حِزْقِيال 10

مجْد اللّه بان بتان لحِزْقِيال

1وَ دَاهُو أَنَا شِفْت الشَّيّءْ الْقَوِي الْمَفْرُوشْ الْقَاعِدْ مِنْ فَوْق لِرُوسَيْ الْمَخْلُوقِينْ السَّمَاوِيِّينْ. وَ شِفْت شَيّءْ يِشَابِهْ عَرْش مِنْ حَجَرْ هَنَا يَاقُوتْ أَخْضَرْ. 2وَ مِنْ الْعَرْش، اللّٰهْ حَجَّى وَ قَالْ لِلرَّاجِلْ اللَّابِسْ خَلَقْ هَنَا قُمَاشْ سَمَحْ: «أَدْخُلْ فِي لُبّ دَايِرَةْ الْعَجَلَاتْ التِّحِتْ الْمَخْلُوقِينْ السَّمَاوِيِّينْ. وَ أَمْلَا إِيدَيْنَكْ جَمُرْ مِنْ بَيْن الْمَخْلُوقِينْ دَوْل. وَ شَتِّتْ الْجَمُرْ دَا فِي الْمَدِينَةْ.» وَ أَنَا شِفْت الرَّاجِلْ دَا دَخَلْ.

3وَ وَكِتْ الرَّاجِلْ دَخَلْ، الْمَخْلُوقِينْ السَّمَاوِيِّينْ وَاقْفِينْ وَطِي لِبَيْت اللّٰهْ. وَ سَحَابَايْ مَلَتْ الْفَضَايْ الدَّخْلَانِيَّةْ. 4وَ مَجْد اللّٰهْ قَمَّ مِنْ الْمَخْلُوقِينْ السَّمَاوِيِّينْ وَ مَشَى عَلَيْ عَتَبَةْ الْبَيْت. وَ الْبَيْت أَنْمَلَى بِالسَّحَابَايْ وَ الْفَضَايْ أَنْمَلَتْ بِنُورْ مَجْد اللّٰهْ. 5وَ حَرَكَةْ جَنَاحَيْ الْمَخْلُوقِينْ السَّمَاوِيِّينْ أَنْسَمَعَتْ لَحَدِّي فِي الْفَضَايْ الْبَرَّانِيَّةْ وَ الْحَرَكَةْ دِي مِثِلْ حِسّ اللّٰهْ الْقَادِرْ وَكِتْ يِحَجِّي.

6وَ وَكِتْ اللّٰهْ أَمَرْ الرَّاجِلْ اللَّابِسْ خَلَقْ هَنَا قُمَاشْ سَمَحْ وَ قَالْ لَيَّهْ يِشِيلْ جَمُرْ مِنْ لُبّ الدَّايِرَةْ أَمْبَيْن الْمَخْلُوقِينْ السَّمَاوِيِّينْ، الرَّاجِلْ مَشَى وَقَفْ جَنْب الْعَجَلَاتْ. 7وَ مَخْلُوقْ سَمَاوِي وَاحِدْ مَدَّ إِيدَهْ عَلَيْ النَّارْ أَمْبَيْن الْمَخْلُوقِينْ السَّمَاوِيِّينْ وَ خَمَّ جَمُرْ وَ مَلَا بَيَّهْ إِيدَيْن الرَّاجِلْ اللَّابِسْ خَلَقْ هَنَا قُمَاشْ سَمَحْ. وَ الرَّاجِلْ شَالْ الْجَمُرْ وَ مَرَقْ. 8وَ تِحِتْ جَنَاحَيْ الْمَخْلُوقِينْ السَّمَاوِيِّينْ، فِيَّهْ إِيدْ مِثِلْ إِيدْ إِنْسَانْ.

9وَ دَاهُو أَنَا شِفْت أَرْبَعَةْ عَجَلَاتْ جَنْب الْمَخْلُوقِينْ السَّمَاوِيِّينْ، أَيِّ عَجَلَةْ جَنْب مَخْلُوقْ سَمَاوِي وَاحِدْ. وَ الْعَجَلَاتْ دَوْل بِرَارُوا مِثِلْ صَنَعَوْهُمْ بِحَجَرْ غَالِي. 10وَ الْعَجَلَاتْ الْأَرْبَعَةْ دَوْل بِشَّابَهَوْا وَ مَصْنُوعِينْ مِثِلْ عَجَلَةْ وَاحِدَةْ فِي لُبّ الْآخَرَةْ. 11وَ وَكِتْ يَمْشُوا، يَقْدَرَوْا يَمْشُوا فِي أَيِّ جِيهَةْ بَلَا مَا يِنْلَفْتُوا. يَمْشُوا عَلَيْ الْجِيهَةْ الْيِوَجِّهْ عَلَيْهَا الرَّاسْ وَ مَا يِنْلَفْتُوا. 12وَ كُلَّ الْجِلِدْ وَ الضَّهَرْ وَ الْإِيدَيْن وَ الْجَنَاحَيْ هَنَا الْمَخْلُوقِينْ السَّمَاوِيِّينْ وَ الْعَجَلَاتْ الْأَرْبَعَةْ، كُلُّهُمْ مُحَوِّقِينْ بِعُيُونْ. 13وَ سِمِعْت نَادَوْا الْعَجَلَاتْ دَوْل الْعَجَلَاتْ الْيُدُورُوا. 14وَ أَيِّ مَخْلُوقْ سَمَاوِي عِنْدَهْ أَرْبَعَةْ وِجِهْ. الْوِجِهْ الْوَاحِدْ هَنَا مَخْلُوقْ سَمَاوِي وَ الْوِجِهْ الْوَاحِدْ هَنَا إِنْسَانْ وَ الْوِجِهْ الْوَاحِدْ هَنَا دُودْ وَ الْوِجِهْ الْوَاحِدْ هَنَا صَقُرْ.

