Apoc 17

A jun 'ix yajl 'ajmul 'ix

1'Ay jun 'a eb' ángel 'ay svaso yucwn̈il 'ix jawi. 'Ix yaln 'ixtc 'ayin:

—Cotan̈, 'oj in ch'ox jun niwn yailal 'oj 'em 'a yib'n̈ jun 'ix yajl 'ajmul 'ix. Atn 'ix wocn q'ue 'a yib'n̈ jun tzo'n̈ a mar. 2A eb' niwc yajl 'a yolyib'n̈q'uinal, c'uxn sb'o eb' 'ajmulal yet' 'ix. Ax eb' 'anma 'a yolyib'n̈q'uinal, 'ix juw 'el eb' yu'uj. 'Icha to x'och eb' 'u'm 'an̈il yuj jun 'icha yal uva jawnc sti', a xyac' 'ix 'a eb', atn yajmulal 'ix, xchi 'ayin.

3Xlajw cha, 'ix sch'oxn Yespíritu Dios junx 'ayn 'a 'icha waychil. Ax jun ángel cha, in yi'n 'at 'a jun cusltac lu'um. Ata xwil jun 'ix 'ay q'ue 'a yib'n̈ jun noc' sb'i, chacchac yilx jun noc' cha. Ax 'a sniwnal, til wal sb'i 'aych 'a 'a. Caw maysch'olnil junjn sb'i chi 'a sat Dios. Uque sjolom, lajn̈e sch'a'ac. 4Ax spichl jun 'ix cha, q'uic'mucnac yet' chac. Til wal jun tzo'n̈ q'uen tzictzni yilx 'aych 'a 'ix. 'Ay oro, 'ay jun tzo'n̈ perla, yet' jun tzo'n̈ xo q'uen caw chan̈ stojl 'aych 'a 'ix. Yamb'il jun vaso nab'a oro yuj 'ix. B'ut'n yet' jun tzo'n̈ tas yajb'il yuj Dios, atn jun tzo'n̈ yajmulal 'ix cha. 5Ax 'a snan̈l sat, 'aych jun sb'i may mach 'ojtnac. Xchi jun sb'i chi 'ixtic: A niwquil Babilonia, snun eb' 'ix 'ajmul 'ix smasnil. Snun pax smasnil maysch'olnil 'a yolyib'n̈q'uinal, xchi. 6Ax xwilni, caw 'u'm 'an̈ 'ix yuj schic'l eb' yic xo Dios, atn eb' milb'il chamoc, yujto xyac' eb' testigoal sb'a yuj Jesús. Xcaw sat in c'ojl wiln jun cha. 7Yuj cha, xyaln jun ángel chi 'ayn 'ixtic:

—¿Tas yuj tzcaw sat a c'ojl eln jun tic? 'Oj wal 'ayach, tas tzyal 'el'ch jun 'ix tic, yet' jun noc' sb'i uque sjolm tic, lajn̈e pax sch'a'ac. 8A jun noc' sb'i 'ix el tic, 'ayc' 'a pecti', palta man̈x 'ayc 'ec' ticnec. Palta 'oj q'ue paxt 'a jun xab' olan, yic mantzac 'at 'a chaml 'a jun 'ejmn̈ej. Ax eb' 'anma man̈ tz'ib'b'ilc sb'i 'a jun libro yic q'uinal, yictax mantzac b'o yolyib'n̈q'uinal, caw 'oj sat sc'ojl eb' yiln jun noc' sb'i chi 'ayc' 'a pecti cha. Yujto wach'xam man̈x 'ayc 'ec' ticnec, palta 'oj jawc pax 'a scha'ejmal.

9Ax jun tzo'n̈ xo tic, a eb' 'ay sjelnal, 'oj nachjc 'el yuj eb'. A uque sjolm jun noc' sb'i cha, tzyal 'el'chi, a uque witz 'aj wocn 'ejm 'ix 'ajmul 'ix cha. 10An̈jtona a uque sjolm cha, tzyal 'el'ch paxi, 'ay ucwn̈ niwc yajal. A eb' yajl chi yucwn̈il, own̈ eb' tox x'eq'ui. 'Ay jun 'ayt 'och yajlil ticnec. 'Ayt pax junx tot 'oj 'ochoc. A yic 'oj 'och junx cha, man̈x najtloc tiempo 'oj yac' yajlil. 11Ax jun noc' sb'i 'ayc' 'a pecti', palta man̈x 'ayc 'ec' ticnec, atn jun swajxquil yajl cha. Yitb'eym sb'a yet' eb' ucwn̈ cha. 'Oj lajwc cha, ax s'atcn 'a chaml 'a jun 'ejmn̈ej.

12Ax lajn̈e sch'ac jun noc' sb'i cha, tzyal 'el'chi, lajn̈wan̈ niwc yajl mantzac yac' yajlil. Palta 'oj 'ajxc yopiso eb' yet' jun noc' sb'i cha, jab' wal tiempo 'oj yac' eb' yajlil yet'oc. 13A eb' lajn̈wan̈ cha, junn̈j 'oj yutc eb' snab'en ya'n yajlil. 'Oj yac' eb' spoder 'a jun noc' sb'i cha, ax ya'n pax eb' yopiso 'a 'a. 14Caw 'oj yac' eb' owl yet' jun tzcuch Calnelu, palta a 'oj 'a'nc ganar 'a yib'n̈ eb'. Yujto a jun tzcuch Calnelu cha, Yajl yaj 'a eb' yajal, sReyl pax eb' rey. Ax eb' 'ayc' yet'oc, 'awtb'il chan̈ eb' yuj Dios, sic'b'il 'el eb' yu'uj, atn eb' yiclum 'a 'a, xchi jun ángel chi 'ayin.

15Xlajw cha, xyaln pax 'ayn 'ixtic:

—A jun tzo'n̈ a mar 'ix ela, 'aj wocn q'ue 'ix 'ajmul 'ix, tzyal 'el'chi, atn jun tzo'n̈ chon̈ab', jun tzo'n̈ nacion̈, yet' eb' 'anma 'a junjn chucchc ti'al. 16Ax lajn̈e ch'ac 'ix ela, yet' jun noc' sb'i cha, 'oj meltzjc 'och eb' 'a jun 'ix 'ajmul 'ix cha. 'Oj yi'c eb' jantcn̈ej tas 'ay 'a 'ix. Caw 'oj 'elcn jitn 'ix. Ax schin pax eb' schib'jal 'ix, ax sn̈usn pax tz'a eb'. 17Yujto a Dios 'oj 'a'nc sb'o eb' 'icha tznib'ej. Yuj cha, junn̈j 'oj yutc eb' sb'on jun cha. Ax ya'n pax eb' yopiso 'a jun noc' sb'i cha. 'Ixta 'oj yutc eb', sec tz'el'ch tas yaljnac can Dios. 18A jun 'ix chi xel cha, atn jun niwquil chon̈b' tz'a'n yajlil 'a yib'n̈ eb' yajl 'a yolyib'n̈q'uinal.

Currently Selected:

Apoc 17: CSS

Highlight

Compare

Copy