Sal 18

SALMO 18

B'it yic alj yuj diosal*r* 'a yic tz'ajx ganar owal

(2 S 22.1-15)

Sb'it win David jun tic 'a Dios, win schecb' Jehová yic 'ix colx 'el 'a yol sc'ab' eb' 'ajc'ojol, yet' 'a yol sc'ab' win rey Saúl. A jun tic tzc'an junc mach tzjucb'tzan b'it

1Mamin Jehová caw wal tzach in chamc'ojlej, ach 'aych 'och wipoc.

2'Icha to in n̈aq'uen aji, 'icha to in cuartel aji, in colmal ach, in Diosal ach, atn jun n̈aq'uen 'aj tzin col in b'a. Ach tzach wa'ch yipc in c'ojol, in tan̈mal aji, ach 'aych 'och wipoc, wen̈loc, yuj cha, matz in yamchj yuj eb' 'ajc'ojl yajch 'ayin.

3Mamin Jehová, smoj ton wal yalx wach' paxti 'ayach. A yic tzin 'awj 'ayach, yajn̈ej tzin a coln 'el 'a yol sc'ab' eb' 'ajc'ojl yajch 'ayin.

4A smay chamel, 'ix 'ec' oyyoc 'a in patic. 'Ix jaw xiwc'ojlal 'ayn yuj eb' milm 'anma', 'icha junc a 'elmal a caw 'ay yip.

5A chamel 'icha to 'ix 'och sut'n 'ayn 'icha lasu, 'icha to in syalej 'a junc ya'al.

6A yic 'ayn 'ec' 'a scal in somc'ojlal, xwaln in b'a 'a 'aych Jehová, xin c'ann a colwal ach in Diosal. 'Ix ab'n yel waw yic 'aych 'ec' 'a yol atut, 'ix c'och waw 'a a chiquin.

7Xlajw cha, 'ix 'ec' jun niwquil quixcab' caw ow, c'uxn xlaj 'ib'x smasnil sb'achnub'al yich eb' lum niwc witz, 'ix cham wal stzicb'tan̈x yuj yowl a c'ojol.

8'Icha to 'ix 'elt tab' 'a yol a n̈i', ax 'a yol a ti 'ix 'elt c'ac' yic tza satn 'el smasnil tas. 'Ix 'elt jupljoc stzac'ac' 'a yol a ti cha.

9Yajn̈ej ach cot 'a satcha'an̈, ach 'eml 'a tic, ax jun q'uic' 'asun a 'aych a te'nub'oc.

10Ach q'ue 'a yib'n̈ jun querubín, 'ix 'at jen̈n̈oc; 'ix 'at jen̈n̈oc 'a yib'n̈ 'ic'.

11Ax q'uic'q'uinal, a x'och en̈loc, 'ix a c'ub'j 'el a b'a 'a scal q'uic' 'asn 'aych yalil.

12Xlaj 'elt raya 'a ojltac, 'ix cot sacb'at 'a scal 'asun, yet' pax stzac'ac'.

13Ach Jehová caw niwn el'chi, 'ix 'el aw 'icha wal sc'an̈ c'u 'a satcha'an̈, yajn̈ej 'ix cot sacb'at yet' stzac'ac'.

14'Ix a juln cot a jul-lab' atn raya, ax eb' 'ajc'ojl yajch 'ayin, 'ix 'at eb' 'eloc, 'ix satl eb' o'oj.

15'Ix checlj chan̈ yich a mar o'oj, ax sb'achnub'al yaln̈ yolyib'n̈q'uinal 'ix 'ilxi, yujto caw 'ip ach 'awj Mamin Jehová, caw ow pax jun 'ic' 'ix a' coti.

16'Ix a b'ach cot a c'ab' 'ayn 'a satcha'an̈, 'icha to in ej q'uet yet' a c'ab' 'a xab'l yich a mar.

17In a colcn 'el 'a yol sc'ab' eb' 'ajc'ojl yajch 'ayin, atn eb' matz in nib'ni, yel xo wal 'ay yip eb' 'a wib'an̈.

18'Ix 'och oyn eb' 'ayin yic 'ayn 'och 'a 'ilc'ojlal, palta ach xo Mamin Jehová, ach 'och wet'oc.

19In a colcn 'elta, in a'n can 'a jun lugar caw lewan 'a 'aj may tzin 'i'ni, yujto tzin a chamc'ojlej.

20'Ix ac' spac wico', yujto wach' in b'eyb'al.

21Tzin b'eylb'ej a b'eyb'al Mamin Jehová. May 'ajtil xwij 'el in b'a 'a a tz'ey ach in Diosal yic tzin b'on tu'al.

22'Ayc'n̈ej smasnil a checnb'il 'a in nab'en, may xon 'aj 'ix wij 'el in nab'en 'a a ley.

23Caw wach'n̈j xwutj in b'eyb'al 'a ojltac, yujto xwij 'el in b'a 'a maysch'olnil.

24Yuj cha, xa pactzan in tojlal, yujto wach' in b'eyb'al 'a ojltac.