15وَ بَعَدْ دَا، الْمَخْلُوقِينْ السَّمَاوِيِّينْ أَنْرَفَعَوْا فَوْق. وَ دَوْل نَفْس الْمَخْلُوقِينْ الشِّفْتُهُمْ جَنْب بَحَرْ خَابُورْ. 16وَ وَكِتْ الْمَخْلُوقِينْ السَّمَاوِيِّينْ يَمْشُوا، الْعَجَلَاتْ كُلَ يَمْشُوا مَعَاهُمْ. وَ وَكِتْ الْمَخْلُوقِينْ السَّمَاوِيِّينْ يِمَطُّطُوا جَنَاحَيْهُمْ لِيِنْرَفْعُوا مِنْ الْأَرْض، الْعَجَلَاتْ كُلَ مَا يِنْفَرْقُوا مِنْهُمْ لَاكِنْ يِنْرَفْعُوا مَعَاهُمْ. 17وَ وَكِتْ الْمَخْلُوقِينْ يَقِيفُوا، الْعَجَلَاتْ كُلَ يَقِيفُوا وَ وَكِتْ يِنْرَفْعُوا، الْعَجَلَاتْ كُلَ يِنْرَفْعُوا مَعَاهُمْ أَشَانْ رُوحْ الْمَخْلُوقِينْ دَوْل قَاعِدَةْ فِي الْعَجَلَاتْ.

مجْد اللّه فات من بَيْته

18وَ بَعَدْ دَا، مَجْد اللّٰهْ قَمَّ مِنْ عَتَبَةْ الْبَيْت وَ وَقَفْ مِنْ فَوْق لِلْمَخْلُوقِينْ السَّمَاوِيِّينْ. 19وَ خَلَاصْ، أَنَا شِفْت الْمَخْلُوقِينْ السَّمَاوِيِّينْ مَطَّطَوْا جَنَاحَيْهُمْ وَ أَنْرَفَعَوْا مِنْ الْأَرْض وَ مَشَوْا سَوَا مَعَ الْعَجَلَاتْ. وَ مَجْد اللّٰهْ وَقَفْ فِي خَشُمْ الْبَابْ الصَّبْحَانِي هَنَا بَيْت اللّٰهْ وَ مَجْد اللّٰهْ إِلٰـهْ بَنِي إِسْرَائِيلْ قَاعِدْ مِنْ فَوْق لِلْمَخْلُوقِينْ السَّمَاوِيِّينْ. 20وَ دَوْل الْمَخْلُوقِينْ الشِّفْتُهُمْ تِحِتْ اللّٰهْ إِلٰـهْ بَنِي إِسْرَائِيلْ فِي بَحَرْ خَابُورْ وَ عِرِفْت كَدَرْ دَوْل بَسْ الْمَخْلُوقِينْ السَّمَاوِيِّينْ. 21وَ الْأَرْبَعَةْ مَخْلُوقِينْ سَمَاوِيِّينْ دَوْل، أَيِّ وَاحِدْ عِنْدَهْ أَرْبَعَةْ وِجِهْ وَ أَرْبَعَةْ جَنَاحَيْ وَ تِحِتْ جَنَاحَيْهُمْ، فِيَّهْ إِيدْ مِثِلْ إِيدْ إِنْسَانْ. 22وَ وُجُوهُّمْ يِشَابُهُوا وُجُوهْ الْمَخْلُوقِينْ الْأَنَا شِفْتُهُمْ جَنْب بَحَرْ خَابُورْ وَ دَوْل بَسْ هُمَّنْ. وَ أَيِّ وَاحِدْ يَمْشِي عَدِيلْ قِدَّامَهْ.

Currently Selected:

حِزْقِيال 10: ع.د.ت19

Highlight

Copy