2 تَسَلونِيكِي 2

ناكِر الحقّ و المسيح

1نِدَوْرُوا نِحَجُّوا لَيْكُو بِجَيَّةْ رَبِّنَا عِيسَى الْمَسِيحْ وَ كِكَّيْف اللّٰهْ يِلِمِّنَا مَعَايَهْ. يَا أَخْوَانِي، نِوَصُّوكُو 2أَشَانْ مَا تِبَرْجُلُوا بِسُهُولَةْ كَنْ نَادُمْ يُقُولْ يَوْم الرَّبّ جَاءْ خَلَاصْ. وَ مَا تِخَلُّوا كَلَامَهْ يِبَرْجِلْ فِكِرْكُو. مَا تِصَدُّقُوا بِكَلَامْ مِثِلْ دَا، كَنْ جَاءْ بِرُؤْيَةْ أَوْ مِنْ خَبَرْ وَاحِدْ أَوْ بِمَكْتُوبْ يُقُولُوا جَايِ مِنِّنَا.

3مَا تِخَلُّوا نَادُمْ يُغُشُّكُو بِأَيِّ شَيّءْ. قُبَّالْ يَوْم الرَّبّ مَا يَجِي، لَابُدَّ الْعِصْيَانْ الْأَخِيرْ يَبْقَى وَ نَاكِرْ الْحَقّ يِبِينْ وَ هُو النَّادُمْ الْاللّٰهْ قَدَّرْ لَيَّهْ الْهَلَاكْ. 4هُو عَدُو لِكُلِّ إِلٰـهْ الْيَعَبُدُوهْ النَّاسْ وَ يِسَوِّي نَفْسَهْ أَكْبَرْ مِنَّهْ. وَ هُو يُخُطّ كُرْسِي حَقَّهْ فِي بَيْت اللّٰهْ وَ يُقُولْ: «أَنَا بَسْ اللّٰهْ.» 5نِسِيتُوا وَلَّا؟ وَكِتْ أَنَا قَاعِدْ مَعَاكُو أَوْرَيْتكُو بَيَّهْ.

6وَ تَعَرْفُوا الشَّيّءْ الْقَاعِدْ يَدْحَرَهْ أَشَانْ مَا يِبِينْ قُبَّالْ وَكْتَهْ مَا يَجِي. 7وَ هَسَّعْ كُلَ، قُدْرَةْ نَاكِرْ الْحَقّ قَاعِدَةْ تَخْدِمْ بِتَلْبِيدْ. وَ هُو مَا يِبِينْ لَحَدِّي الْيَدْحَرَهْ يَرْفَعَوْه مِنَّهْ. 8وَ فِي الْوَكِتْ دَا بَسْ، نَاكِرْ الْحَقّ يِبِينْ وَ الرَّبّ عِيسَى يَكْتُلَهْ بِنَفْخَةْ وَاحِدَةْ مِنْ خَشْمَهْ وَ يِدَمِّرَهْ بِنُورْ جَيْتَهْ.

9وَ نَاكِرْ الْحَقّ دَا يَجِي بِقُدْرَةْ إِبْلِيسْ. هُو يِسَوِّي كُلَّ أَنْوَاعْ الْعَلَامَاتْ وَ الْعَجَايِبْ وَ الْمُعْجِزَاتْ أَشَانْ يُغُشّ بَيْهُمْ النَّاسْ. 10وَ هُو يِسْتَعْمَلْ كُلَّ أَنْوَاعْ الشَّرّ لِيُغُشّ النَّاسْ الْمُوَدِّرِينْ وَ هُمَّنْ الْأَبَوْا مَا يَقْبَلَوْا وَ لَا يِرِيدُوا الْحَقّ الْيَقْدَرْ يِنَجِّيهُمْ. 11وَ أَشَانْ دَا، اللّٰهْ يِنَزِّلْ فِي فِكِرْهُمْ وَهَمْ الْيَمْلُكْهُمْ وَ يُغُشُّهُمْ أَشَانْ يِآمُنُوا بِالْكِدِبْ. 12وَ بِمِثِلْ دَا، كُلَّ النَّاسْ الْمَا آمَنَوْا بِالْحَقّ وَ لَاكِنْ فِرْحَوْا بِعَمَلْ الشَّرّ، الْحُكُمْ وَ الْعَذَابْ يَجُوا فَوْقهُمْ.

أقْعُدوا ثابْتين

13لَاكِنْ، يَا أَخْوَانِي الرَّبِّنَا يِحِبُّكُو، وَاجِبْ نَشْكُرُوا اللّٰهْ دَايْماً فِي شَانْكُو إِنْتُو. اللّٰهْ عَزَلَاكُو مِنْ الْأَوَّلْ أَشَانْ يِنَجِّيكُو وَ يِسَوِّيكُو صَالِحِينْ بِعَمَلْ الرُّوحْ الْقُدُّوسْ. وَ دَا يَبْقَى أَشَانْ إِنْتُو آمَنْتُوا بِالْحَقّ. 14وَ فِي شَانْ دَا، اللّٰهْ نَادَاكُو بِالْبِشَارَةْ الْبَلَّغْنَاهَا لَيْكُو لِتَدْخُلُوا فِي مَجْد رَبِّنَا عِيسَى الْمَسِيحْ.

15وَ بِمِثِلْ دَا، يَا أَخْوَانِي، أَقْعُدُوا ثَابْتِينْ وَ أَكُرْبُوا قَوِي التَّعْلِيمْ الْعَلَّمْنَاهْ لَيْكُو، كَنْ مِنْ الْكَلَامْ الْقُلْنَاهْ لَيْكُو بِخُشُومْنَا وَلَّا مِنْ الْكَلَامْ الْكَتَبْنَاهْ لَيْكُو فِي جَوَابَاتْنَا.

16وَ خَلَاصْ، نَسْأَلَوْا لَيْكُو رَبِّنَا عِيسَى الْمَسِيحْ ذَاتَهْ وَ اللّٰهْ أَبُونَا الْحَبَّانَا وَ بِرَحْمَتَهْ، أَنْطَانَا شَجَاعَةْ أَبَدِيَّةْ وَ عَشَمْ كَبِيرْ. 17خَلِّي يِشَجِّعْكُو بِزِيَادَةْ وَ يَنْطِيكُو قُدْرَةْ أَشَانْ تِسَوُّوا دَايْماً الْخَيْر فِي كَلَامْكُو وَ عَمَلْكُو.

Currently Selected:

2 تَسَلونِيكِي 2: ع.د.ت19

Highlight

Copy