Samia Maa-ŋuŋ 20
20
Zonetaŋ è kpɔŋ Deeƃé ma
1Deeƃé è pù é kúla Ɣâla ŋɔlóno kɛ́-ƃelai díkpanâŋ lá. È pà Zonetaŋ pɔ́-naa é m̀arê kɛ́ ǹyɛɛ m̀ai, “Lé mɛni ƃé ínâŋ Sɔ̂ɔ a ŋ̀wɛ̂lii é ḿbaa lai? Lé mɛni nyɔ́mɔɔ ƃé ŋá gɛ̀ lai?” 2Zonetaŋ ǹyɛɛ mai, “Ńâŋ fa pɔ̂ri gbɛtɛ̂i gíli ŋá a gɛ́ɛ é ípaa! Va mɛni da kɛ̀ ŋɛ́i pôlu. Lé mɛni ƃé a pɔ̂ri m̀ɛnii ŋí loôi la ḿâi? Va pɔri kɛ̂i a tɔ̃yâ!” 3“Zonetaŋ, tɔ̃yâ ƃe! Kɛ́lɛ ínâŋ è gɔ́lɔŋ berei í ŋ́wɛlini lai. M̀ɛni ma vé ŋ̀wɛ̂lii é ílii tóo pôlu. M̀ɛni ƃé vé m̀ó ní la yâ. Ŋa tɔ̃yâ ƃôi gɛ̀ ɣele ma Yâwɛɛi ŋɛ́i é pɛ́lɛ ƃía. Ŋ́gaa nâa saa wôlo la.” 4Zonetaŋ ǹyɛɛ m̀ai, “M̀ɛnii ya ŋ̀wɛ̂lii ŋá gɛ̂i, ŋa pâi gɛ̂i yɛ̂.” 5Deeƃé ǹyɛɛ Zonetaŋ mai, “Tínaa ƃa ŋ̀áloŋ ninai kuui. M̀aa nɛ̃ɛ̂i a gɛ́ɛ kwa ínâŋ kú gúui su mii-sɛŋ míi gîe ma. Kɛ́lɛ, ŋa pâi liî ŋá ńoo ǹɔɔi su. Ŋa pâi gɛ̂i naa a fólo feerɛ. 6À kɛ̀ Sɔ̂ɔ a ḿaa marê kɛ̀ɛ kɛ̀, m̀ó ma, ‘Deeƃé è ḿarê kɛ̀ a gɛ́ɛ é lí bɔ́-taai Bɛpeleɣɛ̃ɛ a gɛ́ɛ da ŋɔnûai dí sâla kula gîe ma yɛ̂ɛ berei da wɔ́lɔ gɛ̀ la a kóraŋ kéleei.’ 7À kɛ̀ ínâŋ a kɛ̀ ǹyɛɛ, ‘Mɛni lɛ́lɛɛ ká tí,’ gɛ̀ ní ŋ́uŋ ma ƃôɔɔi. Kɛ́lɛ a ǹíi ŋwàna, gɛ̀ ní a ŋ̀wɛ̂lii é mɛni ŋánaa kɛ́ a ńyãa. 8Ye m̀ɛnii ŋí kɛ́ ḿî, kpɛ́ni fêi, kwa yá kúkpanaŋ-wôo kɛ̀ Yâwɛɛ ŋɛ́i a gɛ́ɛ kwa pâi kɛ̂i a kúteniŋ ƃôɔɔ kúkîe-ni yêei. À kɛ̀ ŋà mɛni nyɔ́mɔɔ kɛ̀ yá, ye ḿbaa. Kɛ́lɛ ífe ńdɛ̀ɛ ínâŋ pɔ́” 9Zonetaŋ ǹyɛɛ m̀ai, “Ílii fé kɔ-kɔ̀. À kɛ̀ ŋà gɔ̀lɔŋ a gɛ́ɛ ńâŋ a ŋ̀wɛ̂lii é ípaa tɔ̃yâ ma, ŋa pâi nɛɛ̂i naa í gɔ́lɔŋ.” 10Deeƃé è m̀arê kɛ̀ ǹyɛɛ m̀ai, “Ya pâi nyíŋi kɛ́ pere kɛ̂i léŋ?” 11Zonetaŋ ǹyɛɛ m̀ai, “Pá kú lí bonoi ŋá. Ŋa pâi berei lɛ̂i ya.” Nya ƃe dí lì. 12Zonetaŋ è mò Deeƃé m̀a ǹyɛɛi, “Gɛ̀ ní Yâwɛɛ, Eezuɛ Ɣalai fé ŋáfɛli wôoi mɛni. É síɣe sâa ma, ŋa pâi ńâŋ ŋɔmɛni kpɛtɛɛi kɔ́lɔnîi fólo feerɛ yée mu. À kɛ̀ tí, gɛ̀ ní, ŋa pâi ǹɛɛ̂i naa í gɔ́lɔŋ à kɛ̀ ǹíi lɛ̂lɛɛi goi ímɛni ma. 13Kɛ́lɛ à kɛ̀ à ŋ̀wɛ̂lii é mɛni nyɔ́mɔɔ kɛ́ a yá, ŋa ŋ́gono tée a gɛ́ɛ ŋa pâi môi yâ, ŋá nɛ̀ɛ naa í pú. Ŋà wàla gɛ́ tí, gɛ̀ ní, Yâwɛɛ é tɔ̂ŋ kpɛ́ ḿâ a ŋ̀ánaa. Ŋa Yâwɛɛ marê kɛ̂i a gɛ́ɛ é kpɔŋ ḿâa tɛɛ ípɔ yɛ̂ɛ berei a kâa dɛ̀ɛ la ńâŋ pɔ́i. 14-15Ɣele tɔ̂nɔ da Yâwɛɛ a pâi íkpɔara-ƃelai kélee su karâi ǹɔii ma ƃɛ́. Ŋà kɛ̀ niî ɣele ma, ye kpera yɛ̂ kpɔŋ mâa tɛɛ ḿbɔ naa. Ŋà wàla kɛ́ ɣele ma, gɛ̀ ní kpɔŋ mâ tɛɛ ŋánûai pɔ́-naa. 16Zonetaŋ da Deeƃé dí kpanaŋ-wôo kɛ̀ díkîe-ni yêei a gɛ́ɛ núu da fé m̀arâŋ-nuu ŋɔsuui su-nuui da pàa, kpaa máŋ dísuui su-nuui da é màrâŋ nuu da ŋɔsuui su-nuui da pàa.” Zonetaŋ ǹyɛɛ m̀ai, “Ŋa Ɣâla marê kɛ̂i a gɛ́ɛ é kpa kula ísuui ma à kɛ̀ da gbanaŋ-wooi ŋí ɣàle.”
17Zonetaŋ è ŋɔ́nɔ gɛ̀ Deeƃé é góno tée ǹyêei, kpɛ́ni fêi, Zonetaŋ è kɛ̀ a Deeƃé wɛ́liɛɛ yɛ̂ɛ berei è gbîŋ wɛ́lini lai. M̀ɛni ma, è kɛ̀ ŋ̀wɛ̂lii a gɛ́ɛ díkɛ dílawoi-laai kɛ̂i a teniŋ ƃô pere da ǹyaa. 18Nyíŋi pôlu ma, Zonetaŋ è mò mà ǹyɛɛi, “Tínaa ƃa ŋ̀áloŋ nina kuui, ǹyaŋ ǹûai da pâi kɛ̂i ímaa marê kɛ́ɛ kɛ̂i, kpɛ́ni fêi, íwɔ̂ see-sɛŋ a pâi kɛ̂i a vólo. 19Bôlu ma ɣele ƃɔ́ɔi ǹûai kélee da pâi kɛ̂i m̀ôi dîyɛɛ ƃa lí a zu kôyaa. Gɛ̀ ní lí ƃɛ́i ya ílòo naa a bɔlɔi í sée naa gɔni kpului kɔlɛ. 20Ŋa pâi tɔ̃a saaƃa pilîi gɔnii m̀élai nyíti ma íkɔlɛ ma pere, 21ǹyaŋ ŋa pâi ńyee-mu-nuui tɛɛ̂i a gɛ́ɛ é dɔ̃ai kɔ́ri. Ya pâi gɔ́lɔnîi à kɛ̀ ǹɛ̂lɛɛi a gɛ́ɛ í pá a berei ŋa pâi lônoi la bɔ́ naai. Tɔ̃yâ kpîŋ ma gɛ̀ ɣeniɛ Yâwɛɛ ŋɛ́i ŋa pâi m̀ôi ńyɛ̃ɛi, ‘Dɔ̃a-ŋai díkaa íƃelai nyíŋi ma! Ye dísiɣe!’ 22Kɛ́lɛ à kɛ̀ vé lɛ́lɛɛ ní ímɛni ma, ŋa pâi m̀ôi zurɔ̂ŋ-loi ma, ‘Dɔ̃a-ŋai díkaa kpɔ́ ǹaa túɛ pere!’ Nyíŋi su kulâi ƃa Yâwɛɛ a ŋ̀wɛ̂llii a gɛɛ í lí, ǹyaŋ fɛ̂ɛ nɔ́ í lí. 23Kɛ́lɛ a pâi ŋ̀ɛ́i kɛ̂i kûa é gɛ́ kú kúkono-tee wooi mɛi káa kú ŋ̀áa-see kɛ́ kúkîe-ni yêei.”
24Nya ƃe Deeƃé è nòo naa gɔnii kɔlɛ víyeŋ ŋá. Ŋ̀áloŋ nina kuui ŋèle serɛɛi, Sɔ̂ɔ è pà é sée gɛ́ ǹáa mìi. 25È sèe bɛ́rɛ-kaŋ kɔlɛ, yɛ̂ɛ berei nɔ́ a kâa gɛ̀ la a bɔlɔi. Zonetaŋ ǹyaŋ è kɛ̀ seeni déniŋ ma Abinɛ kɛ́ ƃò seeni Sɔ̂ɔ kɔlɛ ma. Kɛ́lɛ, Deeƃé ŋɔsee-sɛŋ è kɛ̀ a vólo.
26Sɔ̂ɔ fé mɛni da ƃó ní a maa ɣelei tí, kpɛ́ni fêi, è kɛ̀ gíli ŋá siâi ǹyɛɛi, “Ɣele ta mɛni da aâ Deeƃé kɛ́ nyíi a gɛ́ m̀aa wàa ní. Tɔ̃yâ ma m̀aa fé wàa ní.” 27Ŋ̀áloŋ nina kuui tɛɛ́ pôlu ma ɣele ƃɔ́ɔi Deeƃé ŋɔsee-sɛŋ è kɛ̀ niî a vólo. Nya ƃe Sɔ̂ɔ è Zonetaŋ marê kɛ̀ ǹyɛɛ m̀ai, “Lé ƃé kɛ̀ Zɛse ǹóŋ fé niî pá ní kwa dia-ni kú kúlaa míi? Vé wɛ́ɛ kɛ́ ní ƃɛ́ ǹyaŋ vé niî tela pá ní sâa!” 28-29Zonetaŋ ǹyɛɛ m̀ai, “Zɛŋ gɛ̀ Deeƃé fé niî pá ní ƃɛ́ kwa dîa-ni kú kúlaa míi gîe mai ƃa è ḿarê kɛ̀ ǹyɛɛi, ‘Kpera yɛ̂ nɛ̀ɛ naa ŋá lí ŋá ŋánûai naa káa, kpɛ́ni fêi, dí káa sâla kulâi. Ńîa è pà ńdôlii a gɛ́ɛ kú lí naa. Ye kpɔŋ ḿâ tɛɛ ḿbɔ a gɛ́ɛ ŋá lí naa ŋá ńîa-ni naa káa a da loŋ.’ ”
30Sɔ̂ɔ è ǹíi ŋwàna kpɔ́ Zonetaŋ ma a ŋ̀ánaa é láɣi ma ǹyɛɛi, “Ífe a ǹóŋ a dɔnɔ kpîŋ. Íkaa a núu pɛlɛ-nuu! Ŋá gɔ́lɔŋ a gɛ́ɛ ya ŋ̀wɛ̂lii a gɛ́ɛ íkɛ a Zɛse ǹóŋ ŋɔnúu lɛ́lɛɛ. M̀aa nɛ̃ɛ̂i a gɛ́ɛ ŋumɛ é ílee sóŋ a gɛ́ɛ è ímaa sɔlɔ ƃó. 31Tãi nɔ́ Zɛse ǹóŋ ŋí káa la ɣele mai, ífe pâi kɛ̂i a íŋuŋ ma ƃóɔɔ. Íkâloŋ-laai a pâi kɛ̂i mɛni kpɔ̂lu su. Ye dɛ́ɛ ḿbɔ lonii ma! Maa nɛ̃ɛ é sáa!” 32Zonetaŋ ǹyɛɛ m̀ai, “Lé ƃé yâ ŋ̀wɛ̂lii í Deeƃé páa m̀ɛni mai? Lé ƃé a gɛ́i?” 33Nya ƃe Sɔ̂ɔ è ŋɔkpálai pìli Zonetaŋ pɔ́-naa pere gɛ́ kɔ̀ a gɛ́ɛ é baa. Zonetaŋ è gɔ̀lɔŋ a gɛ́ɛ ǹâŋ è kɛ̀ ŋ̀wɛ̂lii é Deeƃé páa a tɔ̃yâ. 34Zonetaŋ è ǹíi ŋwàna ǹâŋ ma, kpɛ́ni fêi, è woo-nyɔ̂ŋ nyɔ́mɔɔ pìli Deeƃé ma. È mù sìɣe é kúla teƃelei ma vé mii-sɛŋ da mii ní a ŋ̀elei tí.
35Ɣele wâla kɛ́ɛi, Zonetaŋ è lì víyeŋ ŋá a gɛ́ɛ é Deeƃé káa. È surɔŋ-loo tɔnɔ sìɣe da ǹyaa dí lí. 36È mò ma ǹyɛɛi, “Ŋa dɔ̃a-ŋai pìli, lí í dísiɣe í pá la ḿbɔ.” Zurɔ̂ŋ-looi è pɛ̀lɛ kîrɛ siɣɛɛ ma. Zonetaŋ è ŋɔ́nɔ dɔ̃ai dɔnɔ pìli é tɛ́ɛ ma. 37Ǹôloŋ seriɛ́ɛ dɔ̃ai naa kɔlɛ mai, Zonetaŋ è làɣi ma ǹyɛɛi, “Dɔ̃ai fé tɛɛ ní yâ é lí tuɛ pere?” 38Zonetaŋ è ŋɔ́nɔ làɣi ma ǹyɛɛi, “Gɛ́ a m̀aa félaa! Ífe kpera!” Ǹôloŋ è dɔ̃a-ŋai sìɣe é pá a dîa pôlu Zonetaŋ pɔ́. 39Kɛ́lɛ vé kɛ́ ní a mɛni da kɔ́lɔŋɔɔ é pîlaŋ la mɛnii kɛ̀ kɛ̂i ma. Zonetaŋ da Deeƃé nɔ́ ƃé kɛ̀ a m̀ɛnii kɔ́lɔŋɔɔ kɛ̀ kɛ̂i. 40Zonetaŋ è ŋɔkɔli-sãai tɛ̀ɛ ǹolôŋ pɔ́ ǹyɛɛ m̀ai, “Dí síɣe í lí dia daai su.” 41Ǹôloŋ kɛ́ɛ a lí lai, Deeƃé è kùla gɔni kpului kɔlɛ. È ŋ̀uŋ pìlaŋ ǹɔii ma gîei saaƃa Zonetaŋ ŋɛ́i túɛ. Da Zonetaŋ dí díla-gbɔ sèe gîe ma dí pɛ́lɛ wɔ̂lɔi. Deeƃé é wɔ̀lɔ kpɔ́ é tɛ́ɛ gɛ̂i ma. 42Zonetaŋ ǹyɛɛ Deeƃé m̀ai, “Lí lii-see su. Gíli é lɛ́ɛ íŋa a gɛ́ɛ kwa yá kú Yâwɛɛ marê kɛ̀ a gɛ́ɛ é kúmaa kpɛ́ɛ é gɛ́ a gɛ́ɛ kúkono-teei kú gɛ̀ ǹyêei kwa kúnîa-pɛlɛɛi da díwɔ̂ nia-pɛlɛɛi wɔ́lɔ-wɔlɔ da wɔlɔ-wɔlɔ.” Deeƃé da Zonetaŋ dí nâa díŋaa kɔ̀lɛ Zonetaŋ é lí pôlu daai su.
Currently Selected:
Samia Maa-ŋuŋ 20: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia
Samia Maa-ŋuŋ 20
20
Zonetaŋ è kpɔŋ Deeƃé ma
1Deeƃé è pù é kúla Ɣâla ŋɔlóno kɛ́-ƃelai díkpanâŋ lá. È pà Zonetaŋ pɔ́-naa é m̀arê kɛ́ ǹyɛɛ m̀ai, “Lé mɛni ƃé ínâŋ Sɔ̂ɔ a ŋ̀wɛ̂lii é ḿbaa lai? Lé mɛni nyɔ́mɔɔ ƃé ŋá gɛ̀ lai?” 2Zonetaŋ ǹyɛɛ mai, “Ńâŋ fa pɔ̂ri gbɛtɛ̂i gíli ŋá a gɛ́ɛ é ípaa! Va mɛni da kɛ̀ ŋɛ́i pôlu. Lé mɛni ƃé a pɔ̂ri m̀ɛnii ŋí loôi la ḿâi? Va pɔri kɛ̂i a tɔ̃yâ!” 3“Zonetaŋ, tɔ̃yâ ƃe! Kɛ́lɛ ínâŋ è gɔ́lɔŋ berei í ŋ́wɛlini lai. M̀ɛni ma vé ŋ̀wɛ̂lii é ílii tóo pôlu. M̀ɛni ƃé vé m̀ó ní la yâ. Ŋa tɔ̃yâ ƃôi gɛ̀ ɣele ma Yâwɛɛi ŋɛ́i é pɛ́lɛ ƃía. Ŋ́gaa nâa saa wôlo la.” 4Zonetaŋ ǹyɛɛ m̀ai, “M̀ɛnii ya ŋ̀wɛ̂lii ŋá gɛ̂i, ŋa pâi gɛ̂i yɛ̂.” 5Deeƃé ǹyɛɛ Zonetaŋ mai, “Tínaa ƃa ŋ̀áloŋ ninai kuui. M̀aa nɛ̃ɛ̂i a gɛ́ɛ kwa ínâŋ kú gúui su mii-sɛŋ míi gîe ma. Kɛ́lɛ, ŋa pâi liî ŋá ńoo ǹɔɔi su. Ŋa pâi gɛ̂i naa a fólo feerɛ. 6À kɛ̀ Sɔ̂ɔ a ḿaa marê kɛ̀ɛ kɛ̀, m̀ó ma, ‘Deeƃé è ḿarê kɛ̀ a gɛ́ɛ é lí bɔ́-taai Bɛpeleɣɛ̃ɛ a gɛ́ɛ da ŋɔnûai dí sâla kula gîe ma yɛ̂ɛ berei da wɔ́lɔ gɛ̀ la a kóraŋ kéleei.’ 7À kɛ̀ ínâŋ a kɛ̀ ǹyɛɛ, ‘Mɛni lɛ́lɛɛ ká tí,’ gɛ̀ ní ŋ́uŋ ma ƃôɔɔi. Kɛ́lɛ a ǹíi ŋwàna, gɛ̀ ní a ŋ̀wɛ̂lii é mɛni ŋánaa kɛ́ a ńyãa. 8Ye m̀ɛnii ŋí kɛ́ ḿî, kpɛ́ni fêi, kwa yá kúkpanaŋ-wôo kɛ̀ Yâwɛɛ ŋɛ́i a gɛ́ɛ kwa pâi kɛ̂i a kúteniŋ ƃôɔɔ kúkîe-ni yêei. À kɛ̀ ŋà mɛni nyɔ́mɔɔ kɛ̀ yá, ye ḿbaa. Kɛ́lɛ ífe ńdɛ̀ɛ ínâŋ pɔ́” 9Zonetaŋ ǹyɛɛ m̀ai, “Ílii fé kɔ-kɔ̀. À kɛ̀ ŋà gɔ̀lɔŋ a gɛ́ɛ ńâŋ a ŋ̀wɛ̂lii é ípaa tɔ̃yâ ma, ŋa pâi nɛɛ̂i naa í gɔ́lɔŋ.” 10Deeƃé è m̀arê kɛ̀ ǹyɛɛ m̀ai, “Ya pâi nyíŋi kɛ́ pere kɛ̂i léŋ?” 11Zonetaŋ ǹyɛɛ m̀ai, “Pá kú lí bonoi ŋá. Ŋa pâi berei lɛ̂i ya.” Nya ƃe dí lì. 12Zonetaŋ è mò Deeƃé m̀a ǹyɛɛi, “Gɛ̀ ní Yâwɛɛ, Eezuɛ Ɣalai fé ŋáfɛli wôoi mɛni. É síɣe sâa ma, ŋa pâi ńâŋ ŋɔmɛni kpɛtɛɛi kɔ́lɔnîi fólo feerɛ yée mu. À kɛ̀ tí, gɛ̀ ní, ŋa pâi ǹɛɛ̂i naa í gɔ́lɔŋ à kɛ̀ ǹíi lɛ̂lɛɛi goi ímɛni ma. 13Kɛ́lɛ à kɛ̀ à ŋ̀wɛ̂lii é mɛni nyɔ́mɔɔ kɛ́ a yá, ŋa ŋ́gono tée a gɛ́ɛ ŋa pâi môi yâ, ŋá nɛ̀ɛ naa í pú. Ŋà wàla gɛ́ tí, gɛ̀ ní, Yâwɛɛ é tɔ̂ŋ kpɛ́ ḿâ a ŋ̀ánaa. Ŋa Yâwɛɛ marê kɛ̂i a gɛ́ɛ é kpɔŋ ḿâa tɛɛ ípɔ yɛ̂ɛ berei a kâa dɛ̀ɛ la ńâŋ pɔ́i. 14-15Ɣele tɔ̂nɔ da Yâwɛɛ a pâi íkpɔara-ƃelai kélee su karâi ǹɔii ma ƃɛ́. Ŋà kɛ̀ niî ɣele ma, ye kpera yɛ̂ kpɔŋ mâa tɛɛ ḿbɔ naa. Ŋà wàla kɛ́ ɣele ma, gɛ̀ ní kpɔŋ mâ tɛɛ ŋánûai pɔ́-naa. 16Zonetaŋ da Deeƃé dí kpanaŋ-wôo kɛ̀ díkîe-ni yêei a gɛ́ɛ núu da fé m̀arâŋ-nuu ŋɔsuui su-nuui da pàa, kpaa máŋ dísuui su-nuui da é màrâŋ nuu da ŋɔsuui su-nuui da pàa.” Zonetaŋ ǹyɛɛ m̀ai, “Ŋa Ɣâla marê kɛ̂i a gɛ́ɛ é kpa kula ísuui ma à kɛ̀ da gbanaŋ-wooi ŋí ɣàle.”
17Zonetaŋ è ŋɔ́nɔ gɛ̀ Deeƃé é góno tée ǹyêei, kpɛ́ni fêi, Zonetaŋ è kɛ̀ a Deeƃé wɛ́liɛɛ yɛ̂ɛ berei è gbîŋ wɛ́lini lai. M̀ɛni ma, è kɛ̀ ŋ̀wɛ̂lii a gɛ́ɛ díkɛ dílawoi-laai kɛ̂i a teniŋ ƃô pere da ǹyaa. 18Nyíŋi pôlu ma, Zonetaŋ è mò mà ǹyɛɛi, “Tínaa ƃa ŋ̀áloŋ nina kuui, ǹyaŋ ǹûai da pâi kɛ̂i ímaa marê kɛ́ɛ kɛ̂i, kpɛ́ni fêi, íwɔ̂ see-sɛŋ a pâi kɛ̂i a vólo. 19Bôlu ma ɣele ƃɔ́ɔi ǹûai kélee da pâi kɛ̂i m̀ôi dîyɛɛ ƃa lí a zu kôyaa. Gɛ̀ ní lí ƃɛ́i ya ílòo naa a bɔlɔi í sée naa gɔni kpului kɔlɛ. 20Ŋa pâi tɔ̃a saaƃa pilîi gɔnii m̀élai nyíti ma íkɔlɛ ma pere, 21ǹyaŋ ŋa pâi ńyee-mu-nuui tɛɛ̂i a gɛ́ɛ é dɔ̃ai kɔ́ri. Ya pâi gɔ́lɔnîi à kɛ̀ ǹɛ̂lɛɛi a gɛ́ɛ í pá a berei ŋa pâi lônoi la bɔ́ naai. Tɔ̃yâ kpîŋ ma gɛ̀ ɣeniɛ Yâwɛɛ ŋɛ́i ŋa pâi m̀ôi ńyɛ̃ɛi, ‘Dɔ̃a-ŋai díkaa íƃelai nyíŋi ma! Ye dísiɣe!’ 22Kɛ́lɛ à kɛ̀ vé lɛ́lɛɛ ní ímɛni ma, ŋa pâi m̀ôi zurɔ̂ŋ-loi ma, ‘Dɔ̃a-ŋai díkaa kpɔ́ ǹaa túɛ pere!’ Nyíŋi su kulâi ƃa Yâwɛɛ a ŋ̀wɛ̂llii a gɛɛ í lí, ǹyaŋ fɛ̂ɛ nɔ́ í lí. 23Kɛ́lɛ a pâi ŋ̀ɛ́i kɛ̂i kûa é gɛ́ kú kúkono-tee wooi mɛi káa kú ŋ̀áa-see kɛ́ kúkîe-ni yêei.”
