2 كُرُنْتُس 9

الجود و المُساعدة الواجِب

1وَ بِالصَّحِيحْ، مَا وَاجِبْ لَيِّ نَكْتِبْ لَيْكُو فِي الشَّيّءْ الْبُخُصّ الْمُسَاعَدَةْ النِّدَوْرُوا نِوَدُّوهَا لِلْأَخْوَانْ الصَّالِحِينْ الْفِي مَدِينَةْ الْقُدُسْ. 2أَنَا نَعَرِفْ نِيِّتْكُو شَدِيدَةْ. وَ أَنَا حَجَّيْت بَيْهَا بِرَاسِي مَرْفُوعْ لِأَخْوَانَّا الْهِنِي فِي مَقِدُونِيَةْ وَ قُلْت لَيْهُمْ كَدَرْ إِنْتُو الْفِي أَخَايَةْ جَاهِزِينْ مِنْ السَّنَةْ الْفَاتَتْ. وَ خَبَرْ هَنَا حَمِيصِتْكُو شَجَّعْ كَتِيرِينْ مِنْهُمْ أَشَانْ يَنْطُوا.

3وَ هَسَّعْ رَسَّلْت الْأَخْوَانْ التَّلَاتَةْ دَوْل بِالْجَوَابْ دَا أَشَانْ نِأَكِّدْ كَدَرْ الْكَلَامْ الْقُلْتَهْ فِي نِيِّتْكُو مَا يَبْقَى كِدِبْ. نِدَوْر إِنْتُو تَبْقَوْا جَاهِزِينْ مِثِلْ أَنَا أَوَّلْ قُلْتَهْ. 4كَنْ نَجِيكُو مَعَ أَخْوَانْ وَاحِدِينْ مِنْ مَقِدُونِيَةْ وَ إِنْتُو مَا جَاهِزِينْ، الْعَيْب يِسَوِّينَا أَشَانْ عَشَمْنَا فَوْقكُو فَشَلْ. وَ الْعَيْب يِسَوِّيكُو إِنْتُو كُلَ زِيَادَةْ. 5أَشَانْ دَا، فِي فِكْرِي أَنَا وَاجِبْ نِوَصِّي الْأَخْوَانْ دَوْل يَمْشُوا لَيْكُو قِدَّامِي وَ يِنَظُّمُوا مَعَاكُو عَطِيِّتْكُو الْقُلْتُوا تَنْطُوهَا بِجُودْ. وَ مِثِلْ دَا وَكِتْ نَجُوا، الْعَطِيَّةْ تُكُونْ جَاهِزَةْ وَ تَنْطُوهَا لَيْنَا بِنِيِّتْكُو وَ مَا مِثِلْ جَبَرْنَاكُو جَبَرَانْ.

6وَ مَا تَنْسَوْا كَدَرْ النَّادُمْ الْيِتَيْرِبْ شِيَّةْ يَقْطَعْ شِيَّةْ وَ الْيِتَيْرِبْ كَتِيرْ يَقْطَعْ كَتِيرْ. 7خَلِّي أَيِّ نَادُمْ مِنْكُو يَنْطِي حَسَبْ النِّيَّةْ الشَّالَاهَا فِي قَلْبَهْ. خَلِّي مَا يَنْطِي شَيّءْ بَلَا نِيّتَهْ وَ مَا مِثِلْ نَادُمْ عَصَرَوْه عَصَرَانْ أَشَانْ اللّٰهْ يِحِبّ النَّادُمْ الْيَنْطِي بِفَرَحْ. 8وَ اللّٰهْ يَقْدَرْ يَنْطِيكُو رَحْمَةْ بِزِيَادَةْ لَحَدِّي فِي أَيِّ وَكِتْ عِنْدُكُو الْيَكْفِي لَيْكُو أَشَانْ تِشَارُكُوا زِيَادَةْ فِي أَيِّ عَمَلْ هَنَا خَيْر. 9وَ يَبْقَى مِثِلْ الْكَلَامْ الْمَكْتُوبْ فِي الْكِتَابْ الْبُقُولْ فِي النَّادُمْ الصَّالِحْ: <هُو يَنْطِي لِلْمَسَاكِينْ بِجُودْ وَ عَدَالْتَهْ تَقْعُدْ دَايْماً.>#9‏:9 الكلام دا تلقوه في زَبُور 112‏:9.

10وَ اللّٰهْ الْيَنْطِي التَّيْرَابْ لِلْحَرَّاتِي وَ مَعَاشْ لِلنَّاسْ، هُو يِكَتِّرْ لَيْكُو تَيْرَابْكُو أَشَانْ تَلْقَوْا كَتِيرْ وَ تَنْطُوا زِيَادَةْ وَ يِزِيدْكُو بَرَكَةْ. 11وَ اللّٰهْ يِزِيدْ لَيْكُو كُلِّ شَيّءْ أَشَانْ أَنْطَيْتُوا بِجُودْ وَ وَكِتْ نِوَدُّوا عَطِيِّتْكُو لِمَدِينَةْ الْقُدُسْ، النَّاسْ يَشْكُرُوا اللّٰهْ. 12أَشَانْ الْخِدْمَةْ التِّسَوُّوهَا لِلّٰهْ دِي مَا تِسَاعِدْ الصَّالِحِينْ الْحَوْجَانِينْ بَسْ. هِي تِكَتِّرْ الشُّكُرْ الْيِقَدُّمُوهْ النَّاسْ لِلّٰهْ كُلَ.

13وَ نَاسْ كَتِيرِينْ يِمَجُّدُوا اللّٰهْ. أَشَانْ الْخِدْمَةْ دِي، هِي الدَّلِيلْ الْيِوَصِّفْ كَدَرْ إِنْتُو مُؤمِنِينْ بِبِشَارَةْ الْمَسِيحْ وَ تِتَابُعُوهْ عَدِيلْ. وَ يِمَجُّدُوا اللّٰهْ أَشَانْ أَنْطَيْتُوهُمْ وَ أَنْطَيْتُوا لِنَاسْ آخَرِينْ بِجُودْ. 14وَ يَسْأَلَوْا اللّٰهْ لَيْكُو وَ يِرِيدُوكُو بِمَحَبَّةْ شَدِيدَةْ بِسَبَبْ رَحْمَةْ اللّٰهْ الْعَظِيمَةْ الْأَنْطَاهَا لَيْكُو. 15وَ الْحَمْدُ للّٰهْ! الْعَطِيَّةْ الْهُو أَنْطَاهَا، مَا فِي شَيّءْ يِقَادِرْهَا.

Currently Selected:

2 كُرُنْتُس 9: ع.د.ت19

Highlight

Copy