Sal 119

119

SALMO 119

Alj wach' paxti yuj sley Dios

Jun#Sal 119 A jun Salmo tic pojb'il snan̈al, 22 macn̈ yaji; wajxque versículo yaj junjn macan̈. Junjn macan̈, tzchaj 'el yich yet' junjn letra hebrea 'a stzolil, yujto 'ay 22 letra tzc'anlb'ax 'a hebreo, ax ticnec, a qui b'islab' x'och 'a 'a.

1Mamin Jehová, a eb' tojl sb'eyb'al 'a a sat, wach' yic eb', yujto tzb'eylb'ej eb' a cuynb'il.

2Wach' yic eb' tzyiclni tas tzala, yujto 'a smasnil sc'ojl eb', tzchan eb' yab'i',

3atn eb' may jac maysch'olnil tzb'o'o, eb' to tzb'ey wal 'a stojlal.

4Mamin, ach 'ix al 'a eb', to yowlal tz'acn tzb'eylb'ej eb' a checnb'il.

5Comnoc wal te'n tzwutj in b'a, sec wach' tzwutj in yiclni a checnb'il tic.

6Toto 'ixta', matz in q'uixwi yic tzin nan cot smasnil a checnb'il cha.

7Yet' wal stojlal in nab'en, ax waln in wach' paxti 'ayach, yic tox xcuychj 'el a ley to tojl tic wu'uj.

8Tzin nib'j in yiclc a checnb'il tic Mamin, palta man̈ in actc can in ch'ocoj.

Cha'ab'

9¿Tas wal smoj sb'on win quelem, sec tojl tzyutj win sb'eyb'al? Cojn to tzyiclj a paxti'.

10'A smasnil in c'ojol tzin 'och tza'n o'oj, yuj cha, man̈ in a cha wi'l in nab'en 'a a checnb'il.

11Tzin mol a paxti 'a in nab'en, sec matz 'och in mul 'ayach.

12Caw wach' a nab'en Mamin Jehová, cuyin sec 'oj stac' wojcan 'el a checnb'il tic.

13Smasnil jun tzo'n̈ a ley alb'il can o'oj, 'oj wal-l eb' 'a scal in b'it.

14Caw tzin tzalj in yiclni a checnb'il, yujto 'ec'b'al 'a yib'n̈ smasnil ricoal.

15A 'a checnb'il tic, 'oj in na cot 'a junjn rato, ax wa'n 'och in nab'en in b'eylb'ani.

16Caw tzin tzalj yet' jun tzo'n̈ a checnb'il tic. May wal b'a'n̈ 'oj sat in c'ojl 'a a paxti'.

'Oxe'

17'Ac' in q'uinl an a checb' in tic, sec wach' 'oj wutc in yiclni a paxti'.

18Jac wal in sat, sec 'oj wojcoc 'el satjub'tacl tas tzyal a cuynb'il.

19Ton̈j 'e'lb'a wec' 'a sat lum lum tic, 'ac' wojcoc 'el a checnb'il.

20'A junjn rato tzin nib'n tzwojquej 'el tas tzyal a ley.

21Ach xa tench wan eb' 'e'nc 'a yib'an̈, yet' eb' maysch'olnil snab'en, atn eb' xyij 'el snab'en 'a a checnb'il.

22An tic 'ix wa'ch in nab'en 'a a checnb'il, yuj cha 'ij 'el snab'en eb' tzin patquiln can 'eli, yet' eb' tzin tzuntzni.

23Wach'xam a eb' yajal, tz'em oyn eb' smol aloc tas tzin yutej, palta an a checb' in tic, caw tzin na cot jun tzo'n̈ a checnb'il 'a junjn rato.

24Caw tzin tzalj in cuyn tas tzal tic, yujto a tz'a'n in nab'en.

Chan̈e'

25A wal tzwutj wab'ni, to wan xo in chami, palta 'ac' wal in q'uinl 'icha wal yaj aln 'a a paxti'.

26'Ix wal 'ayach tas wal yilx in b'eyb'al, yuj cha, in a ta'wni. Ax ticnec, cuyn 'a jun tzo'n̈ a checnb'il tic.

27'Ac' nachjc 'el wu'uj, tas wal tzwutj in b'eylb'an jun tzo'n̈ a checnb'il tic, sec 'oj in na cot satjub'tacl a nab'en.

28Caw tzlajw in pixn tzwab' yuj cusc'ojlal, palta ach xo tzac' ste'nal in nab'en, 'icha yaln a paxti'.