24Nya ƃe Deeƃé è nòo naa gɔnii kɔlɛ víyeŋ ŋá. Ŋ̀áloŋ nina kuui ŋèle serɛɛi, Sɔ̂ɔ è pà é sée gɛ́ ǹáa mìi. 25È sèe bɛ́rɛ-kaŋ kɔlɛ, yɛ̂ɛ berei nɔ́ a kâa gɛ̀ la a bɔlɔi. Zonetaŋ ǹyaŋ è kɛ̀ seeni déniŋ ma Abinɛ kɛ́ ƃò seeni Sɔ̂ɔ kɔlɛ ma. Kɛ́lɛ, Deeƃé ŋɔsee-sɛŋ è kɛ̀ a vólo.
26Sɔ̂ɔ fé mɛni da ƃó ní a maa ɣelei tí, kpɛ́ni fêi, è kɛ̀ gíli ŋá siâi ǹyɛɛi, “Ɣele ta mɛni da aâ Deeƃé kɛ́ nyíi a gɛ́ m̀aa wàa ní. Tɔ̃yâ ma m̀aa fé wàa ní.” 27Ŋ̀áloŋ nina kuui tɛɛ́ pôlu ma ɣele ƃɔ́ɔi Deeƃé ŋɔsee-sɛŋ è kɛ̀ niî a vólo. Nya ƃe Sɔ̂ɔ è Zonetaŋ marê kɛ̀ ǹyɛɛ m̀ai, “Lé ƃé kɛ̀ Zɛse ǹóŋ fé niî pá ní kwa dia-ni kú kúlaa míi? Vé wɛ́ɛ kɛ́ ní ƃɛ́ ǹyaŋ vé niî tela pá ní sâa!” 28-29Zonetaŋ ǹyɛɛ m̀ai, “Zɛŋ gɛ̀ Deeƃé fé niî pá ní ƃɛ́ kwa dîa-ni kú kúlaa míi gîe mai ƃa è ḿarê kɛ̀ ǹyɛɛi, ‘Kpera yɛ̂ nɛ̀ɛ naa ŋá lí ŋá ŋánûai naa káa, kpɛ́ni fêi, dí káa sâla kulâi. Ńîa è pà ńdôlii a gɛ́ɛ kú lí naa. Ye kpɔŋ ḿâ tɛɛ ḿbɔ a gɛ́ɛ ŋá lí naa ŋá ńîa-ni naa káa a da loŋ.’ ”
30Sɔ̂ɔ è ǹíi ŋwàna kpɔ́ Zonetaŋ ma a ŋ̀ánaa é láɣi ma ǹyɛɛi, “Ífe a ǹóŋ a dɔnɔ kpîŋ. Íkaa a núu pɛlɛ-nuu! Ŋá gɔ́lɔŋ a gɛ́ɛ ya ŋ̀wɛ̂lii a gɛ́ɛ íkɛ a Zɛse ǹóŋ ŋɔnúu lɛ́lɛɛ. M̀aa nɛ̃ɛ̂i a gɛ́ɛ ŋumɛ é ílee sóŋ a gɛ́ɛ è ímaa sɔlɔ ƃó. 31Tãi nɔ́ Zɛse ǹóŋ ŋí káa la ɣele mai, ífe pâi kɛ̂i a íŋuŋ ma ƃóɔɔ. Íkâloŋ-laai a pâi kɛ̂i mɛni kpɔ̂lu su. Ye dɛ́ɛ ḿbɔ lonii ma! Maa nɛ̃ɛ é sáa!” 32Zonetaŋ ǹyɛɛ m̀ai, “Lé ƃé yâ ŋ̀wɛ̂lii í Deeƃé páa m̀ɛni mai? Lé ƃé a gɛ́i?” 33Nya ƃe Sɔ̂ɔ è ŋɔkpálai