Apoc 21

A jun 'ac' satcha'an̈,*r* yet' jun 'ac' yolyib'n̈q'uinal

1Xlajw cha, xwiln jun 'ac' satcha'an̈, yet' jun 'ac' yolyib'n̈q'uinal. Yujto a jun b'ab'l satcha'an̈, yet' jun b'ab'l yolyib'n̈q'uinal, satnc 'eli. An̈jtona a mar, man̈x 'a a'. 2An Juan in tic, xwil jun schon̈b' Dios yicn̈ej yaji, atn jun 'ac' Jerusalén. 'Ix 'elt 'a yojltac Dios 'a satcha'an̈, 'ix 'emli. Caw wach'x yaj 'icha junc 'ix caw a'ijn yaj yet' spichul, tznupn yet' yichmil tzyi'aj. 3Ax xwab'n yoch jun paxti 'a sdespacho Dios. Caw 'ip yaln 'ixtic:

—'Ilto, a Dios 'ayc' yet' eb' 'anma ticnec. A 'oj cann̈j yet' eb'. Atn eb' chi schon̈b' yaji. Caw a Dios 'oj can 'a scal eb', atn wal sDiosal eb'. 4Man̈x 'oj scha 'oc' eb'. A wal ta', man̈x 'a chamel, man̈x 'a 'oq'uel, man̈x 'a cusc'ojlal, man̈x 'a pax yailal. Yujto jantcn̈ej tas 'ay 'a yic yalan̈, 'e'nc xo, xchi.

5Ax jun wocn 'ejm 'a sdespacho cha, a 'ix aln 'ayn 'ixtic:

—'Ilto, tzin b'o smasnil tas, caw 'a't tz'aji, xchi. 'Ix yaln pax 'ixtc 'ayin:

—Tz'ib'j jun tzo'n̈ wan ab'n tic, yujto a jun tzo'n̈ paxti tic, caw yel. Tztac' a'n 'och yipc a c'ojol, xchi.

6Xlajw cha, xyaln pax 'ayn 'ixtic:

—Tox 'ix b'o 'el'chi. An tic, b'ab'l waj 'a smasnil, slajb' in paxi. 'Icha chab' letra A yet' Zeta, 'ixta 'in. A eb' 'ay stacn̈ti'al, 'oj wac' yuc' eb' jun spac'b'a tz'a'n q'uinl 'a jun 'ejmn̈ej. 'Oj wac' 'a eb' 'a nab'an̈ej. 7A eb' tz'a'n ganar ya'n techjoc, 'oj scha eb' smasnil jun tzo'n̈ tic smacloc 'ayin. Yujto an tic, sDiosal in eb', ax eb' wunnal eb', wisl eb'. 8Palta 'ay eb' 'anma tzcomn xiwi, 'ay eb' matz ya'ch sc'ojl 'ayin, eb' yajb'entac, eb' milm cham 'anma', eb' tzb'on 'ajmulal, eb' 'ajchum, eb' tzyal sb'a 'a jun tzo'n̈ tzalx 'och diosal, yet' eb' 'a'm 'es. A eb' cha, 'oj scha eb' spac yico', 'oj 'atcn eb' 'a scal jun c'ac' tzn̈ilchji, caln yaj yet' azufre, atn jun 'icha pama'. A jun cha, atn schab'l chamel, xchi Dios.

A junx 'ac' Jerusalén

9Ax eb' ángel yucwn̈il, atn eb' 'aj 'ay uque vaso yailal yic slajub', 'ay jun 'ix aln 'ixtc 'ayin:

—Cotan̈, a 'aych 'oj in ch'ox jun 'ix 'oj nupnoc. Atn jun 'oj 'och yistloc jun tzcuch Calnelu, xchi.

10Xlajw cha, 'ix ch'oxn Yespíritu Dios jun chi 'ayn 'a 'icha waychil. Ax jun ángel cha, in yi'n 'at 'a sjolm jun niwquil tzalan, caw chan̈ yajq'ue'i. Ata xch'ox wil jun niwquil chon̈b' Jerusalén, atn jun yic Dios, 'ix 'emt 'a satcha'an̈, jun 'ix 'elt 'a yojltac Dios. 11Caw tzictzni jun chon̈b' chi yuj sacq'uinlal Dios. Caw tzictzni 'icha junc q'uen caw chan̈ stojol, 'icha q'uen jaspe. Lajn yilx yet' junc cristal, tzc'axw 'ec' qui sat 'a spatic. 12Ax 'a stitc jun chon̈b' cha, oyn 'och smuroal caw pim, chan̈ yaj'ti, lajchwe smac 'ay 'a 'a. 'Ayc' junjn ángel 'a junjn smac. 'Ax 'a junjn smac cha, tz'ib'b'il 'och sb'i lajchw macn̈ eb' yin̈tl Israel. 13'Ay 'oxe smac 'a stojlal 'aj tzq'uel c'u, 'ay 'oxe 'a stojlal norte, 'ay 'oxe 'a stojlal sur, 'ay pax 'oxe 'a stojlal 'aj tz'em c'u. 14A smuroal cha, 'ay lajchwe niwc q'uen 'aycn 'ejm yipnub'oc. Ax 'a sat junjn q'uen cha, ata tz'ib'b'il 'och sb'i eb' schecb' jun tzcuch Calnelu slajchwan̈il.