29'Ij in 'el 'a jun b'eyb'al yic 'a'j 'es, yuj a wach'c'ojlal tzin a cuyn 'a a cuynb'il.

30'Ix in sayn 'ec' jun b'e yic tojlal, ax a ley, a tzin nib'j wojcoc 'eli.

31Mamin Jehová, 'ix wa'ch in nab'en 'a jun tzo'n̈ a checnb'il tic; man̈ a chach q'uixwc'ojlal 'ayin.

32'Oj wac' 'ip in b'eylb'an jun tzo'n̈ a checnb'il tic, yujto tzac' wal in tzaljc'ojlal.

O'e'

33Mamin Jehová, cuyn 'a jun b'eyb'al tzyal jun tzo'n̈ a checnb'il tic, yujto tzin nib'j in b'eylb'oc masnto 'a slajub'.

34'Ac' in nab'en, sec wach' tzwutj in b'eylb'an jun cuynb'il tic; 'oj in yiclc 'a smasnil in c'ojol.

35'Ij in 'at 'a jun b'eyb'al tzyal jun tzo'n̈ a checnb'il tic, yujto a 'a spatquil, ata tzjaw in tzaljc'ojlal.

36'Ac' wojcoc 'eli, to a cab' a checnb'il tzin yiclej, palta man̈oc cab' ricoal tzin nib'j 'ochi.

37Man̈ in a cha 'och tza'n yuj jun tzo'n̈ comn dios; 'ac' in tzatzil, sec tzin b'eylb'ej tas tza nib'ej.

38A cab' 'ayn a checb' in tic, ata tzac' 'el'choc jun tzo'n̈ a paxti alb'il can oj 'a eb' to yiclum 'ayach.

39Yuj jun tzo'n̈ a ley caw wach', tu yaln eb' 'anma 'a in patic. Coln 'el 'a jun tzo'n̈ spaxti eb' cha, atn jun tzo'n̈ 'aj tzin xiwi.

40Caw tzin nib'j jun tzo'n̈ a checnb'il tic; 'ac' in q'uinal, yujto caw tojl a nab'en.

Waque'

41Mamin Jehová, ch'ox wal a chamc'ojlal 'ayin, yet' pax a colwal, 'icha wal yaj aln can 'a a paxti'.

42Toto tzac' 'el'choc jun tzo'n̈ a paxti 'aych yipc in c'ojl cha, to 'ixta', 'oj stac' wa'n spac 'a eb' tzb'uchwj 'ayin.

43May cab' b'a'n̈ tzcan waln jun tzo'n̈ a paxti to yel, yujto a jun tzo'n̈ a ley cha, a 'aych yipc in c'ojol.

44'Oj in yiclc a cuynb'il chi 'a smasnil tiempo. Jun 'ejmn̈ej to tzwa'ch in nab'en 'a 'a,

45sec tzaljc'ojlal xoj tzin b'eyq'ui. Man̈x 'a tas tzin na'a, yujto xin yiclj a checnb'il.

46'Oj wal jun tzo'n̈ tas tzal tic 'a yojltac eb' rey, ma'oj in q'uixw walni.

47Caw tzin chamc'ojlej a checnb'il, a pax 'a 'a, ata tzwij in tzaljc'ojlal.

48Tzin nib'j wal in chamc'ojloc jun tzo'n̈ a checnb'il tic, 'oj in na cot jun tzo'n̈ a ley tic.

Uque'

49Na cot jun tzo'n̈ a paxti a'jnac 'ayn an a checb' in tic, atn 'a eb' 'aj xwa'ch in nab'en.

50A jun tzo'n̈ a paxti tic, a eb' tz'a'n in q'uinal, a eb' tz'a'n sniwnal in c'ojol, yic 'ay in cusc'ojlal.

51A eb' b'an̈quintac tzin laj sb'uch eb', til wal tzyutj eb' yaln 'ayin, palta man̈ yujoc cha, tzwij 'el in nab'en 'a a cuynb'il.

52Mamin Jehová, xin na cot jun tzo'n̈ a ley 'a yic pecti', a 'a eb' ata xwij sniwnal in c'ojol.

53A eb' 'anma maysch'olnil sb'eyb'al, tzyactj can eb' a cuynb'il, yuj cha, caw tzcot wowl yuj eb'.

54A jun tzo'n̈ a checnb'il tic, a eb' xwa'ch in b'itc 'a tzann̈j 'aj 'ayn 'eq'ui.

55Mamin Jehová, 'a junjn 'ac'wal tzach in nan cot 'a 'aj tzin laj 'ec' cha, yujto tzin yiclj a cuynb'il.

56Caw 'ay in tzaljc'ojlal, yujto tzin yiclj smasnil a checnb'il cha.

Wajxque'

57Mamin Jehová, a tas 'ayc' 'ayin, ach toni; yuj cha, xwalni to 'oj in yiclc a paxti'.

58Wal 'a smasnil in c'ojol, 'ix waln in b'a 'ayach; 'ay cab' a chamc'ojlal 'ayin, 'icha yaln a paxti'.

59'Ix in sayn wil in b'eyb'al, yuj cha, xin yamn 'och in yiclni tas tzala.

60Caw yajn̈j cha, xin yiclni jun tzo'n̈ a checnb'il tic, may niwn tiempo xwij 'eq'ui.

61'Ix 'och wal oyn eb' 'anma maysch'olnil 'ayin, yic tzin ya'n telwc eb' snani, palta man̈ yujoc cha, 'ix sat in c'ojl 'a tas tzyal a cuynb'il.

62A 'a yic chim'ac'wal tzin q'ue wan wac' yuj diosal 'ayach, yujto caw tojl jun tzo'n̈ a ley tic.

63An tic, witb'eym in b'a yet' eb' tzyal sb'a 'ayach, atn eb' tzyiclni a checnb'il.

64Mamin Jehová, caw wal tzcheclj 'el a chamc'ojlal 'a sat lum lum tic, an xo tic, cuyn 'a jun tzo'n̈ a checnb'il tic.

B'aln̈e'

65Mamin Jehová, caw wach' a nab'en 'ayn an a checb' in tic, 'icha wal yaln a paxti'.

66Cuyn 'a wach' nab'enal yet' 'a jelnal, yujto an tic, tox 'ix wa'ch in c'ojl 'a jun tzo'n̈ a checnb'il tic.

67A yic mantzac 'och in yailal, til wal tas maysch'olnil xlaj in b'o', palta ax ticnec, a 'a paxti tzin yiclej.

68Caw wach' a nab'en Mamin, wach' tas tza b'o'o; cuyn 'a jun tzo'n̈ a checnb'il tic.

69A eb' b'an̈quintac, til wal 'es paxti tzyal eb' 'a wib'an̈; an xo tic, caw tzin yiclj a checnb'il 'a smasnil in nab'en.

70'Ix juw 'el snab'en eb' yuj jun tzo'n̈ maysch'olnil cha, palta an xo tic, to tzin tzalj yet' jun tzo'n̈ cuynb'il tic.

71'Ay swach'il yic in 'och 'a in yailal, yujto ata xin cuy a checnb'il.

72A jun tzo'n̈ a checnb'il 'ix alcn tic, 'ec'b'al swach'l 'a yib'n̈ jaye'oc mil q'uen oro mto q'uen plata.

Lajn̈e'

73Mamin Jehová, ach ton wal b'ojnaquin, yuj cha, 'ac' nachjoc 'el wu'uj, tas wal tzwutj in cuyn a checnb'il.

74A eb' tzyal sb'a 'ayach, caw 'oj tzaljoc eb' yic tzin yiln 'och eb', yujto a 'a paxti tzwa'ch yipc in c'ojol.

75Wojc wal si'mb'il, to a jun tzo'n̈ a ley tic caw tojl eb', yujto 'ay wal yel'chi, yuj cha, tzin a'n 'och 'a in yailal.

76Ax ticnec, a cab' a chamc'ojlal tz'och sniwnalc in c'ojol, yujto 'ixta yaln a paxti'.

77Ch'ox a cham'c'ojlal 'ayin, tza'n pax in tzatzil, yujto 'ay in tzaljc'ojlal yuj a cuynb'il tic.

78'El cab' sq'uixwel eb' b'an̈quintac, yujto tzin sb'uch eb' 'a nab'an̈ej, an xo tic, to a 'a checnb'il tzin nib'j in cuyu'.

79A eb' tzyal sb'a 'ayach, jaw cab' eb' 'a in tz'ey, eb' to 'ojtnacx jun a cuynb'il tic.

80Te'n cab' yaj in nab'en 'a jun tzo'n̈ a checnb'il tic, sec may b'a'n̈ tzwac' in q'uixwloc.

