2 تِمُوتَاوُس 4
4
بلِّغين كلام اللّه
1نِوَصِّيكْ قِدَّامْ اللّٰهْ وَ قِدَّامْ الْمَسِيحْ عِيسَى الْيِشَارِعْ الْحَيِّينْ وَ الْمَيْتِينْ وَ دَا فِي الْيَوْم الْهُو يِبِينْ فَوْقَهْ فِي مَمْلَكَتَهْ. 2بَلِّغْ كَلَامْ اللّٰهْ. أنْكَرِبْ فَوْقَهْ كَنْ تَلْقَى مِنْ النَّاسْ مُرّ وَلَّا حَلُو كُلَ. جِيبْ النَّاسْ فِي الدَّرِبْ. الْوَاحِدِينْ أَهْرِجْهُمْ وَ الْوَاحِدِينْ شَجِّعْهُمْ. عَلِّمْهُمْ كُلُّهُمْ بِصَبُرْ شَدِيدْ.
3فِي الْوَكِتْ الْجَايِ، النَّاسْ يَابَوْا مَا يَحْمَلَوْا التَّعْلِيمْ الْعَدِيلْ. يِتَابُعُوا الْكَلَامْ الْحَلُو لَيْهُمْ وَ يِشِيلُوا مُعَلِّمِينْ كَتِيرِينْ الْيُقُولُوا الْكَلَامْ الْيَعَجِبْ النَّاسْ بَسْ. 4وَ مَا يِدَوْرُوا يَسْمَعَوْا أَبَداً كَلَامْ الْحَقّ. فِي بَدَلَهْ يِدَوْرُوا يَسْمَعَوْا قِصَصْ النَّاسْ الْيِوَدُّرُوهُمْ. 5لَاكِنْ إِنْتَ، أَقْعُدْ دَايْماً ثَابِتْ وَ أَحْمَلْ التَّعَبْ وَ بَشِّرْ النَّاسْ بِالْبِشَارَةْ وَ أَخْدِمْ عَدِيلْ الْخِدْمَةْ الْاللّٰهْ أَنْطَاهَا لَيْك.
حالة بُولُس و خبره
6وَ لَاكِنْ أَنَا بِقِيتْ مِثِلْ هَدِيَّةْ شَرَابْ وَ قَرِيبْ دَمِّي يِدَفِّقْ. وَ أَنَا مَوْتِي قَرَّبْ خَلَاصْ. 7أَنَا جَاهَدْت جِهَادْ شَدِيدْ فِي الْحَقّ. وَ الْمُسَابَقَةْ الطَّوِيلَةْ كَمَّلْتَهَا وَ الْإِيمَانْ كَرَبْتَهْ قَوِي لَحَدِّي النِّهَايَةْ. 8وَ هَسَّعْ الْجَائِزَةْ الْيَنْطُوهَا لِلْغَالِبْ تَرْجَانِي. وَ هِي التَّاجْ الرَّبِّنَا يُخُطَّهْ فِي رَاسْ النَّادُمْ الصَّالِحْ. وَ رَبِّنَا الْحَاكِمْ الْعَادِلْ يَنْطِينِي الطَّاقِيَّةْ دِي فِي الْيَوْم الْأَخِيرْ. وَ مَا يَنْطِيهَا لَيِّ أَنَا وِحَيْدِي لَاكِنْ يَنْطِيهَا لِكُلَّ النَّاسْ الْقَرْمَانِينْ لِيَوْم جَيْتَهْ.
