Zac 6
6
A chan̈e caruaje yic owal
1'Ay pax junx tas 'ix ch'oxx wil 'a 'icha waychil. 'Ix wil yelt chan̈e caruaje yic owl 'a snan̈l chab' tzaln to nab'a bronce. 2A jun b'ab'l caruaje cha, chac e no chej to'jnac; ax jun schab'il, q'uic' e no chej to'jnac. 3Jun yoxil, sac e no chej to'jnac, ax jun schan̈il, tz'ib'quintac e no chej chi to'jnac.
4Xlajw cha, xin c'anb'n 'ixtc 'a jun ángel tzpaxtin wet' cha: Mamin, ¿tas tzyal 'el'ch junx tic? xin chi 'a 'a. 5Ax jun ángel cha, 'ix yaln 'ixtc 'ayin: A jun tzo'n̈ tic, tz'at eb' 'a schan̈paq'uil 'aj tzcot 'ic', yic xlajw yelt eb' 'a yojltac jun Yajl 'a smasnil yolyib'n̈q'uinal. 6A jun caruaje toc'b'il yuj e no q'uic' chej cha, ata tz'at 'a jun nacion̈ 'ay 'a stojlal norte, ax jun caruaje toc'b'il yuj e no sac chej cha, ata tz'at 'a jun nacion̈ 'ay 'a stojlal 'aj tz'em c'u. Ax junx caruaje toc'b'il yuj e no tz'ib'quintac chej cha, ata tz'at 'a jun nacion̈ 'ay 'a stojlal sur, xchi jun ángel cha.
7A jun tzo'n̈ chej caw wal 'ay yip cha, tznib'j eb' tz'at yil smasnil yolyib'n̈q'uinal. 'Ix yaln jun ángel chi 'a e no 'ixtic: 'Ixquec, 'at 'iltec smasnil yolyib'n̈q'uinal, xchi. 'Ix 'at e no'.
8Xlajw cha, x'awj jun ángel chi 'ayn 'ixtic: 'Ilt nab'an, yuj wal jun caruaje 'ix 'at 'a jun nacion̈ 'ay 'a stojlal norte, ax yoch wan yowl sc'ojl Jehová 'a yib'n̈ jun nacion̈ cha, xchi.
X'och yopiso Josué
9A Jehová, a 'ix aln jun tzo'n̈ paxti tic 'ayin: 10Chaj junc ofrenda 'a eb' paxn̈cta 'a Babilonia, eb' xit'nc 'icha presoal 'a jun nacion̈ cha: atn Heldai, Tobías yet' Jedaías. Tzlajwn̈ej cha, tzach 'at 'a yatut Josías, win yunnal Sofonías. 11A yet' q'uen plata yet' q'uen oro 'oj a cha 'a eb' cha, a yet' tza b'o junc corona. Tzlajw cha, tza'n q'ue 'a sjolm Josué sat ya'mal 'och sti eb' 'anma 'ayin, atn win yunnal Josadac. 12Tzaln 'a 'ixtic: A Jehová tztac' yuj smasnil, a tzaln 'ixtic: 'Ay jun in checb' 'oj 'eltoc 'a scal eb' yin̈tl Isaí, 'oj 'ajxoc sb'ic Swol, 'oj yic' wal yip 'a 'aj 'ayc' cha, 'oj sb'ox chan̈ sjel watut. 13Caw a 'oj b'onc sjel watut cha, 'oj b'inaxc wal si'mb'il. 'Oj 'em wocn ya'n reyl 'a sdespacho, ax 'a smoch sdespacho cha, ata 'oj 'em wocn jun ya'mal 'och sti eb' 'anma 'a Dios, junxn̈ej yaj snab'en eb' schawn̈il. 14Ax jun corona 'oj a b'o cha, 'icha snanb'il cot watut 'oj 'ajcni yic tznax cot yuj Helem, Tobías, Jedaías yet' Hen yunnal Sofonías, xa chi 'a 'a, xchi Dios 'ayin.
15'Oj cot eb' 'anma 'a najat, yic tzcolwj eb' wul sb'onc sjel yatut Jehová eyet'oc. 'Ixtnta 'oj 'aj snachj 'el eyu'uj, chajtlto a Jehová tztac' yuj smasnil, a 'in checn cot wul wal 'ayex. A jun tic, 'oj 'el'choc, toto 'oj e cha eyab'i', ax eyiclni tas tzyal Jehová qui Diosalec.
Currently Selected:
Zac 6: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
