1 كُرُنْتُس 1
1
1جَوَابْ مِنِّي أَنَا بُولُسْ الْاللّٰهْ نَادَانِي أَشَانْ نَبْقَى بِإِذْنَهْ رَسُولْ هَنَا عِيسَى الْمَسِيحْ. وَ دَاهُو نَكْتِبْ لَيْكُو مَعَ أَخُونَا سُوسْتَانْ. 2وَ نِسَلُّمُوكُو إِنْتُو جَمَاعَةْ الْمُؤمِنِينْ هَنَا اللّٰهْ الْقَاعِدِينْ فِي حِلَّةْ كُرُنْتُسْ، إِنْتُو الْاللّٰهْ خَصَّصَاكُو بِعَلَاقِتْكُو مَعَ الْمَسِيحْ عِيسَى. اللّٰهْ نَادَاكُو فِي دَرْبَهْ أَشَانْ تَبْقَوْا خَاصِّينْ سَوَا مَعَ كُلَّ النَّاسْ الْيَدْعُوا فِي أَيِّ بَكَانْ بِأُسُمْ رَبِّنَا عِيسَى الْمَسِيحْ وَ هُو رَبُّهُمْ وَ رَبِّنَا. 3عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.
4نَشْكُرْ اللّٰهْ دَايْماً فِي شَانْكُو وَ فِي شَانْ الرَّحْمَةْ الْهُو أَنْطَاكُو بِعَلَاقِتْكُو مَعَ الْمَسِيحْ عِيسَى. 5وَ بِعَلَاقِتْكُو مَعَايَهْ، اللّٰهْ بَارَكَاكُو وَ أَنْطَاكُو كُلَّ شَيّءْ وَ أَنْطَاكُو كُلَّ مَعْرَفَةْ الْكَلَامْ وَ كُلَّ الْعِلِمْ. 6وَ مِثِلْ دَا، اللّٰهْ ثَبَّتْ أَمْبَيْنَاتْكُو شَهَادِتْنَا الشَّهَدْنَا بَيْهَا لِلْمَسِيحْ. 7وَ فِي شَانْ دَا بَسْ، مَا فِي أَيِّ بَرَكَةْ مِنْ بَرَكَاتْ الرُّوحْ الْقُدُّوسْ الْقَصَّرَتْ لَيْكُو، إِنْتُو الْقَاعِدِينْ تَرْجَوْا الْيَوْم الْاللّٰهْ يِبَيِّنْ فَوْقَهْ رَبِّنَا عِيسَى الْمَسِيحْ. 8الْمَسِيحْ يَحْفَضْكُو لَحَدِّي فِي الْآخِرَةْ. أَشَانْ دَا، فِي يَوْم جَيَّةْ رَبِّنَا عِيسَى الْمَسِيحْ، تُكُونُوا بَلَا عَيْب. 9اللّٰهْ هُو صَادِقْ فِي وَعَدَهْ. وَ هُو بَسْ النَّادَاكُو أَشَانْ تَدْخُلُوا فِي الْعَلَاقَةْ الْعِنْدُكُو مَعَ إِبْنَهْ عِيسَى الْمَسِيحْ رَبِّنَا.
المُؤمِنين ما ينْقسْموا
10يَا أَخْوَانِي، أَنَا نِوَصِّيكُو بِأُسُمْ رَبِّنَا عِيسَى الْمَسِيحْ أَشَانْ كَلَامْكُو يَبْقَى وَاحِدْ لَحَدِّي مَا تِنْقَسْمُوا. وَ خَلِّي قَلِبْكُو يَبْقَى وَاحِدْ وَ فِكِرْكُو يَبْقَى وَاحِدْ. 11يَا أَخْوَانِي، أَنَا قُلْت الْكَلَامْ دَا أَشَانْ نَاسْ وَاحِدِينْ مِنْ بَيْت أَخُتْكُو خُلُوَةْ أَوْرَوْنِي كَدَرْ إِنْتُو قَاعِدِينْ تِلْغَالَطَوْا أَمْبَيْنَاتْكُو. 12وَ أَيِّ نَادُمْ مِنْكُو قَاعِدْ يُقُولْ: «أَنَا نَادُمْ هَنَا بُولُسْ» أَوْ «أَنَا هَنَا أَبُلُوسْ» أَوْ «أَنَا هَنَا بُطْرُسْ» أَوْ «أَنَا هَنَا الْمَسِيحْ.»
13هَايْ! الْمَسِيحْ دَا وَاحِدْ وَلَّا مُقَسَّمْ؟ بُولُسْ دَا مَاتْ فِي الصَّلِيبْ فِي شَانْكُو وَلَّا؟ وَ غَطَّسَوْكُو بِأُسُمْ بُولُسْ وَلَّا؟ أَكِيدْ، لَا! 14وَ أَنَا مَا غَطَّسْت أَيِّ نَادُمْ مِنْكُو إِلَّا كِرِيسْبُسْ وَ غَايُسْ. وَ أَشَانْ دَا، نُقُولْ الْحَمْدُ للّٰهْ. 15وَ بَيْدَا، مَا فِي نَادُمْ الْيَقْدَرْ يُقُولْ هُو غَطَّسَوْه بِأُسْمِي أَنَا. 16أَيْوَى، أَنَا غَطَّسْت نَاسْ بَيْت إِسْتِفَانْ كُلَ. لَاكِنْ مَا نَعَرِفْ كَنْ فِي نَادُمْ آخَرْ أَمْبَيْنَاتْكُو أَنَا غَطَّسْتَهْ. 17وَ الْمَسِيحْ رَسَّلَانِي مَا أَشَانْ نِغَطِّسْ النَّاسْ لَاكِنْ أَشَانْ نِبَلِّغْ لَيْهُمْ بِشَارْتَهْ. وَ مَا نِبَلِّغْهَا مِثِلْ الْعُلَمَاءْ الْيِبَلُّغُوا فِكِرْهُمْ بِكَلَامْ حَلُو. نِبَلِّغْ مَوْت الْمَسِيحْ فِي الصَّلِيبْ أَشَانْ الصَّلِيبْ كُلَ عِنْدَهْ قُدْرَةْ الْخَاصَّةْ بَيَّهْ.
حكمة اللّه و قُدْرة اللّه
18صَحِيحْ، النَّاسْ الْمُوَدِّرِينْ يُقُولُوا كَدَرْ كَلَامْنَا فِي الصَّلِيبْ كَلامْ بَاطِلْ. لَاكِنْ لَيْنَا أَنِحْنَ الْاللّٰهْ قَاعِدْ يِنَجِّينَا، كَلَامْ هَنَا الصَّلِيبْ عِنْدَهْ قُدْرَةْ اللّٰهْ. 19وَ فَكُّرُوا فِي الْكَلَامْ الْاللّٰهْ قَالَهْ فِي الْكِتَابْ: <حِكْمَةْ الْحُكُمَاءْ نِوَدِّرْهَا وَ فِهِمْ الْفَاهِمِينْ يَبْقَى مَا فِيهْ.>#1:19 الكلام دا تلقوه في إشَعْيا 29:14.
20وَ هَسَّعْ دَا، وَيْن الْحَكِيمْ؟ وَيْن الْعَالِمْ؟ وَيْن الْمُتَكَلِّمْ الْيِرِيدُوهْ نَاسْ الدُّنْيَا؟ خَلَاصْ، اللّٰهْ وَصَّفْ كَدَرْ حِكْمَةْ نَاسْ الدُّنْيَا بَاطْلَةْ. 21أَشَانْ اللّٰهْ سَوَّى كُلَّ شَيّءْ حَسَبْ حِكْمَتَهْ وَ لَاكِنْ نَاسْ الدُّنْيَا مَا أَعْتَرَفَوْا بَيَّهْ. وَ خَلَاصْ اللّٰهْ شَالْ نِيَّةْ أَشَانْ يِنَجِّي النَّاسْ الْيِآمُنُوا بَيَّهْ بِطَرِيقْ الْبِشَارَةْ، حَتَّى كَانْ نَاسْ الدُّنْيَا يِشِيفُوهْ كَلامْ بَاطِلْ كُلَ. 22أَيْوَى، الْيَهُودْ يِدَوْرُوا يِشِيفُوا الْعَلَامَةْ التَّبْقَى لَيْهُمْ دَلِيلْ وَ الْيُونَانِيِّينْ يِفَتُّشُوا الْحَقّ بِحِكْمَةْ الدُّنْيَا 23لَاكِنْ أَنِحْنَ نِبَلُّغُوا لِكُلَّ النَّاسْ بِالْمَسِيحْ الْكَتَلَوْه فِي الصَّلِيبْ. وَ الْكَلَامْ دَا يِزَعِّلْ الْيَهُودْ وَ هُو كَلامْ بَاطِلْ لِلْيُونَانِيِّينْ.
24لَاكِنْ لِكُلَّ النَّاسْ الْاللّٰهْ نَادَاهُمْ فِي دَرْبَهْ، كَنْ مِنْ الْيَهُودْ وَلَّا مِنْ الْيُونَانِيِّينْ كُلَ، الْمَسِيحْ هُو قُدْرَةْ اللّٰهْ وَ حِكْمَةْ اللّٰهْ. 25وَ النَّاسْ يُقُولُوا حِكْمَةْ اللّٰهْ بَاطْلَةْ. لَاكِنْ حِكْمَةْ اللّٰهْ زِيَادَةْ مَرَّةْ وَاحِدْ مِنْ حِكْمِتْهُمْ. وَ يُقُولُوا قُدْرَةْ اللّٰهْ هِي ضَعِيفَةْ، لَاكِنْ قُدْرَةْ اللّٰهْ زِيَادَةْ مِنْ قُدْرَةْ النَّاسْ.
26وَ بِكَلَامْ آخَرْ، يَا أَخْوَانِي، فَكُّرُوا فِي حَالِتْكُو هِي كِكَّيْف قُبَّالْ اللّٰهْ مَا نَادَاكُو فِي دَرْبَهْ. أَوَّلْ دَا، نَاسْ شِيَّةْ مِنْكُو عِنْدُهُمْ حِكْمَةْ وَ شِيَّةْ مِنْكُو عِنْدُهُمْ قُدْرَةْ وَ شِيَّةْ مِنْكُو عِيَالْ كُبَارَاتْ. 27لَاكِنْ النَّاسْ الْجُهَّالْ حَسَبْ نَاسْ الدُّنْيَا، هُمَّنْ دَوْل بَسْ اللّٰهْ عَزَلَاهُمْ أَشَانْ يِجِيبْ الْعَيْب فِي الْحُكُمَاءْ. وَ النَّاسْ الْمَا عِنْدُهُمْ قُدْرَةْ حَسَبْ نَاسْ الدُّنْيَا، هُمَّنْ دَوْل اللّٰهْ عَزَلَاهُمْ أَشَانْ يِجِيبْ الْعَيْب فِي الْقَادْرِينْ. 28أَيْوَى، اللّٰهْ عَزَلْ النَّاسْ الْمَسَاكِينْ وَ الْمَحْقُورِينْ وَ الْمَا عِنْدُهُمْ فَايْدَةْ حَسَبْ نَاسْ الدُّنْيَا، أَشَانْ يِبَطِّلْ فَايْدَةْ النَّاسْ الْيُقُولُوا هُمَّنْ بَسْ عِنْدُهُمْ فَايْدَةْ. 29وَ خَلَاصْ، مَا فِي إِنْسَانْ عِنْدَهْ حَقّ يِسَوِّي نَفْسَهْ كَبِيرْ قِدَّامْ اللّٰهْ.
30وَ اللّٰهْ بَسْ الْأَنْطَاكُو الْعَلَاقَةْ الْعِنْدُكُو مَعَ الْمَسِيحْ عِيسَى. وَ بِالْمَسِيحْ بَسْ، نَلْقَوْا حِكْمَةْ اللّٰهْ. وَ بِالْمَسِيحْ بَسْ، اللّٰهْ جَعَلَانَا صَالِحِينْ وَ خَصَّصَانَا وَ فَدَانَا. 31وَ أَشَانْ دَا، خَلِّي نِتَابُعُوا الْكَلَامْ الْمَكْتُوبْ فِي الْكِتَابْ: <خَلِّي نَادُمْ مَا يِسَوِّي نَفْسَهْ كَبِيرْ. أَخَيْر يُقُولْ اللّٰهْ بَسْ كَبِيرْ.>#1:31 الكلام دا تلقوه في إرْمِيا 9:24.
