Temete Maa-ŋuŋ 1
1
La-ti-maa
1Ńyãa Pɔ̂ɔ, ŋ́gaa a Zîsɛ Kôrai ŋɔsia-nuu yɛ̂ɛ berei Kúƃalo-nuui Ɣâla è m̀o la Zîsɛ Kôrai sarâi nyíi gáa a kili-kɛ-zui.
2Ŋa gɔlɔi ŋí pɔ̃yɛ̂i yɛ̂, Temete, nyíi gáa a ŋátɔ̃yâ-loŋ naa-lai sui. Ƃɛlɛ-sêe, maloŋ-kâa, da lii-sêe dí kúla Kúnâŋ Ɣâla yêei da Kúnuu-namui Zîsɛ Kôrai dí pá ípɔ.
Lɛ́ɛ sɛŋ-lɛɛ maa-lia-woo
3Yɛ̂ɛ berei ŋá mò la yâ tãi ŋa kɛ̀ liî la Masadoniai, lɛɛ Ɛfesɛ a gɛ́ɛ í m̀ó zɛŋ-lɛ-ƃelai da-ni dîa a gɛ́ɛ dífe mɛni-sii da-kpɛni lɛ, 4kpaa máŋ, dífe díkpîŋ pu lɛ́ɛ-mɛni-pɔlɔ-ƃoɔ su da núu-suu pîlaŋ pere nyíi goɣâŋ fé mai. Mɛni-ŋai ŋí da pâ a mare-kɛɛ támaa nyíi-ŋai da Ɣâla ŋɔmɛni-kpɛtɛɛi lɛ́-mɛni kpera nyíi gáa laa-la sui. 5Ǹyaŋ mɛnii ŋí kwa m̀ôi ŋɔsapoi ƃa wɛli-kɛ-maa nyíi a kûla líi maa waa su da kili-ŋa-sia lɛ́lɛɛ e pɛlɛ tɔ̃yâ laa-la mai. 6Núu da-ni nyíi-ŋai da díkpîŋ kûla mɛni-ŋai ŋí mai da díkpîŋ pu mɛni-folo-ŋa ƃoɔ su díkîe-ni loai. 7Da ŋ̀wɛli a gɛ́ɛ díkɛ a dɔ̂ŋ ŋɔsɛŋ lɛ́-ƃela, kɛ́lɛ, dífa târe m̀ɛni-ŋai su díkaa m̀ôi, kpaa máŋ mɛni-ŋai díkaa lônoi gɛ pîlaŋ dîai.
8Ǹyaŋ ku gɔ́lɔŋ a gɛ́ɛ dɔ̂ŋ lɛ́lɛɛ̂i, à kɛ̀ núu à tíi kɛ̀ la pere sîi sã́a su. 9Fɛ̂ɛ ku táre nyíŋi su a gɛ́ɛ dɔ̂ŋ fé tɔ̃yâ-ƃela mɛni ma, kɛ́lɛ, gáa diai mɛni ma dífa dɔ̂ŋ mɛi kâai, dífa woo-mɛni kɛ̀i, diai dífe a Ɣâla-ƃelai, sɔnyɔ̂ŋ-ƃelai, diai dímaa fé waa ni, diai dífa ɣâla-sii kélee fɛlii, diai da dínâŋ-ni pàai, diai da dílee-ni pàai, diai da núu pàai, 10wulu-wulu kɛ-ƃela, zinâai da díkîe-ni kɛ̀ a nɛyâai, nuu-ŋuma-ƃela, lɛ́ɛ-ƃela, wôya-kperɔ mii-ƃela, da mɛni-ŋai kélee dífe dɔ̃yâ-sɛŋ-lɛɛi ŋɔperei mai, 11yɛ̂ɛ berei ǹûa-tɛɛ-Ɣalai ŋɔtuŋ lɛ́lɛɛi káa la nyíi folo-laa káa mai, nyíi dí ǹɛɛ ńyêei.
Pɔ̂ɔ ŋɔtíi
12Ǹúui wála-wala tɛ̀ɛ ḿbɔi, ŋa zɛɣɛ̂i fé. Maa-nuui ƃa Kúnuu-namui Zîsɛ Kôrai, kpɛ́ni fêi, è ŋ́gaa a núu sã́a é ńɛ ŋɔtíi kɛ́-mɛni ma. 13Berei máŋ ŋá wɔ́lɔ tɛ-ŋa-woo ƃò la é pîlaŋ mà ŋá gbɔara ŋá ŋ̀ɛ́i falai, kɛ́lɛ, ŋá maloŋ-kaa sɔlɔ ƃô ńyêei, kpɛ́ni fêi, mɛni-ŋai ŋa kɛ̀ gɛ̂i, fé kɛ́ ni a gɔ́lɔŋɔɔ. Laa-la fé kɛ́ ni ńyêei. 14Kúnuu-namui ŋɔƃɛlɛ-sêei è kɛ̀ a gɛ́tɛ ḿɛni ma da naa-lai e pɛlɛ ŋwɛli-kɛ-maai ma nyíi-ŋai díkaa Zîsɛ Kôrai kponôi. 15Mɛnii da mòi gáa a tɔ̃yâ. Maa nɛ̃ɛ̂i ku kúyêei see mu a gɛ́ɛ Zîsɛ Kôrai è pà ǹɔii su ƃɛ a gɛ́ɛ é sɔnyɔ̂ŋ-ƃela ƃálo. Ǹyaŋ ńyãa ƃa zɔnyɔ̂ŋ gɛ́tɛ-kɛ-nuu; 16kɛ́lɛ, ŋá maloŋ-kaa sɔlɔ ƃô ǹyêei sâpoi ŋí mɛni ma, a gɛ́ɛ Zîsɛ Kôrai é ŋɔlii-kpele maa waai lɛ́ ŋ́gbonôi a gɛ́ɛ é kɛ́ a mɛni-kɔɔŋ-maa diai mɛni ma kɛ̀ pâi lâai la wɔlɔ-wɔlɔ fulu-laa mɛni mai. 17Ŋwɔlɔ-wɔlɔ-Kaloŋ, nyíi va wɔlɔ saai, Ŋ̀âla tɔnɔi, nyíi núu fa gàai, ƃaa kɛ́-maa da fólo-laa dí kɛ́ ma wɔlɔ-wɔlɔ da wɔlɔ-wɔlɔ. É kɛ́ ti.
18Ŋa nyíŋi ƃôi yâ, ńoŋ Temete, yɛ̂ɛ berei mɛnii káa la nyíi Ɣâla ŋɔlóno-kɛ́-ƃelai dí mo e pîlaŋ yâi, a gɛ́ɛ dí íkɛ í namu lɛ́lɛɛ kɔ. 19Laa-la é kɛ́ íyeêi da kili-ŋa-sia lɛ́lɛɛ. Núu da-ni dí kili-ŋa-sia lɛ́lɛɛ kpɔara, ǹyaŋ maa-ƃelai da dílaa-lai lɛ́ɛ yâi. 20Ǹûai ŋí da ƃa Ɣaimɛneeyɔ da Alezaŋda, nyíi-ŋai ŋa dítɛ̀ɛ Sêtɔŋ pɔ a gɛ́ɛ dífe ŋɔ́nɔ tɛ-ŋa-woo ƃo e pîlaŋ Ɣâla mai.
Currently Selected:
Temete Maa-ŋuŋ 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia