Sal 56
56
SALMO 56
A Dios tzwa'ch yipc in c'ojol
Sb'it David jun tic yic 'ix yamchj yuj eb' filisteo 'a chon̈b' Gat. A jun b'it tic tzc'anlb'ej junc mach tzjucb'tzan b'it.
1Ach in Diosal 'o'ch cab' a c'ojl 'ayin, yujto 'ay eb' 'anma tzin pechn b'eyc'oc. Junjn c'u tzya'n eb' owl wet'oc, tzin yixtn eb'.
2'A junjn c'u tzin spechn b'eyc'oc eb' 'ajc'ojl yajch 'ayn cha, caw niwn eb' tzyij chan̈ sb'a ya'n owl wet'oc.
3A yic 'ay in xiwc'ojlal, caw tzach wa'ch yipc in c'ojol.
4Mamin, caw tzach wa'ch yipc in c'ojol, tzwaln wach' paxti 'a tas aljnac, yuj cha, matz in xiwi. ¿Toc 'ayt wal 'oj in yutc eb' 'anma to chaml b'a yaji?
5Smasnil tiempo tzyal eb' ya paxti 'ayin, tznib'n eb' tzin juw 'eli, an̈j chi nan yuj eb'.
6Tzan 'ajtil tzyam sb'a eb', tzlaj sc'ub'nc 'el sb'a eb' yic tzin smacn eb', tzin stan̈wni eb', ax yec' a janic' tzin smiln eb' snani.
7¿Tom 'oj stac' s'at eb' 'elc yuj smul cha? Ach in Diosal, 'ij 'ejm eb' 'anma tic yet' yowl a c'ojol.
8B'isb'il o'oj jay 'ejm tzin 'elq'ui, ojtac jantc wal tzin 'aj woq'ui. Tz'ib'b'il jun tzo'n̈ tic oj 'a a libro.
9A eb' 'ajc'ojl yajch 'ayin, 'oj 'at eb' 'eloc yic 'oj in c'annc a colwal. Caw wojc si'mb'il to Dios ach, 'aych 'och wet'oc.
10Mamin Jehová, in Diosal ach, caw tzach wa'ch yipc in c'ojol, tzwaln wach' paxti 'a tas aljnac.
11Tzach wa'ch yipc in c'ojol, yuj cha, caw matz in xiwi. ¿Toc 'ayt wal 'oj in yutc eb' 'anma'?
12Ach in Diosal, 'oj in yiclc jun tzo'n̈ in ti 'ix wac' 'ayach, atn jun xajmb'al yic tzwaln yuj diosal 'ayach,
13yujto in a col 'a yol sc'ab' chamel, sec matz in 'em yuj eb' 'ajc'ojol. Axn̈ej 'a a sacq'uinlal tzin 'eq'ui, tza'n in q'uinal yic tzin b'eyc' jacx 'a ojltac.
Currently Selected:
Sal 56: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
