Apoc 4
4
A jun despacho 'ayc' 'a satcha'an̈
1Xlajw cha, xwilni, 'ay jun puerta jacn 'a satcha'an̈. A jun 'ix aln 'ayn 'a b'ab'el, atn jun lajn sjaj yet' trompeta, a 'ix aln 'emt pax 'ayn 'ixtic:
—Q'uen̈ta 'a tic. A 'aych 'oj in ch'ox jun tzo'n̈ tas tot 'oj jawoc, xchi 'ayin.
2Yajn̈j cha, xwach' 'och wal spoder Yespíritu Dios 'ayin. 'Ix wiln jun despacho 'a satcha'an̈. Ata 'ay jun mach wocn 'ejmi. 3A jun wocn 'ejm cha, lajn yilx sat 'icha junc q'uen jaspe, mto junc cornalina, caw tzictzni. Ax 'a jun despacho cha, ata oyn 'och jun chacpan caw tzictzni, lajn yilx 'icha junc q'uen esmeralda. 4Ax 'a stz'ey jun despacho cha, ata oyn 'och 24 niwc xila. Ata wocn 'ejm 24 eb' 'ichmtac winac. Caw sac spichl eb'. Ax 'a sjolm junjn eb', ata 'ay q'ue junjn corona nab'a oro. 5A 'a jun despacho cha, caw tz'elt raya 'a 'a. Caw tzc'an̈ 'icha sc'an̈ c'u. Ax 'a yojltac, ata 'ay uque niwc cantil 'aych sc'aq'uil, atn Yespíritu Dios yucwn̈il. 6'Ay pax junx tas 'a yojltac, caw yaxt'ujnac yilx 'icha junc a mar, lajn yilx 'icha cristal.
Ax 'a snan̈l jun despacho cha, yet' 'a stz'ey, ata 'ay chan̈wn̈ querubín,#Apoc 4.6 A 'a castilla tzyal yuj jun tzo'n̈ eb' to pitznn̈ej, palta a yic tzquilni to lajn jun tic yet' tas tzyal cot Ezequiel, yuj cha, to querubín eb' tzalx tic. nab'a yol sat sb'a eb' 'a yojltac yet' spatc eb'. 7A jun b'ab'el, lajn yilx 'icha junc león. Ax jun schab'il, lajn yilx 'icha junc quelm wacax. Ax jun yoxil, lajn yilx sat 'icha sat 'anma'. Ax jun schan̈il, lajn yilx 'icha junc no salt'iw tzjen̈wi. 8A chan̈wn̈ eb' cha, waque sc'axl junjn eb'. Ax sniwnal eb', nab'a yol sat sb'a. Sc'ual yac'wlil yaln eb' 'ixtic:
A Cajlilec, atn qui Diosalec, caw Cojxni, smasnil tas tzta'n̈j yu'uj. 'Ayc'n̈ej tax 'a yic pecti', 'ayc' ticnec, atn jun 'oj jawoc, xchi eb'.
9'Ixta xyutj chan̈wn̈ querubín chi yalni, chajtlto niwn swach'il, caw niwn yel'ch jun wocn 'ejm 'a sdespacho cha. Tzya'n eb' yuj diosal 'a 'a, atn jun 'ayc' 'a jun 'ejmn̈ej. A yic tzyaln eb' junjn 'ejm 'ixta', 10ax eb' 24 'ichmtac winc cha, tz'em cumn eb' 'a yojltac. Tzya'n 'ejm sb'a eb' 'a jun 'ayc' 'a jun 'ejmn̈ej. Tzpachn 'ejm eb' scorona 'a yojltac sdespacho. Tzyaln eb' 'ixtic:
11Ach Cajlil, ach qui Diosal on̈, smoj tzalx o'oj, to niwn a wach'il, to caw niwn el'chi, niwn a poder. Yujto ach b'ojnac smasnil tas. 'Ayc'n̈ej smasnil, yujto 'ixta tza nib'ej, yuj cha, b'ob'il o'oj, xchi eb' 'a 'a.
Currently Selected:
Apoc 4: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
