Sal 17
17
SALMO 17
Tzc'anx swach'c'ojlal Dios
Slesl David jun tic
1Mamin Jehová 'ab' wal tas tzwal 'ayach, 'ochn̈ wal q'ueln 'ayin, yic tzwaln in b'a 'ayach. Maclj wal ab' in lesal, yujto man̈ in c'ayncoc wa'n 'es.
2Ach tztac' alni to may in mul, yujto caw ojtac to caw tojl in nab'en.
3Ach tic Mamin, caw ojtac tas 'ayc' 'a in nab'en. 'A junjn 'ac'wal tzwul in a b'eyc'ojlani, tzin a'n prowal, palta may in mul tz'ilchj o'oj. May 'aj 'ix wal jun tzo'n̈ paxti to man̈ smojc walni.
4Xwij 'el in b'a 'a sb'eyb'al eb' tzcomn meltzj 'och 'a yit 'anma'il. Tzin yiclj wal 'icha yaj aln cani.
5Caw te'nn̈ej xwutj in yiclni a paxti', may xon 'aj in 'el 'a a tz'ey.
6Ach in Diosal tzin tew wal 'ayach, yujto wojtac to tzab' tas tzwala. Mamin, 'a' cot a chicn 'a tas tzwala.
7Ch'ox wal a chamc'ojlal to caw satjub'tac yilx 'ayin, yujto ach tza col eb' 'anma tzsayn 'ec' a colwal yuj eb' 'ajc'ojl yajch 'a 'a.
8'Icha wal tzyutj junc mach sya'iln sc'ul yol sat, 'ixta tzin otej. C'ub'j in 'el yet' a poder, 'icha tzyutj no caxtiln̈ smoyn yune'.
9Coln 'el 'a eb' tu snab'en tzin 'ixtni, yet' 'a eb' 'ajc'ojl tzin sayn 'eq'ui yic tzin smiln cham eb'.
10Yujto matz 'o'ch sc'ojl eb' 'a yit 'anma'il, niwc winc tzyutj paxtinc sb'a eb'.
11Caw oyn xo 'och eb' 'ayin, tan̈b'il in telw 'ejm yuj eb'.
12Lajn eb' 'icha no león lachn 'ejmi yic tz'elt jucnjoc syam schib'ej.
13Mamin Jehová cotan̈, mac sjaw eb' 'ajc'ojl yajch 'ayin, 'ac' telwc 'ejm eb'. Coln 'el yet' a poder 'a yol sc'ab' eb' maysch'olnil snab'en.
14Coln 'el 'a yol sc'ab' eb' 'anma cojn tas 'ay 'a yolyib'n̈q'uinl tic 'aych yipc sc'ojol. 'A' cot yailal 'a yib'n̈ eb', atn jun yailal to yic xon eb' yaji, yamchj c'och cab' yunnal eb' yet' yixchicn eb'.
15Palta an xo tic, yujto tojl in nab'en, 'oj ach wil yet' in sat; man̈x 'a tas 'oj in na', yic 'oj in pitzw pax chan̈ 'a ojltac.
Currently Selected:
Sal 17: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
