2 Yuuhanna 1
1
1Jawaab minni ana al-cheekh leeki inti al-sayyida al-Allah azalaaki, leeki inti wa iyaalki#1:1 al-sayyida al-Allah azalaaki wa iyaalki Al-kilme «al-sayyida» maʼanaatha jamaaʼat al-muʼminiin wa l-kilme «iyaalki» maʼanaatha humman al-Masiihiyiin al-yikawwunu al-jamaaʼa di. al-nihibbuku fi l-hagg. Wa ma ana wiheedi nihibbuku. Kulla l-naas al-yaʼarfu al-hagg yihibbuuku. 2Wa nihibbuku be sabab al-hagg al-gaaʼid saabit foogna wa l-yagood maʼaana ila l-abad. 3Akiid al-salaam wa l-niʼma wa l-rahma al-jaayiin min abuuna Allah wa min Ibn abuuna, Isa al-Masiih, yagoodu maʼaana be l-hagg wa be l-mahabba.
4Ana bigiit farhaan marra waahid wakit lammeet maʼa waahidiin min iyaalki wa chiftuhum maachiin fi l-hagg misil abuuna amaraana beyah.
5Ya l-sayyida, nidoor natlub minki cheyy waahid. Ma naktib leeki wasiiye jadiide. Al-wasiiye di simiʼnaaha min al-bidaaya wa hi waajib nirraayado ambeenaatna. 6Kan nitaabuʼu wasaaya Rabbina, khalaas di bas al-mahabba. Wa hi bas al-wasiiye wa hi nafs al-kalaam al-simiʼtuuh min al-awwal wa waajib titaabuʼuuha.
7Khachchaachiin katiiriin gammo yuruukhu fi l-dunya. Humman yaabo ma yachhado kadar Isa al-Masiih bigi insaani wakit ja fi l-dunya. Al-naadum al-yuguul kalaam misil da, hu khachchaach wa adu al-Masiih. 8Angarʼu achaan al-ajur al-yaji be sabab amalku ma yiwaddir. Chiddu heelku achaan talgo ajurku kaamil. 9Ayyi naadum al-ma yagood saabit fi taʼliim al-Masiih wa laakin yiziid fi taʼliim al-Masiih kalaam jadiid, Allah ma maʼaayah. Al-naadum al-gaaʼid saabit fi l-taʼliim, hu bas al-naadum al-abuuna Allah gaaʼid maʼaayah wa Ibn Allah kula gaaʼid maʼaayah.
10Kan naadum buguul hu Masiihi wa yaji leeku wa kalaamah ma yiwaafig le l-taʼliim da, ma tidayyufuuh wa ma tisallumuuh kula. 11Achaan al-naadum al-yisallimah bigi misil hu yiʼaawinah fi amalah al-fasil.
12Fi kalaam katiir nidoor niʼooriiku beyah wa laakin ma nidoor naktibah leeku fi jawaab. Ana nitmanna namchi leeku wa nilimmu wa nihajju ambeenaatna achaan nafraho sawa wa farahna yabga tamaam. 13Iyaal akhutki al-Allah azalaaha yisallumuuki.
Currently Selected:
2 Yuuhanna 1: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.