Sal 80
80
SALMO 80
Lesl yuj sc'anx scolwal Dios
A jun tic sb'it win Asaf tzc'anlb'ej junc mach tzjucb'tzan b'it
1Ach quilmal an̈ israel on̈ tic, ach 'aych 'och yilmalc eb' yin̈tl José, eb' 'icha a calnelu yaji, 'aych 'ec' 'a a despacho 'a snan̈l eb' querubín, 'ab' wal tas tzwala.
2Checlj ach cab' 'el 'a eb' yin̈tl Efraín, 'a eb' yic Benjamín yet' 'a eb' yic Manasés.
Cotn̈ muc'uc, wul coln̈ 'el yet' a poder.
3Ach qui Diosal on̈, colwjan̈ quet' on̈, sec tzon̈ q'uex c'och 'icha xon caj on̈. 'O'ch cab' pax a c'ojl 'ayn̈ on̈, sec tzon̈ colchj pax on̈.
4Mamin Jehová, qui Diosal ach on̈, tzta'n̈j oj smasnil, ¿b'a'n̈ to wal tzactj owx 'och 'ayn̈ an̈ a chon̈b' on̈ tic yic matz a chaj qui lesl on̈?
5A qui cusc'ojlal on̈ yet' yal qui sat on̈, a 'ix ac' qui b'ut'jub'oc on̈.
6On̈ ac' wal tzetzxoc yuj eb' 'anma 'ay 'a qui la'nil on̈, ax eb' 'ajc'ojl yajch 'ayn̈ on̈, caw wal tzon̈ sb'uch eb' on̈.
7Ach qui Diosal on̈, caw tzta'n̈j oj smasnil, colwjan̈ quet' on̈, sec tzon̈ q'uex c'och 'icha xon caj on̈. 'O'ch cab' pax a c'ojl 'ayn̈ on̈, sec tzon̈ colchj pax on̈.
A yab'xil jun te snun uva,*r* ch'oxnb'il yaj yuj chon̈b' Israel
8Mamin Jehová, a 'a Egipto 'ix 'ej cot jun te snun uva; 'ix a pechn 'el jun tzo'n̈ chuc nacion̈al 'a sat slu'um, ax 'a slum eb' chi 'ix awj can pax te uva cha.
9'Ix a'nej can 'aj 'ix awj te cha, caw wal yajn̈ej 'ix 'em sch'an̈l yib' te', xb'ut'j 'el sat lum lum chi yuj te'.
10C'uxn xmacchj 'el lum niwc witz yuj yen̈l te', yet' pax eb' te te niwc ste'il, 'ix macchj 'el eb' te yuj sc'ab' te'.
11'Ix c'och jen̈n sc'ab' te 'a sti a mar, ax te swol, 'ix c'och yen̈l 'a sti a niwn a Éufrates.
12¿Tas pax yuj 'ix ej can 'el scol-lal te'? Ax tz'aji a eb' b'eymal 'anma tzlaj ch'inn sat te'.
13Wan laj slipn no c'ultquil chitm yib' te'. Ax no calte'al noc', a no wan laj sc'uxn lajwc te'.
14Ach qui Diosal on̈, caw tzta'n̈j oj smasnil. Meltzjan̈ cot q'ueln 'ayn̈ on̈; cotn̈ q'ueln 'a satcha'an̈, tza nani tas tzotj te snun uva tic,
15atn te snun uva 'ix awj yet' a poder, ax eb' te swol, 'ix a'cn 'och yipnub' eb' te'.
16A mach tzu'n 'el te', mto eb' tzn̈usn tz'a'oc, cham cab' eb' yuj yowl a c'ojol.
17Cojn b'i'an, to tza b'achb't a c'ab' 'a yib'n̈ jun mach sic'b'il 'el o'oj, atn win rey to ach 'ix ac' yip.
18Toto 'ixta', man̈x 'a cab' b'a'n̈ 'oj qui'l qui nab'en 'ayach. Tza'n pax qui q'uinl on̈, sec cojn 'aych 'oj cal qui b'a on̈.
19Mamin Jehová qui Diosal ach on̈, caw tzta'n̈j oj smasnil. Colwjan̈ quet' on̈ sec tzon̈ q'uex c'och 'icha xon caj on̈. 'O'ch pax cab' a c'ojl 'ayn̈ on̈ sec tzon̈ colchj pax on̈.
Currently Selected:
Sal 80: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
