Apoc 5

A jun tzcuch Calnelu

1'Ix wiln jun wocn 'ejm 'a sdespacho. A 'a swach' c'ab', ata 'ay jun ch'an̈ un̈ chulb'ilb'ec'an. 'Ay stz'ib'l 'a yojol, yet' 'a spatic. 'Ay uque seyo 'aych 'a spatic. Yuj cha, matz tac' sjacwi. 2'Ix wiln pax jun ángel caw 'ay spoder. Caw 'ip 'ix sc'anb'j 'ixtic:

—¿Mach wal junc smoj sn̈i'chtan jun tzo'n̈ seyo cha, ax sjacn ch'an̈ un̈ cha? xchi. 3Palta wach'xam 'a satcha'an̈, wach'xam 'a sat lu'um, wach'xam 'a yaln̈ lu'um, may junc mach tztac' sjacni, ax yilni. 4Caw wal in 'oq'ui, yujto may junc mach tztac' sjacn jun ch'an̈ un̈ cha yic tzyilni. 5Palta 'ay jun 'a eb' 'ichm winc chi 'ix aln 'ayn 'ixtic: Man̈ ach 'oc'oc. A jun tzcuch León 'a scal eb' yin̈tl Judá, atn jun yin̈tl can win rey David, a 'a'jnac ganar. A 'oj stac' sn̈i'chtan uque seyo tic, ax sjacn ch'an̈ un̈ cha, xchi 'ayin.

6Ax 'a snan̈l yojl jun despacho cha, 'a scal chan̈wn̈ querubín cha, yet' 'a scal eb' 'ichm winc cha, ata xwil jun tzcuch Calnelu. Lin̈n 'eq'ui, palta chequel to milb'il chamoc. Uque sch'a'ac, uque pax yol sat. A yol sat cha, atn ucwan̈ Yespíritu Dios checb'il 'at 'a smasnil yolyib'n̈q'uinal. 7Ax jun tzcuch Calnelu cha, x'at schanc 'elt jun 'un̈ chi 'a swach' c'ab' jun wocn 'ejm 'a sdespacho cha. 8Xlajw schan 'elt jun un̈ cha, ax eb' querubín schan̈wn̈il, yet' eb' 24 'ichm winac, 'ix 'em cumn eb' 'a yojltac jun tzcuch Calnelu cha. 'Ay yarpa junjn eb' 'ichm winc cha, yet' pax eb' junjn svaso nab'a oro, b'ut'n yet' jun tzo'n̈ incienso. A jun tzo'n̈ incienso cha, caw su'q'ui sjab', atn slesl eb' yic xo Dios. 9Ax eb' 'ichm winc cha, 'ix sb'itnan eb' jun 'ac' b'it 'ixtic:

Ach tic, a moj xa chaj jun ch'an̈ un̈ tic, yic tza n̈i'chtan seyoal. Yujto ach milb'ilch chamoc, a mann 'och eb' 'anma yico'oc Dios yet' a chiq'uil. Niwn eb' 'a junjn 'in̈tal, 'a junjn ti'al, 'a junjn chon̈b'al, yet' 'a junjn nacion̈al.

10Ach xa'ch eb' reyal. Ach a'jnac yopiso junjn eb', yic tzya'n 'och eb' sti 'a Dios. Ax yoch eb' yajlil 'a yolyib'n̈q'uinal, xchi eb'.

11Xlajwn̈ej cha, xwilni, til wal eb' ángel oyn 'och 'a jun despacho cha, yet' 'a eb' querubín, yet' 'a eb' 'ichm winc cha. 'Ix wab'n pax sjaj eb'. Man̈x jantcoc smil-l sb'isl eb', smiyon̈al xo sb'isl eb'. 12Caw 'ip xyutj eb' yaln 'ixtic:

A jun tzcuch Calnelu milb'il chamoc, caw smoj tzcalec to 'ay spoder, 'ay sricoal, 'ay sjelnal yet' yip. Caw niwn yel'chi, niwn swach'il. Caw smoj calnec wach' paxti 'a 'a, xchi eb'.

13'Ix wab'n pax sjaj jantcn̈ej eb' b'ob'il yuj Dios 'a satcha'an̈, yet' 'a yolyib'n̈q'uinal, yet' 'a yol lu'um, yet' pax 'a yojl a mar. Jantcn̈ej eb' 'ay 'a jun tzo'n̈ lugar cha, c'uxn xyal eb' 'ixtic:

Alx cab' wach' paxti 'a jun wocn 'ejm 'a sdespacho, yet' 'a jun tzcuch Calnelu. Alx cab' 'a smasnil tiempo, chajtlto caw niwn yel'chi, niwn swach'il, an̈j Yajl yaji, xchi eb'.

14Ax eb' querubín schan̈wn̈il, 'ix yaln eb' 'ixtic:

—B'o cab' 'ixta', xchi eb'.

Ax eb' 24 'ichm winc cha, 'ix 'em cumn eb', 'ix yaln sb'a eb' ['a jun 'ayc' 'a jun 'ejmn̈ej.]

Currently Selected:

Apoc 5: CSS

Highlight

Compare

Copy