Zerusâlɛŋ Karáa Maa Wɔ̂lɔ-wooi 1
1
Zerusâlɛŋ ŋɔmaloŋ too-maai
1Zerusâlɛŋ lâai léŋ ŋí a vóloi,
nyii ǹáa è kɛ̀ a vɛ́ɛ a núui?
A kɛ́ léŋ ŋí yɛ̂ɛ pɔɔ-nɛnii,
ǹyaai kɛ̀ a gɛ́tɛ ǹɔii-ŋûŋ-ŋai sámai?
Ǹyaai kɛ̀ a kâloŋ-nɛni ǹɔii-ŋûŋ-ŋai mɛni mai,
aâ kɛ́ a luɛ.
2A gbêɣei toôi kpɔ́ a ŋánaa a kpíni kélee ŋ̀ɛ́i-ya kɛ́ yèŋ a ǹɛ̂ɣɛŋ.
Ŋɔwɛli kɛ́-maa-ƃelai dɔnɔ kpîŋ fé naa é ŋ̀aa nɛnɛ.
Díkelee da gíri, da kɛ́ a gbɔara-ƃela.
3Zuda-ƃelai dímɔ̃lɛ-laai da maa sɛŋ-soli maai pôlu ma,
da kɛ́ a lɔii da kpɛ́ni-ŋa su-ƃela.
Da kɛ́ lɔii da kpɛ́ni-ŋa su-ƃela sáma,
díkɛ̂i fé ma.
Díkpɔara-ƃelai da dímaa tínaŋ,
ǹyaŋ pere fé ŋɔ́nɔ díyêei dí pú.
4Zãiyɔŋ Ɣala-pɛrɛ Kɛ́tɛi lá perei a pú.
Núu da fé ŋɔ́nɔ pâi naa gûu-ŋai ŋ̀aa-see kɛ́ mɛni ma.
Zĩaŋ-ŋai lá a lɛɛ a vólo.
Zâla láa soŋ-ƃelai kɛ́-ƃelai dí kɛ́ ǹyiɛ.
Ǹɛnî-kpela-ŋai da malôŋ-see ƃôi.
Daa lêei káa mɛni kpɔ̂lu su.
5Ŋɔkpɔara-ƃelai da kɛ́ a m̀ɛi-ƃela. Lii-sɛlɛŋ fé ŋɔ́nɔ dîa.
Ɣâla Yâwɛɛ a lii-too pôlu támaa tɛ́ɛ bɔ́ ŋɔsɔnyɔ̂ŋ ŋánaai mɛni ma.
Ǹônii da kɛ́ a lɔii-ŋuŋ da kpɛ́ni-ŋa su-ƃela díkpɔara-ƃelai yêei.
6Zãiyɔŋ ŋɔkɛ́tɛ-laai a kùla ǹyêei.
Ŋɔnúu láa túɛ-ƃelai da kɛ́ yɛ̂ɛ pîlaŋ sua-ŋa ƃé dílaa mii kwaa ma fé ma.
Da lɛɛ pûi díkpɔara-ƃelai yêei kɔlɔ a kpɛɛ dîa.
7Zerusâlɛŋ kɛ́-pere pɔlɔi kíli è tòo ŋ̀á tãi è kɛ̀ la mɛni kpɔ̂lu da mɔ̃lɛ-laa sui.
Tãi è tòo la ŋɔkpɔara-ƃelai yêei,
núu da fé kɛ́ ní naa é kpɔŋ mâa tɛɛ bɔ́.
Ŋɔkpɔara-ƃelai dí ɣɛ̀lɛ m̀a zu-kara perei ma.
8Zerusâlɛŋ a sɔnyɔ̂ŋ kɛ́ a zu kɛ́tɛ.
M̀aa fé ŋɔ́nɔ waa ní.
Diai kɛ̀ ƃaa kɛ́-maa tɛɛ̂i bɔ́i, dífe ŋɔ́nɔ gɛ̂i tí,
kpɛ́ni fêi, da gaŋ káa.
A nyîɣɛi gɛ́ ŋ̀ɛi lòo ŋumɛ pere su.
9M̀aa lîƃi-pere a too pono ŋá.
Vé kpîŋ kpáaŋ ní kɛ̀ m̀ɛnii pâi kɛ̂i lai.
Berei è tòo la pôlui, è kɛ̀ a zu kɛ́tɛ.
Núu da fé kpáaŋ ní kɛ̀ m̀ɛni ma.
Gbɔara-ƃelai da ǹyée mɛi ɣále.
Ǹyaŋ a wɔ̂lɔi Ɣâla Yâwɛɛ ma a gɛɛ é m̀alôŋ káa.
10Ŋɔkpɔara-ƃelai dí ŋɔlaai kɛ kwaa-ŋai ma su kàra.
È díkàa dí kɛ́ lɔ̀ ŋɔkwaa ma waai ma,
ƃɛ́i Ɣâla Yâwɛɛ fé fáa ní kɛ̀ ma zɛ̃tai-ƃelai dí lɔ́ kɛ̀ naai.
11Ŋɔnûai da kɛ̀ díkɔnɔ̃ŋ kɔ̂rii, da kɛ̂ nyîɣɛi.
