دَنْيال 12
12
1وَ هُو قَالْ بَتَّانْ لِدَنْيَالْ: «فِي الْوَكِتْ دَا، يُقُمّ مِكَايِيلْ الْمُكَلَّفْ بِشَعَبَكْ. وَ دَا يَبْقَى فِي وَكِتْ هَنَا تَعَبْ الْأَبَداً مَا بِقِي مِثْلَهْ مِنْ الْأُمَّةْ دِي قَاعِدَةْ لَحَدِّي الْوَكِتْ دَا. وَ بَيْدَا كُلَ، يَنْجَى أَيِّ وَاحِدْ مِنْ شَعَبَكْ الْأُسْمَهْ مَكْتُوبْ فِي كِتَابْ الْحَيَاةْ. 2وَ كَتِيرِينْ مِنْ النَّاسْ الْمَيْتِينْ يَبْعَثَوْا وَ وَاحِدِينْ مِنْهُمْ يَلْقَوْا الْحَيَاةْ الْأَبَدِيَّةْ وَ وَاحِدِينْ يَلْقَوْا الْعَيْب وَ الْإِهَانَةْ إِلَى الْأَبَدْ. 3وَ النَّاسْ الْعِنْدُهُمْ حِكْمَةْ يِضَوُّوا مِثِلْ ضَيّ النَّهَارْ أَشَانْ عَلَّمَوْا الْعَدَالَةْ لِنَاسْ كَتِيرِينْ. وَ هُمَّنْ يَبْقَوْا مِثِلْ نُجُومْ السَّمَاءْ الْيِضَوُّوا دَايْماً.
4«وَ لَاكِنْ إِنْتَ، يَا دَنْيَالْ، الْكَلَامْ دَا سِرّ، أَحْفَضَهْ. وَ خُطّ فِي الْكِتَابْ دَا خِتِمْ أَشَانْ مَا يَفْتَحَوْه أَبَداً لَحَدِّي الْوَكِتْ الْأَخِيرْ يِتِمّ. وَ أَشَانْ دَا، نَاسْ كَتِيرِينْ يِفَتُّشُوهْ جَايْ وَ جَايْ لِيِزِيدُوا مَعْرَفَتْهُمْ.»
الوكت الأخير
5وَ أَنَا دَنْيَالْ فِي الرُّؤْيَةْ دِي شِفْت إِتْنَيْن آخَرِينْ، الْوَاحِدْ وَاقِفْ بِهِنِي وَ الْآخَرْ وَاقِفْ بِهِنَاكْ لِلْبَحَرْ. 6وَ وَاحِدْ مِنْهُمْ سَأَلْ الرَّاجِلْ اللَّابِسْ خَلَقْ هَنَا قُمَاشْ سَمَحْ الْقَاعِدْ فَوْق مِنْ أَلْمِي الْبَحَرْ وَ قَالْ: «مَتَى يَجِي أَخِيرْ الْعَجَايِبْ دَوْل؟» 7وَ النَّادُمْ اللَّابِسْ الْخَلَقْ هَنَا قُمَاشْ سَمَحْ الْقَاعِدْ فَوْق مِنْ أَلْمِي الْبَحَرْ دَا رَفَعْ إِيدَيْنَهْ الْإِتْنَيْن عَلَيْ السَّمَاءْ وَ قَالْ: «نَحْلِفْ بِأُسُمْ اللّٰهْ الْحَيّ الدَّايِمْ، أَخِيرْ الْأَشْيَاءْ دَوْل فِي تَلَاتَةْ سَنَةْ وَ نُصّ. وَ دَا، بَعَدْ تِدَّمَّرْ قُدْرَةْ الشَّعَبْ الصَّالِحِينْ هَنَا اللّٰهْ.»
8وَ أَنَا سِمِعْت كَلَامَهْ وَ لَاكِنْ مَا فِهِمْت مَعَنَاتَهْ وَ قُلْت: «يَا سَيِّدِي، كِكَّيْف تُكُونْ نِهَايَةْ الْعَجَايِبْ دَوْل؟» 9وَ هُو قَالْ لَيِّ: «يَا دَنْيَالْ، الْكَلَامْ دَا خَلِّيهْ أَشَانْ هُو سِرّ وَ مَخْتُومْ مَا يَفْتَحَوْه لَحَدِّي الْوَكِتْ الْأَخِيرْ. 10وَ نَاسْ كَتِيرِينْ التَّعَبْ يِطَهِّرْهُمْ وَ يِصَفِّيهُمْ وَ يِنَضِّفْهُمْ. وَ الْعِنْدُهُمْ حِكْمَةْ يَفْهَمَوْا. وَ لَاكِنْ الْعَاصِيِينْ يِسَوُّوا الشَّرّ وَ وَاحِدْ مِنْهُمْ كُلَ مَا يَفْهَمْ. 11وَ مِنْ وَكِتْ مَنَعَوْا الضَّحِيَّةْ الْيِقَدُّمُوهَا كُلَّ يَوْم وَ قَمَّوْا سَوَّوْا الْحَرَامْ الْيِجِيبْ الْخَرَابْ، عِنْدُهُمْ 1 290 يَوْم.#12:11 1 290 يَوْم: دا يساوي تلاتة سنة و نُصّ. 12وَ مَبْرُوكْ لِلنَّادُمْ الْيَصْبُرْ لَحَدِّي 1 335 يَوْم. 13وَ كَنْ لَيْك إِنْتَ، يَا دَنْيَالْ، أَصْبُرْ لَحَدِّي تُمُوتْ. وَ فِي الأَخِيرْ، تُقُمّ وَ تَلْقَى أَجْرَكْ.»
Currently Selected:
دَنْيال 12: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