Uxlche'

81Til wal in nib'n tas wal tzin otj in a colni; yuj cha, xwa'n 'och a paxti yipc in c'ojol.

82Caw wal tzactzj yol in sat in tan̈wni wila', b'a'n̈ tz'el'ch tas tzyal a paxti tic, yuj cha, xwaln 'ixtic: ¿B'a'n̈ pax tzwul ac' sniwnal in c'ojl jun? xin chi.

83Yujto an tic, 'icha to man̈x 'a wel'ch yuj 'ichmal, palta man̈ yujoc cha, tzsat in c'ojl 'a a checnb'il.

84¿Jantcto wal tiempo 'oj wil an a checb' in tic? ¿B'a'n̈to wal 'oj a b'eyc'ojloc eb' tzchichn 'och 'ayin?

85A eb' b'an̈quintac, eb' matz ya'ch sc'ojl 'a jun tzo'n̈ a cuynb'il tic, b'ob'ilx in jul-l yuj eb'.

86Coln 'el 'a yol sc'ab' eb', yujto ton̈j tzchichn 'och eb' 'ayn 'a nab'an̈ej. Ax pax a checnb'il, yeln̈j pax eb' smasnil.

87Jab'xoj ma'in satl yuj eb', palta ma'ix sat in c'ojl 'a a checnb'il.

88'Ac' in q'uinl Mamin yujto tzin a chamc'ojlej, ax in yiclni a checnb'il alb'il can o'oj.

Lajchwe'

89Mamin Jehová, a 'a paxti tic may 'aj tzjelmji, te'n yaj 'a satcha'an̈.

90A 'a chamc'ojlal 'ayc'n̈ej 'a smasnil tiempo; ach xa b'o lum lum tic, wach' 'ix otj can 'a yet'ul.

91Smasnil tas b'ob'il can o'oj, wach' yaj 'a yet'l 'icha yaj aln cani, a jun tzo'n̈ tic, wan a c'anlb'an eb'.

92Q'uinloc a jun tzo'n̈ a cuynb'il tic, matz yac' eb' in tzaljc'ojlal, toto 'ixta', lajwnacn xo 'el yuj in somc'ojlal.

93May b'a'n̈ 'oj sat in c'ojl 'a jun tzo'n̈ a checnb'il tic; yujn̈ej eb', 'ay in q'uinl o'oj.

94Coln Mamin, yujto ec waji, caw 'ix wa'ch in c'ojl 'a jun tzo'n̈ a checnb'il tic.

95A eb' maysch'olnil snab'en 'a in patquil, tan̈b'il yuj eb' b'a'n̈ tzin satli, palta an xo tic, caw 'aychn̈ej in nab'en 'a jun tzo'n̈ a cuynb'il tic.

96'Ix wila to a smasnil tas, man̈ tz'acnoc 'a swach'il, ax pax jun tzo'n̈ a checnb'il tic, man̈x yalnb'ilc swach'l eb'.

'Oxlajn̈e'

97Mamin, man̈ jantcoc tzin chaml yet' a cuynb'il tic. 'A junjn c'u tzin cuyni.

98A jun tzo'n̈ a checnb'il tic, a eb' x'a'n sjelnal in nab'en 'a yib'n̈ eb' 'ajc'ojl yajch 'ayin, yujto 'ayc' eb' 'a in nab'en.

99'Ec'b'al tas xnachj 'el wuj 'a yib'n̈ eb' cuyjnac in, yujto xwa'ch in nab'en in cuyn jun tzo'n̈ tas alb'il can o'oj.

100'Ec'b'al tas xnachj 'el wuj 'a yib'n̈ eb' 'ichmtac winac, yujto tzin yiclj jun tzo'n̈ a checnb'il tic.

101'Ix wij 'el in b'a 'a jun tzo'n̈ b'eyb'al maysch'olnil, sec tztac' in yiclni a paxti'.

102Ma'ix wij 'el in b'a 'a jun tzo'n̈ a ley tic, yujto ach in a cuy 'a 'a.

103A jun tzo'n̈ a paxti tic, yel xo wal chi 'a yib'n̈ no yal chab'.

104A 'a spatq'uil jun tzo'n̈ a checnb'il tic, ata xwij 'elt in nab'en; yuj cha, caw matz in nib'j jun tzo'n̈ b'eyb'al yic 'a'j 'es.

Chan̈lajn̈e'

105A 'a paxti', a sacq'uinl yaj 'a wojltac 'icha yoc junc cantil, a tz'a'n sacq'uinl 'a yol in b'e 'aj tzin b'eyi.

106'Ix wac' in ti', to yowlal 'oj in yiclc tas xwala', yuj cha, 'oj in b'eylb'oc jun tzo'n̈ a ley tic, yujto tojl eb'.

107Mamin Jehová, caw wal tzcus in c'ojl tzwab'i; 'ac' wal in tzatzil, 'icha wal yaln a paxti'.

108Tzin tew wal 'ayach, to tza chaj 'in wach' paxti tz'el 'a in c'ojl walni, tzin a cuyn 'a jun tzo'n̈ a ley tic.

109'Ayn xo 'ec' 'a yol sc'ab' chamel, palta man̈ yujoc cha, sat in c'ojl 'a a cuynb'il.

110A eb' maysch'olnil snab'en, 'ix cob' yac' 'ejm eb' syal 'a wojltac, palta ma'ix wij 'el in nab'en 'a a checnb'il.

111A jun tzo'n̈ a paxti 'ix al 'ayin, a chi tzwa'ch yipc in c'ojl 'a smasnil tiempo, yujto a 'a eb' 'aj tzwij in tzaljc'ojlal.

112'Ix wa'ch in nab'en in yiclni jun tzo'n̈ a checnb'il tic, masnto 'a slajub'.

Olajn̈e'

113A eb' 'anma chab'sat yaji, caw tzin chac in b'a yet' eb', palta ax jun tzo'n̈ cuynb'il tic, caw tzin chamc'ojlej eb'.

114Ach ton 'aych 'och wet'oc, in Colmal aji; a 'a paxti tic, a tzwa'ch yipc in c'ojol.

115'El cab' eb' maysch'olnil snab'en tic 'a in tz'ey, yujto tzin nib'j in yicl a checnb'il ach in Diosal.

116Mamin, 'ac' wip 'icha yaln a paxti', sec wach' matz in q'uixw 'el yet' tas 'aych yipc in c'ojol.

117Colwjan̈ wet'oc sec tzin colchj cani; caw tzin tzalj yet' jun tzo'n̈ a cuynb'il tic 'a smasnil tiempo.

118'Ix a patquilj can 'el eb' xyij 'el snab'en 'a a checnb'il, yujto a stu nab'enal eb', may xon jac yel'chi.

119'Icha tz'aj c'alem sjulx 'eli, 'ixta 'ix otj e'n 'el smasnil eb' maysch'olnil snab'en 'a sat lum lum tic, yuj cha, tzin chamc'ojlan jun tzo'n̈ cuynb'il tzal tic.

120Mamin, a 'in niwnal tic, tz'ib'x yuj xiwlal 'a ojltac, yujto caw niwn yel'ch a ley 'a in sat.

Waclajn̈e'

121A tas wach' yet' tas tojol, a chi tzin b'eylb'ej, yuj cha, man̈ in ac' 'a yol sc'ab' eb' 'ajc'ojl yajch 'ayin.

122'Ochn̈ in tan̈malc an a checb' in tic; man̈ in ac' yixtc eb' b'an̈quintac.

123Caw tzjuw yol in sat in tan̈wni wila', b'a'n̈ tzin a col-li, ¿b'a'n̈ wal tzin a col-l 'icha yaln a paxti'?

124Wach' tzotj a nab'en 'ayn an a checb' in tic, 'icha yaj in a chamc'ojlani. Cuyn 'a jun tzo'n̈ a checnb'il tic.

125An tic a checb' waji, 'ac' sjelnal in nab'en, sec tzwojquej 'el jun tzo'n̈ a cuynb'il tic.

126Mamin Jehová, stiempoal xo wal a'n cuenta eb' may yel'ch a cuynb'il 'a sat.

127An xo tic, yel xo wal tzin chamc'ojlej jun tzo'n̈ a checnb'il tic 'a yib'n̈ q'uen oro caw wach'.

128Tzin b'eylb'ej jun tzo'n̈ a checnb'il tic, ax smasnil b'eyb'al to man̈ yeloc, xin yajcn 'el eb'.

129Caw satjub'tac yilx jun tzo'n̈ a checnb'il tic; yuj cha, tzin moln pax eb' 'a in nab'en.

130A yic tzcham wal yalx jun tzo'n̈ a paxti tic, a tz'a'n sacq'uinal, tzya'n jawc snab'en eb' 'anma 'emmquilal yeq'ui.