Da díkɔ̃liŋ kpanaŋ-ŋai maa fáleŋ a mii-sãa a gɛɛ dífulu-laai é lɛ́ɛ díyêei.
Díkɛ môi dîyɛ̂ɛi, “Yâwɛɛ, íyee sée ḿû, ŋa mɔ̃lɛ̂i.
12“Káai kélee ka tɛɛ ḿâi, ka ḿaa kpɛ́ɛ ḿî.
Mɛni kpɔ̂lu da káa naa dɛ́ɛ ŋ́ɔ̂i ma?
Yâwɛɛ a mɛni kpɔ̂lu láa ḿâ ŋɔlii ŋwânai su.
13“A ŋɔŋ kúla ŋ̀elei su a bú ḿâ.
Ŋ̀ɔŋ ŋí a ŋ́gerenîi ŋ́gbonôi-pere.
A ƃáre tɛ́ ḿberêi,
a ńzoŋ a ḿbîlaŋ.
A gɛ́ ŋa lɛɛ ńyãa tɔnɔ,
ŋ́gɛ foa a ɣele kélee.
14“A ŋásɔnyɔ̂ŋ kélee kpɛtɛ yɛ̂ɛ yɔlɛ a gbíniŋ a ŋ́gɔŋ.
Ǹyɔlɛi ŋí ŋɔwuyɛ a kɔlɔ kpɛɛ̂i ḿâ.
Ǹuu-namui a ńdɛɛ diai pɔ́ díyee tɛɛ̂i ḿâi.
15“Ǹuu-namui a ǹyée kúla ŋá kɔ́kɔ-ƃelai mû.
A gɛ́ kɔ́ kɔ́-ƃela da tɔɔ ŋányaŋ-kpa-ŋai dîa a gɛɛ dí dísu kara.
A ŋánûai Zuda-ƃelai lúaŋ yɛ̂ɛ da ŋwã̂ai lùŋ ŋwã̂ai lúaŋ kwaa ma.
16“M̀ɛnii ŋí ƃé ŋa wɔ̂lɔi la, ŋ́ɛi-ya kɛ́ yèŋ.
Núu da fé naa é ŋ́aa nɛnɛ, é pá ḿbɔ a kili-kɛ zu.
Ŋ́gbɔara-ƃelai da ńyee mɛi ɣále, ǹyaŋ ŋánûai da mɔ̃lɛ̂i.
17“Ŋa ńyee sãa, núu da fa pâ é kpɔŋ ḿâ.
Yâwɛɛ a gɛ́ nûa da tɔɔ ḿâ ƃéla kélee ma.
Da ńzoŋ yɛ̂ɛ sɛŋ maa liƃiɛɛ.
18“Yâwɛɛ teniŋ ƃôɔɔi, kɛ́lɛ fa ŋɔtɔ̂ŋ mɛi kâa.
Nûa, ka káwoli tɔ́ɔ ká berei káa ŋa mɔ̃lɛ̂i lai.
Ŋá nyáŋkpa-ŋai da kɛ́ a luɛ-ŋa lɔii-ŋuŋ da kpɛ́ni-ŋa su.
19“Ŋá ḿarâai tôli, kɛ́lɛ dí ŋ́ɛi lɛ̀ɛ perêi.
Zâla láa soŋ-ƃelai da ǹúu-pɔlɔ-ŋai da saa a puru daa-leei su.
Dí kɛ̀ tɛ̂i dí kɛ́ yèŋ díkɔnɔ̃ŋ mɛni ma a gɛɛ dí lɛ́ɛ ɣele ma.
20“Óo Yâwɛɛ, gáa berei ŋa mɔ̃lɛ̂i lai. Ŋa mɛni sôli kâai.
Maloŋ too-maa támaa káa ńii su kpɛ́ni fêi, ŋa tɔɔ yâ.
Da ŋánûai paâi daa lêei su da bɛ́rɛ-ŋai mu.
21“Nṹa da ńyiɣɛ woo mɛnîi kɛ́lɛ díta fé naa é ŋ́aa nɛnɛ.
Ŋ́gbɔara-ƃelai da ŋámɛni-solii maa mɛni mɛnîi.
Da lii-nɛ̃ɛ kulâi m̀ɛnii ya gɛ́ a ńyãai, m̀ɛni ma.
Yɛ̂ɛ berei í íkono tèe la ńyêei, dia máŋ díkula maa kɛ́ díwɔ̂ sɔnyɔ̂ŋ mɛni ma yɛ̂ɛ berei í gɛ̀ la a ńyãai.
22“Dísɔnyɔ̂ŋ-ŋai gula maa kɛ́ a dia.
Gɛ́ dí mɔ̃lɛ dísɔnyɔ̂ŋ mɛni ma yɛ̂ɛ berei ŋá mɔ̃lɛ̂i la ŋ́ɔ̂i sui.
Ŋa nyîɣɛi a ŋ̀ánaa ŋ́gɛ foa.”
Currently Selected:
Zerusâlɛŋ Karáa Maa Wɔ̂lɔ-wooi 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia