Sal 58
58
SALMO 58
B'eyc'ojlal 'a eb' maysch'olnil
A jun tic sb'it David tzc'anlb'ej junc mach tzjucb'tzan b'it
1Ex yajal, ¿yel am wali tojl tzeyutj e b'eyc'ojlwi, tojl am wal tzeyutj eya'n 'och syailal eb' 'anma'?
2Ocxo jun, tze b'oyaj eb' yet' e tu nab'enal. 'I'm ex b'ey maysch'olnil 'a yol chon̈ab'.
3A eb' tzb'on maysch'olnil, 'ayt 'ec' eb' 'a yol sc'ojl snun, tzcuyn eb' tu nab'enal. A eb' 'a'm 'es, cojn tz'alj eb', tzcuyn sb'a eb' ya'n 'es cha.
4Lajn eb' yet' no chan 'ay svenenoal. Lajn eb' 'icha no niwc chan matz maclni yab'i'.
5Matz yab' no tas tzyal eb' tz'utz'n no', atn eb' jeln smontn no'.
6Mamin Jehová, in Diosal ach, 'ij 'el yip eb' 'icha tzyutj eb' 'anma sma'n 'el ye no león.
7Sat cab' 'ejm eb' 'icha tz'aj stup 'ejm a a tzb'eyi. Lajn cab' tz'aj eb' 'icha te c'ultc tzte'x yuj 'anma'.
8'Ulb'x cab' 'ejm eb' 'icha tzyac' no xoch 'a yol sjoxil, 'icha junc 'e'lti 'unin, mto 'icha junc 'unn chamnc xo tz'alji, matz yil xon jac sacq'uinal, 'ixta cab' tz'aj eb'.
9Lajw cab' 'ejm eb' mu'c 'icha te q'uix tzmolb'tzax 'och 'a yaln̈ chen, yajn̈ej tz'a 'ejmi. Toxn matz xej xon jun chen chi yu'uj.
10Ax eb' tojl sb'eyb'al, 'oj tzaljoc eb' yic 'oj 'ajxoc spac 'a eb' maysch'olnil sb'eyb'al, yic 'oj sb'on̈nc eb' yoc 'a schic'l eb' maysch'olnil cha.
11'Ixta to b'i'an ax yalx 'ixtic: Caw wal wach' yic eb' te'n xyutj sb'a sb'on tojlal. Caw yel 'ay jun Dios tzb'eyc'ojlan yolyib'n̈q'uinl tic, 'oj schioc.
Currently Selected:
Sal 58: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
