Sal 39
39
SALMO 39
An̈ 'anman̈ec, caw jab' wal qui q'uinlec
Sb'it David jun tic tzc'an Jedutún yic tzjucb'tzan b'it
1An tic, tox xwala to tzin tan̈wj in b'a yet' in b'eyb'al, sec wach' matz 'och in mul yuj tas tzwala. 'Oj in tan̈wc in b'a 'a tas tzwala, ya' sb'a 'ayc' eb' 'anma tu sb'eyb'al 'a wojltac.
2Sictac in 'aji, wach'xam junc tas wach' may xon tas xwala. Ax in cusc'ojlal, 'ix wach' niwtj cha'an̈.
3'Icha wal to 'ix n̈ilchj chan̈ c'ac' 'a sn̈i in c'ojl xwab'i. A yic tzin nab'tan̈n cha, 'ix wach' niwtj jun c'ac' chi xwab'i. 'Ixta to b'i'an, caw 'ip in 'awj cha'an̈.
4Mamin Jehová, 'ac' wojcoc 'eli tas slajb' wico', jantcto tiempo 'ayn 'eq'ui. Tzin nib'j tzwojquej 'eli, jantcto wal jacx in q'uinal.
5Caw wal c'ochn 'ix otj can in q'uinal, 'icha to may jac yel'ch 'a a sat. Yel ton b'i'an, qui masnil an̈ 'anman̈ tic on̈, caw may yel'ch jab' qui q'uinl tic on̈.
6An̈ 'anman̈ tic, lajn yec' qui q'uinl 'icha wewen. Nab'an̈ej tzquixtj qui b'a qui molb'tzan qui ricoal, ax tz'aji, chucx mach 'oj lajnoc.
7Ax ticnec Mamin, ¿tas wach' tzin tan̈wej? Cojxn̈ej ach 'aych 'och yipc in c'ojol.
8Coln 'el 'a yaln̈ smasnil in mul, man̈ in a cha b'uchxoc yuj eb' tu snab'en.
9'Icha to matz tac' in paxtini, 'ixta xwutj in b'a, may tas xwala, yujto ach xa'ch jun tzo'n̈ yailal tic 'ayin.
10'Ijcan 'el in yailal 'ix a'chi, yujto wan in lajw 'ejm tzwab' yu'uj.
11Ach tzon̈ a cuy on̈, tza'n 'och qui yailal yuj qui mul on̈, 'icha to 'ijctac xo tzotjcan tas yel xo tzqui chamc'ojlej on̈. Qui masnil on̈, caw may yel'ch yec' qui q'uinal, lajn 'icha qui'n quic' jun 'ejmoc.
12Mamin Jehová, 'ab' wal in lesal, 'a' cot wal a chicn 'ayin yic tzwaln in b'a 'ayach. Man̈ ton̈joc tzach 'och q'ueln 'ayin yic tz'el yal in sat, yujto 'e'lb'a wec' 'a a sat, 'icha 'e'nc eb' in mam wicham.
13'Ij 'el a c'a'lc'ojlal 'a wib'an̈, 'ac' jacx in tzaljc'ojlal ya' sb'a mantzac in chami.
Currently Selected:
Sal 39: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