25Ach tic Mamin Jehová, tzac' 'el'choc a ti 'a eb' yiclum 'ayach; a eb' wach' snab'en, wach' pax tzotj a nab'en 'a eb'.

26Wach' tzotj a b'a 'a eb' wach' tzyutj sb'a 'ayach, palta tza ch'ox a jelnal 'a yib'n̈ eb' jeln yixtn 'anma'.

27Yujto ach tza col eb' 'emmquilal yeq'ui, ax pax eb' b'an̈quintac, ach tzejcan 'ejm eb'.

28Mamin Jehová in Diosal ach, ach tzac' sacq'uinl 'ayin, tze'n 'el q'uic'q'uinl 'ayin.

29Yet' a colwal ach in Diosal, ax wa'n owl yet' eb' soldado 'ajc'ojl yajch 'ayin, ax wec' 'a yib'n̈ smuroal schon̈b' eb'.

30Caw wal wach'n̈j a b'eyb'al Mamin Jehová qui Diosal on̈. A tas alb'il can o'oj, smoj wal ca'n 'och yipc qui c'ojl on̈, tza colcn 'el smasnil eb' to 'aych 'och yipc sc'ojol.

31May junc xo Dios, cojxn ach Mamin Jehová. ¿Tom 'ay junc comn dios tztac' on̈ scoln 'icha ach tic?

32Ach tzac' wip, tza b'on in b'eyb'al.

33'Icha wal sjelnal sb'ey junc no nun c'ultquil chej, 'ixta in b'ey o'oj; tza'n wip yic tzlaj in 'ec' 'a 'aj pa'ctac.

34Tzin a cuy wa'n owal, tza'n pax wip in pacb'tzan in jul-lab' to nab'a bronce.

35Mamin ach tzin a molo, tzin a coln paxi. A wal a wach' c'ab', a tzin yamn 'och wa'an. Yuj a wach' nab'enal, wach' tzin 'el'chi.

36Caw wach' jun b'e 'aj tzin ej b'eyoc, sec wach' matz in tench woc.

37'Ix in pech b'eyc'oc eb' 'ajc'ojl yajch 'ayin, 'ix yamchj eb' wu'uj, masnto xcham eb'.

38Choc' xwutj can eb', sec wach' man̈xtzac q'ue wan eb' jun 'ejm xo. 'Ix telw can 'ejm eb' 'a scal woc.

39Ach xac' wip yic xwa'n owal. A eb' 'ajc'ojl yajch 'ayin, 'ix ac' yic' 'ejm sb'a eb' 'a wojltac.

40A eb' 'ajc'ojl yajch 'ayin, 'ix 'at eb' 'elc 'a wojltac; 'ixtnta xwutj in satn can 'el eb' matz in nib'ni.

41'Ix cob' sc'an eb' colwal, palta may mach xcoln eb'. 'Ix cob' yal sb'a eb' 'aych Mamin Jehová, palta toc ach ta'w 'a eb'.

42Caw choc' x'aj eb' wu'uj. 'Icha wal pococ, 'ixta 'ix 'aj yijx 'at eb' yuj 'ic'. 'Ix in te'cn 'ejm eb' 'a sat lu'um, 'icha wal tz'aj ste'x can 'ejm b'i'ch 'a yoltc b'e.

43In a colcn 'el 'a yol sc'ab' eb' chon̈ab', in a'n 'och syajlilc niwc chon̈ab'. A eb' 'anma man̈ wojcoc, a eb' tzin 'a'n servil.

44A yic tzyab'n eb' tas tzwala, yiclum tzyutj sb'a eb' 'ayin, ax eb' chuc chon̈b'al, tzya'ch sb'a eb' in checb'oc.

45A eb' chuc chon̈b'al cha, xlaj xiw chan̈ eb', caw tz'ib'x eb' yic x'elt eb' 'a yol yet'l 'aj tzcob' scol sb'a.

46Mamin Jehová pitzn achn̈ej. Alx cab' wach' paxti 'aych ach in Colmal; 'ijx cab' chan̈ a b'i ach in Diosal, to in Colmal aji.

47Ach in Diosal, tza pactzej 'a eb' tzin 'ixtni, tza'n can 'och jun tzo'n̈ chon̈b' 'a yol in c'ab'.

48Tzin a coln 'el 'a eb' 'ajc'ojl yajch 'ayin, yet' 'a eb' maysch'olnil sb'eyb'al. Tzin a coln pax 'a eb' matz 'o'ch sc'ojl 'ayin.

49Yuj cha, tzwaln wach' paxti 'aych 'a scal eb' 'anma 'a junjn nacion̈, tzin b'itnan pax a b'i.

50O'oj tzwa'n ganar niwc owl an reyn tic, yujto sic'b'iln 'el o'oj. Yuj a chamc'ojlal tzach 'och wet' an David in tic, yet' pax 'a eb' win̈tl 'a smasnil tiempo.

Currently Selected:

Sal 18: CSS

Highlight

Copy