أفَسُس 3
3
سِرّ اللّه
1أَنَا بُولُسْ قَاعِدْ فِي السِّجِنْ أَشَانْ نِتَابِعْ الْمَسِيحْ عِيسَى وَ نِبَلِّغْ بِشَارْتَهْ لَيْكُو إِنْتُو الْمَا يَهُودْ. وَ أَشَانْ دَا، أَنَا نَسْأَلْ لَيْكُو اللّٰهْ. 2وَ أَكِيدْ، سِمِعْتُوا بِنِعْمَةْ اللّٰهْ الْقَاعِدَةْ فَوْقِي لِنِسَوِّي الْخِدْمَةْ الْاللّٰهْ كَلَّفَانِي بَيْهَا فِي شَانْكُو. 3وَ خِدِمْتِي تُخُصّ سِرّ اللّٰهْ الْبَيَّنَهْ لَيِّ فِي رُؤْيَةْ. وَ أَوَّلْ كَتَبْت لَيْكُو مِنَّهْ. 4وَكِتْ تَقْرُوا كَلَامِي دَا، تَفْهَمَوْا الْعِلِمْ اللِّقِيتَهْ مِنْ سِرّ اللّٰهْ الْبُخُصّ الْمَسِيحْ. 5فِي كُلَّ الْوَكِتْ الْفَاتْ، اللّٰهْ مَا بَيَّنْ الْكَلَامْ دَا لِبَنِي آدَم لَاكِنْ فِي الْوَكِتْ الْحَاضِرْ، بَيَّنَهْ بِالرُّوحْ الْقُدُّوسْ لِلرُّسُلْ وَ الْأَنْبِيَاء الصَّالِحِينْ الرَّسَّلَاهُمْ. 6وَ دَاهُو سِرّ اللّٰهْ. بِبِشَارَةْ الْمَسِيحْ، الْأُمَمْ يَبْقَوْا وُرَّاثْ سَوَا مَعَ الْيَهُودْ. يَبْقَوْا أُمَّةْ وَاحِدَةْ الْهِي جِسِمْ الْمَسِيحْ. وَ خَلَاصْ بِعِيسَى الْمَسِيحْ، هُمَّنْ يِشَارُكُوا فِي وَعَدْ اللّٰهْ.
7اللّٰهْ نَزَّلْ فَوْقِي نِعْمَتَهْ وَ جَعَلَانِي خَدَّامَهْ بِقُدُرْتَهْ أَشَانْ نِبَلِّغْ الْبِشَارَةْ دِي. 8وَ مِنْ كُلَّ الصَّالِحِينْ، أَنَا بَسْ الصَّغَيَّرْ وَ لَاكِنْ اللّٰهْ أَنْطَانِي رَحْمَةْ وَ كَلَّفَانِي أَنَا بِبَلِّغِينْ الْبِشَارَةْ لِلْأُمَمْ وَ نِبَشِّرْهُمْ بِبَرَكَةْ الْمَسِيحْ الْمَا عِنْدَهَا حَدّ. 9وَ رَسَّلَانِي أَشَانْ نِفَسِّرْ لِكُلَّ النَّاسْ مَعَنَى سِرّ اللّٰهْ. وَ اللّٰهْ الْخَالِقْ كُلَّ شَيّءْ حَفَضْ السِّرّ دَا لِنَفْسَهْ فِي كُلَّ الزَّمَنْ الْفَاتْ.
10وَ حِكْمَةْ اللّٰهْ وَسِيعَةْ وَ عَجِيبَةْ. وَ فِي الزَّمَنْ الْحَاضِرْ، اللّٰهْ يِدَوْر يِوَصِّفْ حِكْمَتَهْ بِعَمَلَهْ فِي أُسُطْ أُمَّةْ الْمَسِيحْ أَشَانْ كُلَّ الْحُكَّامْ وَ الْكُبَارَاتْ الْقَاعِدِينْ فِي السَّمَاوَاتْ يِشِيفُوهَا وَ يَفْهَمَوْهَا. 11وَ دِي بَسْ نِيَّةْ اللّٰهْ مِنْ الْبِدَايَةْ التَّمَّمَاهَا بِالْمَسِيحْ عِيسَى رَبِّنَا. 12وَ بِسَبَبْ عَلَاقِتْنَا مَعَ الْمَسِيحْ وَ إِيمَانَّا بَيَّهْ، عِنْدِنَا شَجَاعَةْ أَشَانْ نَعَبُدُوا اللّٰهْ بَلَا شَكَكْ. 13وَ أَشَانْ كُلَّ الْكَلَامْ دَا، نَطْلُبْ مِنْكُو مَا تَحْزَنَوْا لَيِّ فِي تَعَبِي. أَنَا قَاعِدْ نَتْعَبْ مِثِلْ دَا فِي شَانْكُو إِنْتُو وَ دَا يَبْقَى لِفَايْدِتْكُو الْمَجِيدَةْ.
دُعا بُولُس
14وَ أَشَانْ دَا، نَسْجُدْ قِدَّامْ أَبُونَا اللّٰهْ. 15وَ هُو أَبُو الْعَايِلَاتْ الْفِي السَّمَاءْ وَ الْأَرْض. 16وَ نَسْأَلَهْ أَشَانْ يَنْطِيكُو بَرَكَةْ مِنْ الْغُنَى الْعِنْدَهْ فِي الْمَجْد وَ يَنْطِيكُو قُدْرَةْ وَ يِثَبِّتْ قُلُوبْكُو بِالرُّوحْ الْقُدُّوسْ. 17وَ خَلِّي الْمَسِيحْ يَسْكُنْ فِي قُلُوبْكُو بِإِيمَانْكُو. وَ خَلِّي الْمَحَبَّةْ تَبْقَى لَيْكُو مِثِلْ قَعَرْ وَ أَسَاسْ لَحَدِّي تِسَوُّوا كُلَّ شَيّءْ بِالْمَحَبَّةْ. 18وَ مِثِلْ دَا، إِنْتُو مَعَ كُلَّ الصَّالِحِينْ تَقْدَرَوْا تَفْهَمَوْا كَدَرْ مَحَبَّةْ الْمَسِيحْ وَسِيعَةْ بِلْحَيْن وَ كَبِيرَةْ بِلْحَيْن وَ مَا عِنْدَهَا حَدّ. 19وَ بِمِثِلْ دَا، تَعَرْفُوا مَحَبِّتَهْ الْفَايْتَةْ كُلَّ الْعِرْفَةْ. وَ بَرَكَةْ اللّٰهْ الْكَامِلَةْ تَمْلَا قُلُوبْكُو مَرَّةْ وَاحِدْ.
20وَ الْحَمْدُ للّٰهْ! بِقُدُرْتَهْ الْقَاعِدَةْ فَوْقنَا، اللّٰهْ يَقْدَرْ يِسَوِّي زِيَادَةْ مِنْ كُلَّ شَيّءْ النَّسْأَلَوْه مِنَّهْ وَ زِيَادَةْ بِلْحَيْن مِنْ أَيِّ شَيّءْ الْقَاعِدْ فِي فِكِرْنَا. 21وَ خَلِّي يِمَجُّدُوا اللّٰهْ دَايْماً فِي أُسُطْ أُمَّتَه وَ بِالْمَسِيحْ عِيسَى دَايْماً وَ إِلَى الْأَبَدْ. آمِينْ.
Currently Selected:
أفَسُس 3: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
