Cnt 2
2
Tzyaln 'ix cob's cha:
1An tic, lajn in 'icha te snichte 'ay 'a lum pan̈n Sarón. 'Icha pax te snichte 'ay 'a eb' lum pan̈an, xchi 'ix.
Tzyaln win quelm cha:
2Ach cob's 'ix to chamc'ojlb'il wu'uj, 'icha wal te snichte 'ay 'a scal q'ui'ix, 'ixta wal aj 'a scal eb' 'ix cob'stac 'ix, xchi winac.
Tzyaln 'ix cob's cha:
3Ach quelm to chamc'ojlb'il wu'uj, 'icha wal junc te mansn 'ay 'a cal te', 'ixta aj 'a scal eb' quelmtac winac. Sja'l wal wem wocn 'a yen̈ul, caw wal chi slox sat te'.
4In yij 'at ni 'a 'aj 'ay yatutal wa'el, axta x'och wal q'ueln 'ayin, yujto tzin schamc'ojlej.
5'Ac' in c'ux jac te tacn̈ sat uva cha, tza'n in lo sat te a mansn cha, sec toq'ue tz'ochx wip, yujto caw wal 'ijn tzin cham ach in nib'n 'ochi.
6A wal a c'ab' 'a a surito, a chi tzcan 'a yaln̈ in jolom; ax a wach' c'ab', a chi tzin la'ni, xchi 'ix.
Tzyaln win quelm cha:
7Ex cob'stac 'ix 'aj Jerusalén, ta'wjec can e ti'oc, tze locn sb'i e no c'ultquil chej 'a calte', to man̈ e pitzl swayn̈ 'unx cob's chamc'ojlb'il wu'uj, munto 'oj 'el swayan̈, xchi winac.
Schab'l b'it
Tzyaln 'ix cob's cha:
8A ni quelm chamc'ojlb'il wu'uj, wal sjaw ni tic. Tox xwab' yawj na, caw tzb'atj chan̈ ni scot 'a lum jolmctac witz, carela sjaw ni 'a lum jolmctac tzalan.
9Lajn sjaw ni 'icha junc no c'ultquil chej. A ni quelm cha, 'ayx 'ec' 'am ni chi nec 'a spatc n̈a, t'an̈n xo 'oxt am ni 'a ventnu.
10Xyal ni quelm chi 'ayn 'ixtic: Ach cob's 'ix chamc'ojlb'il wu'uj, lem, q'uen̈ wa'an, con̈ muc'uc, yujto nab'ilch wu'uj.
11'Ilto x'ec' n̈ab'lq'uinal, man̈x 'a n̈ab'.
12Til xo wal te nichte tz'el-l ticnec 'a sat lum lum tic, stiempoal xo wal yoch b'it 'a 'aj tzcab' yoc' e no cowojte'.
13Til xo wal sat eb' te snun higo, ax te sat uva, caw wal su'q'ui xo yec' sjab' te'. Ach cob's 'ix to chamc'ojlb'il wu'uj, lem, q'uen̈ wa'an, con̈ muc'uc, yujto nab'ilch wu'uj.
14Lajn ach 'icha junc no 'uch tzc'ub'j 'el sb'a 'a sat q'ue'en, 'ixta 'ix otj a c'ub'n 'el a b'a 'ayin, ax ticnec jun, ch'ox wil a sat, tzin nib'n wab' a paxtini. Yujto caw wach' yol a jaj, caw wach' pax elx 'ochi, xchi ni 'ayin, xchi 'ix.
Smol aln eb' 'ixtc schawn̈il:
15Pechc e no wax yet' yune', yujto caw tzsatl e no te snun qui uva on̈, to wanto cob' snichn pax eb' te', xchi eb'.
Tzyaln 'ix cob's cha:
16A ni quelm chamc'ojlb'il wuj cha, yic in na, an̈jtona', wic pax na. Sja'l wal stan̈w calnelu ni 'a scal eb' te te 'ay snich.
17Ach quelm to chamc'ojlb'il wu'uj, ya' sb'a mantzac sacb'eli, meltzjan̈ paxta; lajn cab' tzotj a b'a 'icha junc no c'ultquil chej, 'icha cab' pax e no cotc c'ultquil chej tzb'atj chan̈ scot 'a lum jolmctac witz, xchi 'ix.
Currently Selected:
Cnt 2: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
