عَمُوس 6
6
العذاب لكُبارات إسرائيل
1الْعَذَابْ لَيْكُو إِنْتُو
الْقَاعِدِينْ مُرْتَاحِينْ فِي جَبَلْ صَهْيُون
وَ الْقَاعِدِينْ بِأَمَانْ فِي جَبَلْ السَّامِرَةْ.
إِنْتُو تَحْسُبُوا نُفُوسْكُو أَحْسَنْ نَاسْ فِي أَحْسَنْ أُمَّةْ
وَ كُلَّ بَنِي إِسْرَائِيلْ يَجُوا لَيْكُو إِنْتُو.
2أَمْشُوا لِحِلَّةْ كَلْنَةْ
وَ شِيفُوا الْبِقِي فَوْقهَا
وَ مِنْهَا فُوتُوا
لِمَدِينَةْ حَمَاتْ الْكَبِيرَةْ
وَ بَتَّانْ أَمْشُوا
قَاتْ مَدِينَةْ الْفِلِسْطِيِّينْ.
هَلْ مَمَالِكْهُمْ أَخَيْر
مِنْ مَمْلَكَتْكُو وَلَّا؟
وَ أَرْضُهُمْ أَكْبَرْ
مِنْ أَرْضُكُو وَلَّا؟
3وَ وَكِتْ إِنْتُو تَحْسُبُوا يَوْم الضِّيقَةْ بَعِيدْ بِلْحَيْن،
بَيْدَا، إِنْتُو تِقَرُّبُوا يَوْم الْعُنُفْ لَيْكُو.
4إِنْتُو رَاقْدِينْ فِي سَرَايِرْ
الْمُجَمَّلِينْ بِعَاجْ
وَ قَاعِدِينْ مُرْتَاحِينْ
فِي فُرَاشْكُو.
وَ تَاكُلُوا لَحَمْ الْكُبْشَانْ
وَ الْعَجَّالْ الْمَعْزُولِينْ مِنْ الزَّرِيبَةْ.
5وَ تِغَنُّوا مَعَ الْجِقِنْدِيَّةْ
لِتِبَازُوا دَاوُدْ
وَ تَصْنَعَوْا لِنُفُوسْكُو آلَاتْ هَنَا غِنَيْ.
6وَ تَشَرْبَوْا الْخَمَرْ بِغَرَارِيفْ
وَ تُصُبُّوا أَحْسَنْ عِطِرْ.
وَ لَاكِنْ مَا قَاعِدِينْ تَحْزَنَوْا
لِدَمَارْ ذُرِّيَّةْ يُوسُفْ.
7وَ أَشَانْ دَا، هَسَّعْ تَبْقَوْا أَوَّلْ نَاسْ
الْيَكُرْبُوهُمْ وَ يِوَدُّوهُمْ فِي الْغُرْبَةْ.
وَ الرَّاحَةْ الْإِنْتُو عَايْشِينْ فَوْقهَا دِي
كُلَ تَبْقَى مَا فِيهَا.
دمار العاصِمة
8اللّٰهْ الرَّبّ حَلَفْ بِنَفْسَهْ
وَ دَاهُو كَلَامْ اللّٰهْ:
«أَنَا اللّٰهْ الْإِلٰـهْ الْقَادِرْ
نَكْرَهْ إِسْتِكْبَارْ بَنِي إِسْرَائِيلْ.
وَ نَبْغُضْ قُصُورْهُمْ
وَ نِسَلِّمْ مَدِينِتْهُمْ
وَ كُلَّ شَيّءْ الْعِنْدَهَا لِعَدُوهُمْ.
9وَ كَنْ عَشَرَةْ نَاسْ قَاعِدِينْ فِي بَيْت وَاحِدْ،
كُلُّهُمْ يُمُوتُوا.
10وَ الْقَرِيبْ لِلْمَيْتِينْ
يَمْشِي يِشِيلْ الْجَنَازَاتْ
لِيَحْرِقْهُمْ بَرَّا مِنْ الْبَيْت.
وَ يُقُولْ لِلنَّادُمْ الْفَضَّلْ
دَاخَلْ فِي لُبّ الْبَيْت:
‹نَادُمْ مَعَاكْ فِي وَلَّا؟›
وَ هُو يُقُولْ: ‹لَا!›
وَ الْقَرِيبْ يُقُولْ: ‹أَسْكُتْ!
مَا تِنَادِي أُسُمْ اللّٰهْ.›»
11وَ خَلَاصْ، دَاهُو أَمُرْ اللّٰهْ.
الْبُيُوتْ الْكُبَارْ يِدَّمَّرَوْا
وَ الدُّقَاقْ يِلْكَسَّرَوْا.
12وَ هَلْ الْخَيْل
يَقْدَرَوْا يَجْرُوا فِي رَاسْ الْحَجَرْ وَلَّا؟
وَ هَلْ التِّيرَانْ
يَقْدَرَوْا يَجْبُدُوا الْحَرَّاتَةْ فِي رَاسْ الْحَجَرْ وَلَّا؟
وَ مَالَا بَدَّلْتُوا الْعَدَالَةْ بِالسَّمّ
وَ سَوَّيْتُوا الْحَقّ مُرّ مِثِلْ الْحَمْضَلْ؟
النصُر الما عِنْده فايْدة
13وَ إِنْتُو تَفْرَحَوْا أَشَانْ نَصَرْتُوا فِي حِلَّةْ لُودَبَارْ وَ تُقُولُوا: «بِقُدْرِتْنَا بَسْ، شِلْنَا حِلَّةْ قَرْنَايِمْ.» 14وَ دَاهُو كَلَامْ اللّٰهْ الْإِلٰـهْ الْقَادِرْ: «يَا بَنِي إِسْرَائِيلْ، أَنَا نِرَسِّلْ لَيْكُو أُمَّةْ تِضَايِقْكُو مِنْ خَشُمْ حِلَّةْ لَبُو حَمَاتْ فِي الْمُنْشَاقْ لَحَدِّي وَادِي الْأُرْدُنْ فِي الْوَطِي.»
Currently Selected:
عَمُوس 6: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