9جَاهِدْ لِتَجِينِي عَجَلَةْ 10أَشَانْ أَخُونَا دِيمَاسْ يِحِبّ الدُّنْيَا. هُو فَاتْ خَلَّانِي مَشَى فِي حِلَّةْ تَسَلُونِيكِي. وَ الْآخَرِينْ مَا فِيهُمْ. أَخُونَا كِرِيسْكِي مَشَى فِي بَلَدْ غَلَاطِيَةْ وَ أَخُونَا تِيطُسْ مَشَى فِي بَلَدْ دَلْمَاطِيَةْ. 11وَ مِثِلْ دَا، إِلَّا أَخُونَا لُوقَا وِحَيْدَهْ قَاعِدْ مَعَايِ. أَمْشِي لِأَخُونَا مَرْخُوسْ وَ جِيبَهْ مَعَاكْ. هُو يِسَاعِدْنِي زِيَادَةْ فِي خِدْمَةْ الرَّبّ. 12وَ أَنَا رَسَّلْت أَخُونَا تِشِيكُسْ فِي حِلَّةْ أَفَسُسْ. 13وَ وَكِتْ تَجِي، جِيبْ مَعَاكْ خَلَقِي هَنَا الْبَرِدْ الْخَلَّيْتَهْ مَعَ أَخُونَا كَارْبُسْ فِي حِلَّةْ تُرُوَاسْ. وَ جِيبْ الْكُتُبْ كُلَ. وَ فَكِّرْ فِي الْكُتُبْ الْمَكْتُوبِينْ فِي فَرْوَةْ وَ مَا تَنْسَاهُمْ.
14وَ إِسْكَنْدَرْ دَقَّاقْ النَّحَاسْ هُو سَوَّى لَيِّ فَسِلْ بِلْحَيْن. رَبِّنَا بَسْ يِجَازِيهْ فِي الشَّيّءْ السَّوَّاهْ لَيِّ. 15أَنْقَرِعْ مِنَّهْ أَشَانْ هُو خَالَفْ كَلَامْنَا مُخَالَفَةْ شَدِيدَةْ.
16أَوَّلْ مَرَّةْ وَكِتْ جَابَوْنِي فِي الْمَحْكَمَةْ وَ أَنَا دَافَعْت لِنَفْسِي، مَا فِي نَادُمْ وَاحِدْ الْوَقَفْ مَعَايِ. كُلُّهُمْ خَلَّوْنِي مَرَّةْ وَاحِدْ. نَسْأَلْ رَبِّنَا مَا يِحَاسِبْهُمْ. 17لَاكِنْ رَبِّنَا وَقَفْ مَعَايِ وَ أَنْطَانِي قُدْرَةْ وَ بَيْهَا بَلَّغْت الْبِشَارَةْ كُلَّهَا كَيْ وَ نَاسْ مِنْ كُلَّ الْأُمَمْ سِمْعَوْهَا. وَ فِي الْيَوْم دَا، أَنَا مِثِلْ نَادُمْ الدُّودْ يِدَوْر يَاكُلَهْ لَاكِنْ الرَّبّ نَجَّانِي مِنْ الْمَوْت. 18وَ هُو يِنَجِّينِي مِنْ كُلِّ شَيّءْ فَسِلْ وَ يِوَدِّينِي عَافَيْ فِي مَمْلَكَتَهْ السَّمَاوِيَّةْ. الْحَمْدُ للّٰهْ دَايْماً وَ إِلَى الْأَبَدْ. آمِينْ.
نِهاية الجواب
19سَلِّمْ بِرِسْكِيلَةْ وَ أَكِيلَا وَ نَاسْ بَيْت وَانِي سِفِرُسْ. 20أَخُونَا رَسْطُسْ قَعَدْ فِي كُرُنْتُسْ. وَ تُرُوفِيمُسْ بِقِي مَرْضَانْ وَ أَنَا خَلَّيْتَهْ فِي حِلَّةْ مِلِيتُسْ. 21جَاهِدْ أَشَانْ تَجِي لَيِّ قُبَّالْ الشِّتَاءْ مَا يَبْدَا. يُوبُلُسْ وَ بُودِسْ وَ لِينُسْ وَ كُلُودِيَةْ وَ كُلَّ الْأَخْوَانْ يِسَلُّمُوكْ.
22الرَّبّ مَعَاكْ. عَلَيْكُمْ النِّعْمَةْ.
Currently Selected:
2 تِمُوتَاوُس 4: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
