جامِعة 12
12
أذّكّر الربّ
1فِي وَكِتْ شَبَابَكْ، أَذَّكَّرَهْ،
هُو الْخَلَقَاكْ.
أَذَّكَّرَهْ قَبُلْ أَيَّامْ الضِّيقَةْ
مَا يَجُوكْ
وَ قَبُلْ مَا يَجُوكْ السِّنِينْ
الْفَوْقهُمْ إِنْتَ تُقُولْ:
«حَيَاتِي مَا عِنْدَهَا طَعَمْ.»
2أَذَّكَّرَهْ قَبُلْ مَا يِضَلُّمُوا
الْحَرَّايْ وَ النُّورْ
وَ الْقَمَرْ وَ النُّجُومْ كُلَ
وَ قَبُلْ السَّحَابْ مَا يِقَبِّلْ
بَعَدْ الْمَطَرْ.
3أَذَّكَّرَهْ قَبُلْ الْحَارِسْ مَا يَرْجِفْ مِنْ الْخَوْف
وَ رُجَالْ الْفَحَلِينْ مَا يِدَنْقُرُوا
وَ قَبُلْ عَوِينْ الرَّحَّاكَاتْ الْمَا كَتِيرَاتْ يِوَقِّفَنْ الرَّحِيكْ
وَ الْيِشِيفَنْ بِشَبَابِيكْ مَا يِوَدِّرَنْ جَمَالْهِنْ.
4أَذَّكَّرَهْ قَبُلْ بِيبَانْ الشَّوَارِعْ أَبْ ضَلْفِتَيْن مَا يِنْسَدَّوْا
وَ حَرَكَةْ الْمُرْحَاكَةْ مَا تِنْسَمِعْ
وَ قَبُلْ مَا تُقُمّ وَكِتْ الطُّيُورْ يِغَنُّوا
وَ يَعَيَنْ كُلَّ الْغَنَّايَاتْ.
5أَذَّكَّرَهْ قَبُلْ مَا تَخَافْ مِنْ الْعَالِي
وَ مِنْ رُعُبْ الدَّرِبْ
وَ قَبُلْ شَدَرَةْ اللَّوْز مَا تِنَوِّرْ
وَ الْجَرَادْ مَا يِسِيرْ بِتَقَلَةْ
وَ قَبُلْ الشَّدَرَةْ التِّزِيدْ الشَّهْوَةْ مَا تَفْشُلْ
وَ الْإِنْسَانْ مَا يَمْشِي لِبَيْتَهْ الْأَبَدِي
وَ النَّوَّاحَاتْ مَا يَمْشَنْ فِي الشَّارِعْ.
6أَذَّكَّرَهْ قَبُلْ الْحَيَاةْ مَا تِنْقَطِعْ مِثِلْ حَبِلْ الْفُضَّةْ
وَ غَرَّافْ الدَّهَبْ مَا يِنْقَدَّ
وَ قَبُلْ الْجَرّ مَا يِلْكَسَّرْ فِي الْحَوْط
وَ الْجُرَّةْ مَا تِنْكَسِرْ وَ تَقَعْ فِي الْبِيرْ.
7أَذَّكَّرَهْ قَبُلْ الْإِنْسَانْ مَا يِقَبِّلْ
فِي التُّرَابْ الْخَلَقَوْه مِنَّهْ
وَ قَبُلْ الرُّوحْ مَا تِقَبِّلْ
لِلرَّبّ الْخَلَقْهَا.
8الْمُعَلِّمْ قَالْ:
«الْحَيَاةْ زَايْلَةْ! زَايْلَةْ سَاكِتْ!
كُلَّ شَيّءْ زَايِلْ!»
كلام الأخير هنا المُعلِّم
9الْمُعَلِّمْ مَا حَكِيمْ بَسْ،
هُو بَتَّانْ عَلَّمْ الْمَعْرَفَةْ لِلشَّعَبْ.
هُو كَشَفْ بِمَعْرَفَةْ وَ وَزَنْ
وَ نَظَّمْ عَدَدْ كَبِيرْ هَنَا أَمْثَالْ.
10الْمُعَلِّمْ فَتَّشْ
لِيَلْقَى كَلَامْ الْيَعَجِبْ.
وَ كَتَبْ كَلَامْ دَا عَدِيلْ
وَ دَا كَلَامْ الْحَقّ.
11كَلَامْ الْحَكِيمِينْ مِثِلْ عَصَاةْ
الْيُسُوقُوا بَيْهَا الْبَهَايِمْ.
وَ مُؤَلِّفِينْ الْكُتُبْ قَوِيِّينْ مِثِلْ مَسَامِيرْ
الْيُطُقُّوهُمْ وَ يَثْبُتُوا.
وَ دِي هَدِيَّةْ الْجَايَةْ مِنْ رَاعِي وَاحِدْ.
12وَ الْفَضَّلْ مِنْ الْكَلَامْ دَا،
خَلِّي يَبْقَى لَيْك دَرِسْ، يَا وِلَيْدِي.
كِتَابَةْ الْكُتُبْ مَا تِكَمِّلْ
وَ كَتَرَةْ الْقِرَايْ تِعَيِّي الْجِسِمْ.
13وَ فِي الأَخِيرْ،
دَاهُو نِهَايَةْ الْكَلَامْ أَنْسَمَعَتْ.
أَخَافْ مِنْ الرَّبّ
وَ أَحْفَضْ وَصِيَّاتَهْ
أَشَانْ دَا الْوَاجِبْ لِأَيِّ إِنْسَانْ.
14أَشَانْ الرَّبّ يِحَاسِبْ كُلَّ عَمَلْ الْإِنْسَانْ
حَتَّى كَانْ مُلَبَّدْ كُلَ،
كَنْ زَيْن وَلَّا فَسِلْ.
Currently Selected:
جامِعة 12: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