Currently Selected:
1 كُرُنْتُس 1: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
1 كُرُنْتُس 1
1
1جَوَابْ مِنِّي أَنَا بُولُسْ الْاللّٰهْ نَادَانِي أَشَانْ نَبْقَى بِإِذْنَهْ رَسُولْ هَنَا عِيسَى الْمَسِيحْ. وَ دَاهُو نَكْتِبْ لَيْكُو مَعَ أَخُونَا سُوسْتَانْ. 2وَ نِسَلُّمُوكُو إِنْتُو جَمَاعَةْ الْمُؤمِنِينْ هَنَا اللّٰهْ الْقَاعِدِينْ فِي حِلَّةْ كُرُنْتُسْ، إِنْتُو الْاللّٰهْ خَصَّصَاكُو بِعَلَاقِتْكُو مَعَ الْمَسِيحْ عِيسَى. اللّٰهْ نَادَاكُو فِي دَرْبَهْ أَشَانْ تَبْقَوْا خَاصِّينْ سَوَا مَعَ كُلَّ النَّاسْ الْيَدْعُوا فِي أَيِّ بَكَانْ بِأُسُمْ رَبِّنَا عِيسَى الْمَسِيحْ وَ هُو رَبُّهُمْ وَ رَبِّنَا. 3عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.
4نَشْكُرْ اللّٰهْ دَايْماً فِي شَانْكُو وَ فِي شَانْ الرَّحْمَةْ الْهُو أَنْطَاكُو بِعَلَاقِتْكُو مَعَ الْمَسِيحْ عِيسَى. 5وَ بِعَلَاقِتْكُو مَعَايَهْ، اللّٰهْ بَارَكَاكُو وَ أَنْطَاكُو كُلَّ شَيّءْ وَ أَنْطَاكُو كُلَّ مَعْرَفَةْ الْكَلَامْ وَ كُلَّ الْعِلِمْ. 6وَ مِثِلْ دَا، اللّٰهْ ثَبَّتْ أَمْبَيْنَاتْكُو شَهَادِتْنَا الشَّهَدْنَا بَيْهَا لِلْمَسِيحْ. 7وَ فِي شَانْ دَا بَسْ، مَا فِي أَيِّ بَرَكَةْ مِنْ بَرَكَاتْ الرُّوحْ الْقُدُّوسْ الْقَصَّرَتْ لَيْكُو، إِنْتُو الْقَاعِدِينْ تَرْجَوْا الْيَوْم الْاللّٰهْ يِبَيِّنْ فَوْقَهْ رَبِّنَا عِيسَى الْمَسِيحْ. 8الْمَسِيحْ يَحْفَضْكُو لَحَدِّي فِي الْآخِرَةْ. أَشَانْ دَا، فِي يَوْم جَيَّةْ رَبِّنَا عِيسَى الْمَسِيحْ، تُكُونُوا بَلَا عَيْب. 9اللّٰهْ هُو صَادِقْ فِي وَعَدَهْ. وَ هُو بَسْ النَّادَاكُو أَشَانْ تَدْخُلُوا فِي الْعَلَاقَةْ الْعِنْدُكُو مَعَ إِبْنَهْ عِيسَى الْمَسِيحْ رَبِّنَا.
المُؤمِنين ما ينْقسْموا
10يَا أَخْوَانِي، أَنَا نِوَصِّيكُو بِأُسُمْ رَبِّنَا عِيسَى الْمَسِيحْ أَشَانْ كَلَامْكُو يَبْقَى وَاحِدْ لَحَدِّي مَا تِنْقَسْمُوا. وَ خَلِّي قَلِبْكُو يَبْقَى وَاحِدْ وَ فِكِرْكُو يَبْقَى وَاحِدْ. 11يَا أَخْوَانِي، أَنَا قُلْت الْكَلَامْ دَا أَشَانْ نَاسْ وَاحِدِينْ مِنْ بَيْت أَخُتْكُو خُلُوَةْ أَوْرَوْنِي كَدَرْ إِنْتُو قَاعِدِينْ تِلْغَالَطَوْا أَمْبَيْنَاتْكُو. 12وَ أَيِّ نَادُمْ مِنْكُو قَاعِدْ يُقُولْ: «أَنَا نَادُمْ هَنَا بُولُسْ» أَوْ «أَنَا هَنَا أَبُلُوسْ» أَوْ «أَنَا هَنَا بُطْرُسْ» أَوْ «أَنَا هَنَا الْمَسِيحْ.»