15Ax jun ángel 'ix aln 'ayn cha, yet' jun 'echtab' nab'a oro. Lajn yilx 'icha te 'aj. Yujto 'oj yechtoc jun chon̈b' cha, yet' jun tzo'n̈ smac, yet' smuroal. 16A jun chon̈b' cha, chan̈e yisquinyoal, lajnn̈ej spac'b'il schan̈il. Ax jun ángel cha, 'ix yechtan yet' yechtab' cha. Lajchwe mil estadio*f4* x'el'ch sb'isl yechtan junjn spac'b'il. 'Ixta pax sb'isl ste'il. 17Xlajw cha, 'ix yechtan smuroal cha. 144 codos*f5* 'ix 'el'chi. A jun yechtab' jun ángel chi tzc'anlb'ej, 'icha yechtab' 'anma'.

18A smuroal jun chon̈b' cha, jaspen̈ej smasnil. Ax jun chon̈b' cha, caw nab'a oro, lajn yilx yet' junc q'uen nen yaxt'ujnac. 19Ax jun tzo'n̈ niwc q'uen 'ay 'ejm yipnub'oc, til wal jun tzo'n̈ q'uen chan̈ stojl 'aych 'a 'a. A q'uen b'ab'el, jaspe, q'uen schab'il, zafiro, q'uen yoxil, ágata, q'uen schan̈il, esmeralda. 20A q'uen yo'il, ónice, q'uen swaquil, cornalina, q'uen yuquil, crisólito, q'uen swajxquil, berilo. Q'uen sb'aln̈il, topacio, q'uen slajn̈il, crisoprasa, q'uen yuxlchil, jacinto, q'uen slajchwil, amatista. 21Ax smac slajchwil, lajchwe q'uen perla 'aych 'a 'a, yujto junn̈j perlail yaj jun jun. A scayeal jun chon̈b' cha, nab'a oro, 'icha junc nen tzc'axw 'ec' qui sat 'a spatic.

22May junc yatut Dios 'a jun chon̈b' cha, yujto a Dios Cajlil, atn jun tztac' yuj smasnil, yet' jun tzcuch Calnelu, a eb' 'ayc'n̈ej 'a smasnil jun chon̈b' cha. 23A 'a jun chon̈b' cha, may tz'och yoc c'u, may pax tz'och yoc 'uj. Yujto a sacq'uinlal Dios yet' pax sacq'uinlal jun tzcuch Calnelu, a tzyac' sacq'uinlal 'a 'a. 24Ax eb' 'anma 'a junjn nacion̈, 'oj b'eyc' eb' 'a scal sacq'uinl 'ay 'a jun chon̈b' cha. Ax eb' niwc yajl 'a yolyib'n̈q'uinal, 'oj c'och eb' ta'. 'Oj yi't eb' sricoal siylab'oc. 25Ax smac jun chon̈b' cha, may xon b'a'n̈ 'oj macxoc, yujto c'uln̈ej 'a smasnil tiempo. Man̈x 'a 'ac'wl ta'. 26Ax eb' 'anma 'a junjn nacion̈ 'oj c'och eb' ta', 'oj laj yi't eb' sricoal siylab'oc ta'. 27May junc maysch'olnil sb'eyb'al 'oj c'och 'a yol jun chon̈b' cha. May junc mach tzb'on jun tzo'n̈ tas yajb'il yuj Dios 'oj c'och ta'. May pax junc 'a'm 'es 'oj c'och ta'. Cojn eb' tz'ib'b'ilx sb'i 'a jun libro yic q'uinl 'a jun 'ejmn̈ej, cojn eb' 'oj c'ochoc. A jun libro cha, yic jun tzcuch Calnelu.

Currently Selected:

Apoc 21: CSS

Highlight

Compare

Copy