جامِعة 10
10
الحكمة و الطماسة
1الدُّبَّانْ الْمَيِّتْ
يِحَمِّضْ وَ يِعَفِّنْ
الدِّهِنْ هَنَا سِيدْ الْعِطِرْ.
وَ مِثِلْ دَا، شِيَّةْ مِنْ الطَّمَاسَةْ
تِتَلِّفْ الْحِكْمَةْ وَ الشَّرَفْ.
2قَلْب الْحَكِيمْ
يِمَيِّلْ عَلَيْ الطَّرِيقْ الْعَدِيلْ
وَ قَلْب الْمَطْمُوسْ
يِمَيِّلْ عَلَيْ الطَّرِيقْ الْأَعْوَجْ.
3وَ وَكِتْ الْمَطْمُوسْ يَمْشِي فِي الدَّرِبْ،
يِنْعَرِفْ كَدَرْ هُو مَا عِنْدَهْ فِهِمْ
وَ يِوَصِّفْ لِلنَّاسْ
كَدَرْ فِكْرَهْ مَحْدُودْ.
4وَكِتْ الْمَلِكْ يَزْعَلْ ضِدَّكْ،
أَنْقَرِعْ، مَا تِخَلِّي بَكَانَكْ.
أَقْعُدْ هَادِي
وَ دَا يِنَجِّيكْ مِنْ ذُنُوبْ كَتِيرْ.
5فِيَّهْ فَسَالَةْ أَنَا شِفْتَهَا فِي الْأَرْض
وَ الْفَسَالَةْ دِي، هِي خَطَا جَايِ مِنْ الْمَلِكْ.
6الْمَطَامِيسْ يُخُطُّوهُمْ
فِي بَكَانْ عَالِي زِيَادَةْ
وَ الْغَنِيِّينْ يُخُطُّوهُمْ
فِي بَكَانْ تِحِتْ.
7أَنَا شِفْت بَتَّانْ عَبِيدْ رَاكْبِينْ فِي خَيْل
وَ مَسَائِيلْ مَاشِينْ بِرِجْلَيْهُمْ مِثِلْ عَبِيدْ.
أيِّ عمل عِنْده خُطورة
8الْيَنْكُتْ نُقْرَةْ،
أَكُونْ يَقَعْ فَوْقهَا
وَ الْيِسَوِّي خُرْمَةْ،
أَكُونْ دَابِي يِعَضِّيهْ.
9الْيَقْطَعْ الْحَجَرْ،
أَكُونْ يِنْجَرِحْ
وَ الْيِشَقِّقْ الْحَطَبْ،
يَدْخُلْ فِي الْخَطَرْ.
10الْفَاسْ كَنْ كَالَّةْ وَ مَا طَرَّقَوْهَا،
وَاجِبْ قُدْرَةْ زِيَادَةْ فِي إِسْتِعْمَالْهَا.
خَلَاصْ، فَايْدَةْ الْحِكْمَةْ
هِي النَّجَاحْ.
11كَنْ نَادُمْ يَعَرِفْ يِهَدِّي الدَّابِي
وَ الدَّابِي يِعَضِّيهْ،
شُنُو الْفَايْدَةْ الْيَلْقَاهَا؟
ما تِكلِّم كتير
12وَكِتْ الْحَكِيمْ يِحَجِّي،
كَلَامَهْ يَعَجِبْ النَّاسْ
وَ لَاكِنْ لِسَانْ الْمَطْمُوسْ
يِوَدِّرَهْ.
13كَلَامَهْ فِي الْبِدَايَةْ هُو طَمَاسَةْ
وَ فِي النِّهَايَةْ هُو جَهَالَةْ وَ شَرّ.
14النَّادُمْ الْفِكْرَهْ مَحْدُودْ،
يِكَتِّرْ كَلَامَهْ.
وَ الْإِنْسَانْ مَا يَعَرِفْ الْيُكُونْ
وَ يَاتُو الْيِخَبِّرَهْ
بِالْيُكُونْ بَعَدْ مَوْتَهْ؟
15خِدْمَةْ الْمَطْمُوسْ تِعَيِّيهْ
لَحَدِّي مَا يَعَرِفْ دَرِبْ
الْيِوَدِّيهْ لِلْمَدِينَةْ!
16الْعَذَابْ لِلْبَلَدْ الْمَلِكْهَا صَبِي
وَ كُبَارَاتْهَا يَاكُلُوا طُولْ الْيَوْم!
17مَبْرُوكْ لِلْبَلَدْ الْمَلِكْهَا مِنْ عِيَالْ الشُّيُوخْ
وَ كُبَارَاتْهَا يَاكُلُوا فِي وَكِتْ مُنَاسِبْ
لِيَلْقَوْا قُدْرَةْ بَلَا سَكَرْ!
18فِي وَكْت الْكَسَلْ،
رَاسْ الْبَيْت يَقَعْ
وَ وَكْت الْإِيدَيْ يِنْرَخُوا،
الْبَيْت يِنَقِّطْ.
19النَّاسْ يِسَوُّوا أَكِلْ لِيَضْحَكَوْا
وَ الْخَمَرْ لِيِفَرُّحُوا حَيَاتْهُمْ.
وَ لَاكِنْ بِالْقُرُسْ،
يَلْقَوْا كُلَّ شَيّءْ.
20مَا تَلْعَنْ الْمَلِكْ
حَتَّى فِي دَاخَلْ قَلْبَكْ كُلَ
وَ فِي بَيْتَكْ وِحَيْدَكْ،
مَا تَلْعَنْ الْغَنِيْ.
أَشَانْ الطَّيْرَايْ تِوَدِّي الْخَبَرْ
وَ تِحَجِّي بِالشَّيّءْ الْإِنْتَ قُلْتَهْ.
Currently Selected:
جامِعة 10: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