pìli Zonetaŋ pɔ́-naa pere gɛ́ kɔ̀ a gɛ́ɛ é baa. Zonetaŋ è gɔ̀lɔŋ a gɛ́ɛ ǹâŋ è kɛ̀ ŋ̀wɛ̂lii é Deeƃé páa a tɔ̃yâ. 34Zonetaŋ è ǹíi ŋwàna ǹâŋ ma, kpɛ́ni fêi, è woo-nyɔ̂ŋ nyɔ́mɔɔ pìli Deeƃé ma. È mù sìɣe é kúla teƃelei ma vé mii-sɛŋ da mii ní a ŋ̀elei tí.
35Ɣele wâla kɛ́ɛi, Zonetaŋ è lì víyeŋ ŋá a gɛ́ɛ é Deeƃé káa. È surɔŋ-loo tɔnɔ sìɣe da ǹyaa dí lí. 36È mò ma ǹyɛɛi, “Ŋa dɔ̃a-ŋai pìli, lí í dísiɣe í pá la ḿbɔ.” Zurɔ̂ŋ-looi è pɛ̀lɛ kîrɛ siɣɛɛ ma. Zonetaŋ è ŋɔ́nɔ dɔ̃ai dɔnɔ pìli é tɛ́ɛ ma. 37Ǹôloŋ seriɛ́ɛ dɔ̃ai naa kɔlɛ mai, Zonetaŋ è làɣi ma ǹyɛɛi, “Dɔ̃ai fé tɛɛ ní yâ é lí tuɛ pere?” 38Zonetaŋ è ŋɔ́nɔ làɣi ma ǹyɛɛi, “Gɛ́ a m̀aa félaa! Ífe kpera!” Ǹôloŋ è dɔ̃a-ŋai sìɣe é pá a dîa pôlu Zonetaŋ pɔ́. 39Kɛ́lɛ vé kɛ́ ní a mɛni da kɔ́lɔŋɔɔ é pîlaŋ la mɛnii kɛ̀ kɛ̂i ma. Zonetaŋ da Deeƃé nɔ́ ƃé kɛ̀ a m̀ɛnii kɔ́lɔŋɔɔ kɛ̀ kɛ̂i. 40Zonetaŋ è ŋɔkɔli-sãai tɛ̀ɛ ǹolôŋ pɔ́ ǹyɛɛ m̀ai, “Dí síɣe í lí dia daai su.” 41Ǹôloŋ kɛ́ɛ a lí lai, Deeƃé è kùla gɔni kpului kɔlɛ. È ŋ̀uŋ pìlaŋ ǹɔii ma gîei saaƃa Zonetaŋ ŋɛ́i túɛ. Da Zonetaŋ dí díla-gbɔ sèe gîe ma dí pɛ́lɛ wɔ̂lɔi. Deeƃé é wɔ̀lɔ kpɔ́ é tɛ́ɛ gɛ̂i ma. 42Zonetaŋ ǹyɛɛ Deeƃé m̀ai, “Lí lii-see su. Gíli é lɛ́ɛ íŋa a gɛ́ɛ kwa yá kú Yâwɛɛ marê kɛ̀ a gɛ́ɛ é kúmaa kpɛ́ɛ é gɛ́ a gɛ́ɛ kúkono-teei kú gɛ̀ ǹyêei kwa kúnîa-pɛlɛɛi da díwɔ̂ nia-pɛlɛɛi wɔ́lɔ-wɔlɔ da wɔlɔ-wɔlɔ.” Deeƃé da Zonetaŋ dí nâa díŋaa kɔ̀lɛ Zonetaŋ é lí pôlu daai su.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia