Sal 40
40
SALMO 40
Tzin nib'j yiclum in 'a in Diosal
(Sal 70)
Sb'it David jun tic tzc'an junc mach tzjucb'tzan b'it
1'Ix wac' techjoc in tan̈wni scolwal Jehová, 'ix smaclni yab' tas xwala.
2In yij q'uet 'a jun xab' oln to yic chaml yaji. In scoln paxi, sec matz in 'em socn̈joc 'a lum yax lu'um. A 'a yib'n̈ jun q'ue'en, ata in yac'q'ue lin̈an, sec ata tzin te'wtzej in b'a.
3'Ix ya'n in b'itnoc jun 'ac' b'it, jun b'it yic alj wach' paxti 'a Dios. Til wal eb' 'oj sat sc'ojl yiln jun tic. 'Oj laj xiw chan̈ eb', ax laj ya'noc 'och eb' Jehová yipc sc'ojol.
4Caw wach' yic eb' to a Jehová tzya'ch yipc sc'ojol: Matz ya'ch sb'a eb' 'a scal eb' tzb'on maysch'olnil, matz ya'ch pax sb'a eb' yet' eb' tzyac' 'ejm sb'a 'a jun tzo'n̈ comn dios.
5Mamin Jehová ach in Diosal, til wal jun tzo'n̈ tas satjub'tac yilx xa b'o'o, yet' jun tzo'n̈ a nab'en 'ix a nalb'ej cuj on̈. Tzin nib'j tzwal-l jun tzo'n̈ tic, palta matz techj waln 'eli, yujto 'ec'b'al 'a yib'n̈ smasnil tas tztac' walni.
6Ach tic matz a nib'j no noc' tz'ajx xajmb'alil, yet' jun tzo'n̈ xo tas tz'ajx ofrendail. May xon junc xajmb'al xa c'ana, no xajmb'al to tz'a smasnil, no xajmb'al yic tz'ajx lajwc mul. A eco' to 'ix a jac in chiquin sec yiclum tzwutj in b'a 'ayach.
7Yuj cha, 'ix waln 'ixtc 'ayach: Waj 'a tic ach in Diosal, 'icha wal yaj stz'ib'x can wab'xil 'a Ch'an̈ U'un̈.
8Caw tzchaj in c'ojl in b'on tas tza nib'ej, molb'il a checnb'il wuj 'a in nab'en, xin chi 'ayach.
9'Ix walcn 'el yab'xil a tojlal 'a scal eb' 'anma', atn 'aj tz'och niwc yamnil. Ojc wal si'mb'il chajtlto an tic, may 'aj xwactj waln 'el yab'xil a wach'c'ojlal.
10May 'ajtil xin c'ub'j 'el a tojlal. A wico', to 'ix walcn 'eli chajtlto tzac' 'el'choc tas tzala, yet' pax colnb'il tzac'a. May xon wal 'aj xin c'ub'j 'el a chamc'ojlal, yet' a wach'l 'a sat eb' a chon̈b' 'a 'aj tzyam sb'a eb'.
11Mamin Jehová, man̈ ach 'och wan a'n a wach'c'ojlal 'ayin. Tan̈wj in yet' a chamc'ojlal 'icha yaj alni.
12Yujto til wal tas tu tz'ec' 'a wib'an̈, man̈xtzac b'ischj wu'uj. Wan in telw can 'ejm yuj in mul tzwab'i. 'Ix 'och pax 'a yol in sat, 'ec'b'al xo sb'isl in mul chi 'a yib'n̈ xil in jolom, caw somc'ojlal xoj waji.
13'O'ch cab' a c'ojl 'ayn Mamin Jehová, coln muc'uc, cotan̈ wul coln 'eli.
14A eb' tznib'j tzin miln chamoc, yet' eb' tzin 'ixtni, q'uixw cab' can 'el eb', somchj cab' 'el eb', 'at cab' eb' 'elc yet' sq'uixwc'ojlal.
15A eb' tzin tzetzni, 'at cab' pax eb' 'elc yuj sq'uixwc'ojlal cha.
16Palta ax smasnil eb' tzyal sb'a 'ayach, tzalj cab' eb'. A eb' tznib'n a colwal, yal cab' eb' 'ixtic: A Jehová caw niwn yel'chi, xchi cab' eb'.
17Caw wal 'oltaquin, cusc'ojlaln̈ej waji; ach in Diosal cotn̈ muc'uc, wul colin. Ach tzach colwjn̈ej wet'oc. Caw man̈ e'c tiempo Mamin.
Currently Selected:
Sal 40: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
