Sal 38
38
SALMO 38
Lesl yuj sc'anx scolwal Dios
A jun tic sb'it David yic tzc'ann junc tas 'a Dios
1Mamin Jehová, man̈ in ac' cuenta yet' yowl a c'ojol, man̈ a'ch in yail yet' a c'a'lc'ojlal.
2Yujto 'ix 'och tz'apnjoc a jul-lab' 'ayin; 'ix a quil 'emt pax a c'ab' 'a wib'an̈.
3Yuj wal yowl a c'ojl 'a wib'an̈, yuj cha, smasnil in niwnal tic, caw ya yaji, may junc in b'acl wach', yujto 'ay in mul.
4A in maysch'olnilal cha, a quiln q'ue 'a wib'an̈, 'icha wal junc niwquil 'ictz matz techj yal-l wu'uj.
5Yuj wal in pital, yuj cha, lajwnac in, wan in c'a'i, 'ayx in jab'.
6Ñojn xoj waji tzin b'eyi, man̈x 'a tas tz'el walni, caw cusc'ojlal waj 'a smasnil tiempo.
7Til wal schiwj yich in patc yuj c'a'l yab'il, yaxn̈ej yoch 'a smasnil in niwnal.
8Caw choc' yaj in niwnal, man̈x 'a pax wip; tzin c'acw wab'n syail.
9Mamin, a wal yic si'sni sjaw in c'ojol, ojc wal smasnil tas tzin nib'ej, c'uxn tzel smasnil, may tas c'ultac yaj 'ayach.
10Caw wal tz'ib'x chan̈ in pixan, caw c'uxmtac yel wip, an̈jtona', x'och pax 'a in sat.
11Ax eb' in wach'c'ojol yet' eb' jun waj yet'oc, c'uxn xlaj 'el eb' 'a in tz'ey, yujto caw xniwtj in yailal.
12A eb' tzin nib'n milnc chamoc, tzlaj yac' 'ejm eb' yal 'a wojltac. A eb' tznib'n juwc 'el in nab'en, tzlaj b'ey sti eb' 'a in patic, sec tzin juw can 'el yuj eb'. Junjn c'u tzsayn eb' tas tzin yutej.
13Palta an xo tic, matz wab' tas tzyal eb', 'icha to macn in chiquin; 'icha pax to matz tac' in paxtini, may tas tzwala.
14Lajn in 'icha junc mach matz yab'i, matz tac' xon yaln sb'a, yic tzcoln sb'a 'a junc tas.
15Mamin Jehová, cojn ach tzach wa'ch yipc in c'ojol; in Diosal ach, 'oj in a ta'woc.
16Cojn jun tas tzwala, comnoc matz in stzetzj eb' 'ajc'ojl cha, may cab' eb' tzyij chan̈ sb'a yic tzin telw 'ejmi.
17Palta jab'xoj in telw 'ejm tzwab'i, man̈xtzac 'och wan jac in yailal tic.
18Yuj cha, 'oj wal q'uet in mul, yujto somchjnacn yuj in mul cha.
19A eb' 'ajc'ojl yajch 'ayin, pitzn eb', 'ay pax yip eb'. Caw tzniwtj pax sb'isl eb' matz in nib'n 'ilnoc, wach'xam may in mul 'a eb'.
20A tas wach' tzwutj 'a eb', tu tzyutj eb' spacn 'ayin; tzlaj 'och eb' 'ajc'ojlal 'ayin, yujto wach' tzwutj in b'eyb'al.
21Mamin Jehová, ach in Diosal, man̈ in actc can in ch'ocoj. Man̈ e'l a b'a 'a in tz'ey.
22Mamin, ach in Colmal, cotn̈ mu'c wul in a colo'.
Currently Selected:
Sal 38: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
