Sal 74
74
SALMO 74
Lesl yic tzcolchj 'el eb' chon̈ab'
A jun tic sb'it Asaf
1Ach qui Diosal on̈, ¿tas yuj on̈ actj can qui ch'ocj 'a jun 'ejmn̈ej? ¿Tas yuj caw tzn̈ilchj chan̈ yowl a c'ojl 'a yib'n̈ jun a chon̈b' tic?
2Nan̈ cot an̈ a chon̈b' on̈ tic on̈, to ach b'ojnacn̈ 'a yictax pecti'. On̈ a coln can 'eli, yic tzon̈ 'och yiclumal 'aych on̈. Na cot lum tzaln Sión, lum 'aj caj ach 'eq'ui.
3Cotan̈, wul 'ilt jun tzo'n̈ xjuw can 'el 'a jun 'ejmn̈ej tic; a eb' 'ajc'ojl 'ix ma'n can juwc smasnil tas 'ay 'a yol a cajnub'.
4Ach qui Diosal on̈, a eb' 'ajc'ojl yajch 'ayach, tzya'l eb' yaw yet' tzaljc'ojlal 'a yol a cajnub' 'aj qui chajnac qui b'a et'oc. Ax sbandera eb' chuc chon̈b'al a 'ix yac'q'ue eb' ta'.
5Lajn wal sc'an̈ eb' 'icha eb' c'atztzum 'a scal te niwc te'.
6A yet' q'uen ch'acab', yet' martillo 'ix smac' poj eb' te 'a'nte 'aych 'a yol a cajnub'.
7'Ix ya'n 'och eb' sc'a'l a cajnub'; caw xjuw 'el 'aj caljnac qui b'a 'aych on̈, x'em b'uln̈ can 'a sat lum yuj eb'.
8Snib'j eb' on̈ satl qui masnil on̈. C'uxn xya'ch eb' sc'a'l smasnil lugar 'a yol qui chon̈ab', 'a 'aj qui yamjnac qui b'a yic ca'n 'emmquilal 'aych ach qui Diosal on̈.
9Man̈x 'aj wach' quiln junc senya, man̈x 'a junc a checab', mant cojcoc pax on̈, jantcto tiempo 'oj yac' jun tic.
10Ach qui Diosal on̈, ¿b'a'n̈to wal 'oj 'och wan eb' 'ajc'ojl on̈ stzuntzn on̈? ¿B'a'n̈to wal 'oj 'och wan sb'uchwj eb' 'ayach?
11¿Tas yuj tza c'ub'j 'el a poder 'ayn̈ on̈? ¿Tas yuj matz ac' 'ip a satn 'el eb'?
12Palta yictax pecti', qui Reyl xon aj on̈; til wal 'ajtil 'ix ac' ganar owl 'a sat lum lum tic.
13Ach xa pojcn snan̈l a mar yet' a poder, xlaj a ma'nc poj sjolm no niwc noc' 'ay 'a yol a mar cha,
14'ix a te'cn 'ejm sjolm no niwquil Leviatán, xa'n can schi e no chiwjum noc' 'ay 'a cusltac lu'um.
15Ach xac' q'ueloc a a 'aj tzlaj paq'ui, yet' eb' a tzb'eyi, xa'n pax tup 'ejm a niwc a may xon 'aj tztupi.
16Ach 'ay ec c'ual yet' 'ac'wal, ach a b'ojnac can 'uj yet' c'u.
17Ach a'jnac can 'ejm stz'acan̈il 'aj tzlajw c'och yolyib'n̈q'uinal; ach aljnac cani to 'ay cuaresma yet' n̈ab'lq'uinal.
18Mamin Jehová, na coti chajtlto a eb' 'ajc'ojl yajch 'ayach, caw tzach stzuntzj eb', tzlaj yal eb' tu paxti 'ayach, tzach sb'uchn pax eb'.
19Man̈ ac' sat a c'ojl 'ayn̈ on̈. Yujto an̈ tic on̈, caw c'un on̈ 'icha no cowojte', man̈ on̈ ac' 'a yol sc'ab' eb' 'ajc'ojl lajn 'icha no chiwjum noc'.
20Na cot a trato a'jnac quet' on̈, yujto a 'a smasnil qui chon̈b' on̈, 'ayn̈j yet'l eb' tzb'on maysch'olnil.
21Man̈ a cha 'ixtxoc eb' 'emnc sc'ojlani, sec a eb' meb'a' yet' eb' 'emmquilal yeq'ui, 'oj yal eb' wach' paxti 'ayach.
22Ach qui Diosal on̈, col eb' ec xo yaji. Na coti chajtlto a eb' tu snab'en, caw tzach stzuntzjn̈ej eb'.
23Man̈ ac' sat a c'ojl 'a eb' tzmeltzj 'och 'ayach, caw tzq'ue somnjoc eb' yel yaw.
Currently Selected:
Sal 74: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