13هَايْ! الْمَسِيحْ دَا وَاحِدْ وَلَّا مُقَسَّمْ؟ بُولُسْ دَا مَاتْ فِي الصَّلِيبْ فِي شَانْكُو وَلَّا؟ وَ غَطَّسَوْكُو بِأُسُمْ بُولُسْ وَلَّا؟ أَكِيدْ، لَا! 14وَ أَنَا مَا غَطَّسْت أَيِّ نَادُمْ مِنْكُو إِلَّا كِرِيسْبُسْ وَ غَايُسْ. وَ أَشَانْ دَا، نُقُولْ الْحَمْدُ للّٰهْ. 15وَ بَيْدَا، مَا فِي نَادُمْ الْيَقْدَرْ يُقُولْ هُو غَطَّسَوْه بِأُسْمِي أَنَا. 16أَيْوَى، أَنَا غَطَّسْت نَاسْ بَيْت إِسْتِفَانْ كُلَ. لَاكِنْ مَا نَعَرِفْ كَنْ فِي نَادُمْ آخَرْ أَمْبَيْنَاتْكُو أَنَا غَطَّسْتَهْ. 17وَ الْمَسِيحْ رَسَّلَانِي مَا أَشَانْ نِغَطِّسْ النَّاسْ لَاكِنْ أَشَانْ نِبَلِّغْ لَيْهُمْ بِشَارْتَهْ. وَ مَا نِبَلِّغْهَا مِثِلْ الْعُلَمَاءْ الْيِبَلُّغُوا فِكِرْهُمْ بِكَلَامْ حَلُو. نِبَلِّغْ مَوْت الْمَسِيحْ فِي الصَّلِيبْ أَشَانْ الصَّلِيبْ كُلَ عِنْدَهْ قُدْرَةْ الْخَاصَّةْ بَيَّهْ.
حكمة اللّه و قُدْرة اللّه
18صَحِيحْ، النَّاسْ الْمُوَدِّرِينْ يُقُولُوا كَدَرْ كَلَامْنَا فِي الصَّلِيبْ كَلامْ بَاطِلْ. لَاكِنْ لَيْنَا أَنِحْنَ الْاللّٰهْ قَاعِدْ يِنَجِّينَا، كَلَامْ هَنَا الصَّلِيبْ عِنْدَهْ قُدْرَةْ اللّٰهْ. 19وَ فَكُّرُوا فِي الْكَلَامْ الْاللّٰهْ قَالَهْ فِي الْكِتَابْ: <حِكْمَةْ الْحُكُمَاءْ نِوَدِّرْهَا وَ فِهِمْ الْفَاهِمِينْ يَبْقَى مَا فِيهْ.>#1:19 الكلام دا تلقوه في إشَعْيا 29:14.
20وَ هَسَّعْ دَا، وَيْن الْحَكِيمْ؟ وَيْن الْعَالِمْ؟ وَيْن الْمُتَكَلِّمْ الْيِرِيدُوهْ نَاسْ الدُّنْيَا؟ خَلَاصْ، اللّٰهْ وَصَّفْ كَدَرْ حِكْمَةْ نَاسْ الدُّنْيَا بَاطْلَةْ. 21أَشَانْ اللّٰهْ سَوَّى كُلَّ شَيّءْ حَسَبْ حِكْمَتَهْ وَ لَاكِنْ نَاسْ الدُّنْيَا مَا أَعْتَرَفَوْا بَيَّهْ. وَ خَلَاصْ اللّٰهْ شَالْ نِيَّةْ أَشَانْ يِنَجِّي النَّاسْ الْيِآمُنُوا بَيَّهْ بِطَرِيقْ الْبِشَارَةْ، حَتَّى كَانْ نَاسْ الدُّنْيَا يِشِيفُوهْ كَلامْ بَاطِلْ كُلَ. 22أَيْوَى، الْيَهُودْ يِدَوْرُوا يِشِيفُوا الْعَلَامَةْ التَّبْقَى لَيْهُمْ دَلِيلْ وَ الْيُونَانِيِّينْ يِفَتُّشُوا الْحَقّ بِحِكْمَةْ الدُّنْيَا 23لَاكِنْ أَنِحْنَ نِبَلُّغُوا لِكُلَّ النَّاسْ بِالْمَسِيحْ الْكَتَلَوْه فِي الصَّلِيبْ. وَ الْكَلَامْ دَا يِزَعِّلْ الْيَهُودْ وَ هُو كَلامْ بَاطِلْ لِلْيُونَانِيِّينْ.
