَ خَرَبْ مُدُنْهُمْ.
وَ الْبَلَدْ قَعَدَتْ خَرَابْ مِنْ سُكَّانْهَا
بِسَبَبْ حِسّ قَرْقَرَانَهْ.
8وَ الْأُمَمْ الْحَوَالَيَّهْ
جَوْا مِنْ وُلَايَاتْهُمْ.
وَ قَمَّوْا ضِدَّهْ
وَ كَجَّوْا لَيَّهْ شَرَكْ
وَ هُو وَقَعْ فِي نُقْرِتْهُمْ
وَ كَرَبَوْه.
9وَ بِزُمَامْ، خَطَّوْه فِي لُبّ قَفَصْ
وَ وَدَّوْه لِمَلِكْ بَابِلْ.#19:9 وَدَّوْه لِمَلِكْ بَابِلْ: المَثَل دا يحجّي بالملك يُيَكِين هنا مملكة يَهُوذَا. و التاريخ دا تلقوه في 2 أخبار 36:10.
وَ دَسَّوْه فِي لُبّ سِجِنْ
أَشَانْ حِسَّهْ بَتَّانْ مَا يِنْسَمِعْ
فِي جِبَالْ بَنِي إِسْرَائِيلْ.»
نواح لمملكة يَهُوذَا
10«أَمَّكْ مِثِلْ شَدَرَةْ الْعِنَبْ
الْمَقَّنَوْهَا فِي خَشُمْ الْأَلْمِي.
هِي وِلْدَتْ فَوَاكِهْ
وَ عِنْدَهَا وَرَقْ
أَشَانْ الْأَلْمِي كَتِيرْ.
11وَ فُرُوعْهَا عِنْدُهُمْ قُدْرَةْ
لِيَبْقَوْا عِصَيْ لِلْمُلُوكْ.
هِي كِبْرَتْ وَ بِقَتْ طَوِيلَةْ
مِنْ كُلَّ الشَّدَرْ الْآخَرْ.
وَ تِنْشَافْ فِي شَانْ طُولْهَا
وَ كَتَرَةْ وَرَقْهَا.
12لَاكِنْ هِي مَلَّطَوْهَا بِغَضَبْ
وَ رَمَوْهَا فِي الْأَرْض.
وَ رِيحْ الصَّبَاحْ يَبَّسَتْ فَوَاكِهَّا
وَ هُمَّنْ دَفَّقَوْا.
وَ فُرُوعْهَا الْعِنْدُهُمْ قُدْرَةْ يِبْسَوْا
وَ النَّارْ أَكَلَتْهُمْ.
13وَ هَسَّعْ، مَقَّنَوْهَا فِي الصَّحَرَاءْ،
فِي أَرْض جَفَافْ وَ عَطَشْ.
14مَرَقَتْ نَارْ مِنْ دُنْبُرْهَا
وَ أَكَلَتْ الْفُرُوعْ وَ الْفَوَاكِهْ.
وَ بَتَّانْ مَا فِي فُرُوعْ
الْعِنْدُهُمْ قُدْرَةْ لِيَبْقَوْا عِصَيْ لِلْمُلُوكْ.»
وَ دَا غِنَيْ يِغَنُّوهْ مِثِلْ نُوَاحْ الْحِزِنْ.
Currently Selected:
حِزْقِيال 19: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
