Apoc 10

A ch'an̈ un̈ yet' jun ángel

1Xlajw cha, xwiln pax junx ángel 'a satcha'an̈, caw niwn spoder. 'Ix 'ejm 'a yolyib'n̈q'uinal. Oyn 'och 'asn 'a 'a, 'icha to a 'aych spichloc. A 'a sjolom, 'ay q'ue jun chacpan. A sat, caw tzictzni 'icha c'u. Ax yoc, 'icha snich c'ac' 'ixta yilxi. 2'Ayc' jun ch'an̈ yune un̈ 'a yol sc'ab', jacn ch'an̈. A yoc 'a swach', stec' 'ejm 'a yib'n̈ a mar. Ax yoc 'a surito, stec' 'ejm 'a sat lu'um. 3Xlajw cha, 'ix 'awji. Caw 'ip x'awj 'icha yel yaw no león. Ax yic xlajw yawji, 'ay pax uque tzc'an̈ c'u 'ix paxtini. 4Xlajwn̈ej spaxtin uque tzc'an̈ c'u cha, 'ijn xin tz'ib'j tas xwab'i, palta 'ay jun 'a satchan̈ 'ix aln 'ayn 'ixtic:

—A tas xyal uque tzc'an̈ c'u cha, ton̈j tza mol 'a a nab'en. Man̈ a tz'ib'oc, xchi 'ayin.

5Ax jun ángel te'n 'ejm yoc 'a yib'n̈ a mar yet' 'a sat lum cha, 'ix ya'n q'ue swach' c'ab' 'a satcha'an̈. 6Ax yic xpaxtini, 'ix slocn sb'i Dios pitzn 'a jun 'ejmn̈ej, atn jun b'ojnac satcha'an̈, sat lu'um, a mar, yet' jantcn̈ej tas 'ay 'a jun tzo'n̈ cha. 'Ix yaln jun ángel chi 'ixtic:

7—Man̈x 'oj 'ec' tiempo yel'ch tas nab'il yuj Dios. A yic 'oj syamn 'och jun yucl ángel yutz'n strompeta, ax yel'chi tas snajnac cha. A jun snajnac can cha, alb'il 'a eb' ya'mal servil, atn eb' schecab', xchi jun ángel cha.

8Ax jun 'ix aln 'ayn 'a satcha'an̈, xyaln jun 'ejm xo 'ayn 'ixtic:

—'Ixic, 'at chaj jun ch'an̈ yune un̈ jacan, atn jun 'ayc' 'a yol sc'ab' jun ángel te'n 'ejm yoc 'a yib'n̈ a mar, yet' 'a sat lu'um, xchi.

9Yuj cha, in 'at 'a jun ángel cha, xin c'ann ch'an̈ un̈ chi 'a 'a. 'Ix yaln 'ixtc 'ayin:

—Cha'aj, c'uxu. Caw chi 'oj 'och 'a yol a ti 'icha yalchab'. Ax 'a yol a c'ojol, caw c'a 'oj 'ajoc, xchi 'ayin.

10Xlajw cha, xin chan ch'an̈ un̈ chi 'a jun ángel cha. Xin c'uxni, caw chi x'och 'a yol in ti 'icha yalchab'. Ax 'a yol in c'ojol, caw c'a x'aji. 11Xlajw cha, 'ix alx pax 'ixtc 'ayin:

—Yowlal 'oj al jun 'ejm xo, tastc 'oj 'aj junjn c'aj 'anma', junjn nacion̈, junjn ti'al, yet' jun tzo'n̈ eb' rey, xchi 'ayin.

Currently Selected:

Apoc 10: CSS

Highlight

Compare

Copy