24لَاكِنْ لِكُلَّ النَّاسْ الْاللّٰهْ نَادَاهُمْ فِي دَرْبَهْ، كَنْ مِنْ الْيَهُودْ وَلَّا مِنْ الْيُونَانِيِّينْ كُلَ، الْمَسِيحْ هُو قُدْرَةْ اللّٰهْ وَ حِكْمَةْ اللّٰهْ. 25وَ النَّاسْ يُقُولُوا حِكْمَةْ اللّٰهْ بَاطْلَةْ. لَاكِنْ حِكْمَةْ اللّٰهْ زِيَادَةْ مَرَّةْ وَاحِدْ مِنْ حِكْمِتْهُمْ. وَ يُقُولُوا قُدْرَةْ اللّٰهْ هِي ضَعِيفَةْ، لَاكِنْ قُدْرَةْ اللّٰهْ زِيَادَةْ مِنْ قُدْرَةْ النَّاسْ.
26وَ بِكَلَامْ آخَرْ، يَا أَخْوَانِي، فَكُّرُوا فِي حَالِتْكُو هِي كِكَّيْف قُبَّالْ اللّٰهْ مَا نَادَاكُو فِي دَرْبَهْ. أَوَّلْ دَا، نَاسْ شِيَّةْ مِنْكُو عِنْدُهُمْ حِكْمَةْ وَ شِيَّةْ مِنْكُو عِنْدُهُمْ قُدْرَةْ وَ شِيَّةْ مِنْكُو عِيَالْ كُبَارَاتْ. 27لَاكِنْ النَّاسْ الْجُهَّالْ حَسَبْ نَاسْ الدُّنْيَا، هُمَّنْ دَوْل بَسْ اللّٰهْ عَزَلَاهُمْ أَشَانْ يِجِيبْ الْعَيْب فِي الْحُكُمَاءْ. وَ النَّاسْ الْمَا عِنْدُهُمْ قُدْرَةْ حَسَبْ نَاسْ الدُّنْيَا، هُمَّنْ دَوْل اللّٰهْ عَزَلَاهُمْ أَشَانْ يِجِيبْ الْعَيْب فِي الْقَادْرِينْ. 28أَيْوَى، اللّٰهْ عَزَلْ النَّاسْ الْمَسَاكِينْ وَ الْمَحْقُورِينْ وَ الْمَا عِنْدُهُمْ فَايْدَةْ حَسَبْ نَاسْ الدُّنْيَا، أَشَانْ يِبَطِّلْ فَايْدَةْ النَّاسْ الْيُقُولُوا هُمَّنْ بَسْ عِنْدُهُمْ فَايْدَةْ. 29وَ خَلَاصْ، مَا فِي إِنْسَانْ عِنْدَهْ حَقّ يِسَوِّي نَفْسَهْ كَبِيرْ قِدَّامْ اللّٰهْ.
30وَ اللّٰهْ بَسْ الْأَنْطَاكُو الْعَلَاقَةْ الْعِنْدُكُو مَعَ الْمَسِيحْ عِيسَى. وَ بِالْمَسِيحْ بَسْ، نَلْقَوْا حِكْمَةْ اللّٰهْ. وَ بِالْمَسِيحْ بَسْ، اللّٰهْ جَعَلَانَا صَالِحِينْ وَ خَصَّصَانَا وَ فَدَانَا. 31وَ أَشَانْ دَا، خَلِّي نِتَابُعُوا الْكَلَامْ الْمَكْتُوبْ فِي الْكِتَابْ: <خَلِّي نَادُمْ مَا يِسَوِّي نَفْسَهْ كَبِيرْ. أَخَيْر يُقُولْ اللّٰهْ بَسْ كَبِيرْ.>#1:31 الكلام دا تلقوه في إرْمِيا 9:24.
Currently Selected:
:
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019