131Caw wal tzin nib'j jun tzo'n̈ a checnb'il tic 'icha snib'n junc mach yu'n a a yuj tacn̈ti'al.

132'Ilt in 'och Mamin, 'o'ch cab' a c'ojl 'ayin, 'icha tzac' yet' eb' tzach chamc'ojlani.

133Quetzn b'ey yet' a paxti', man̈ in a cha 'ajxoc ganar yuj maysch'olnil.

134Coln 'el 'a yol sc'ab' smaysch'olnilal eb' 'anma', yujto tzin nib'j in yiclc jun tzo'n̈ a checnb'il tic.

135Wach' cab' wilx an a checb' in tic 'a a sat, cuyn pax 'a jun tzo'n̈ a ley tic.

136Caw tzb'ey yal in sat woq'ui, yujto matz yiclj eb' 'anma jun tzo'n̈ a cuynb'il tic.

Wajxclajn̈e'

137Mamin Jehová caw wal tojl a nab'en, ax jun tzo'n̈ a ley tic, caw wach' eb'.

138Smasnil tas alb'il can o'oj, caw tojl eb', smoj wal tzwa'ch eb' yipc in c'ojol.

139Caw tztac in c'ojl wiln 'och eb' 'ajc'ojl yajch 'ayin, yujto may yel'ch a paxti 'a eb'.

140A jun tzo'n̈ a paxti tic, niwn ton wal yel'ch eb'. Yuj cha, tzin chamc'ojlan eb' an a checb' in tic.

141'Emmquilal 'anma 'in, toc 'ay jac wel'chi, palta ma'ix wac' sat in c'ojl 'a a checnb'il.

142A 'a tojlal 'ayc' 'a smasnil tiempo, ax jun tzo'n̈ a cuynb'il tic, caw yel eb'.

143'Ix wil cusc'ojlal yet' yailal, palta ax a checnb'il, a x'a'n in tzaljc'ojlal.

144A jun tzo'n̈ a paxti alb'il can oj tic, caw tojl eb'. 'Ac' jawc in nab'en, sec 'ay in tzatzil.

B'aln̈lajn̈e'

145Mamin Jehová, yet' smasnil in nab'en 'ix waln in b'a 'ayach, ta'wj in, yujto tzin nib'j in yiclc a checnb'il tic.

146A 'aych xwal in b'a, colwjan̈ wet'oc sec 'oj stac' in yiclni tas tzal tic.

147A yic mantzac sacb'i tzin q'ue wan in c'an a colwal wet'oc, yujto tzwa'ch a paxti yipc in c'ojol.

148An̈jtona', pitzn inn̈ej tz'ec' 'ac'wal, tzlaj in nan cot jun tzo'n̈ a paxti tic.

149Mamin Jehová, 'ay cab' a chamc'ojlal ab'n in paxti', 'ac' wal in q'uinl 'icha yaj a tojlal.

150A eb' 'anma tzin pechn b'eyc'oc, caw la'n yaj eb' 'a in tz'ey yet' stu nab'enal, palta caw najt yajl eb' 'a jun tzo'n̈ a cuynb'il tic.

151Mamin caw la'n 'aj 'a in tz'ey, ax smasnil jun tzo'n̈ a checnb'il tic, caw yel tas tzyal eb'.

152Niwn xo tiempo wojcan 'el jun tzo'n̈ a paxti tic, to 'ayc'n̈ej eb' oj 'a smasnil tiempo.

Junc'al

153'Ilt in cot 'a scal in yailal, tzin a colni, yujto ma'ix wac' sat in c'ojl 'a jun tzo'n̈ a cuynb'il tic.

154Coln 'a yol sc'ab' in yailal tic, tza'n in q'uinl 'icha yaln a paxti'.

155A eb' maysch'olnil sb'eyb'al, najt yajl eb' 'a stz'ey jun colnb'il tic, yujto matz ya'ch eb' sc'ojl 'a a checnb'il.

156Mamin Jehová, caw niwn jun tzo'n̈ a wach'c'ojlal tic, 'ac' wal jacx in tzatzil, yujto tojl a nab'en.

157Til wal eb' 'ajc'ojl yajch 'ayin, tzin cob' yixtc eb' snani, palta an xo, matz wij 'el in nab'en 'a jun tzo'n̈ a paxti tic.

158A eb' 'anma chab'sat yaji, caw tu wiln 'och eb', yujto matz yiclj eb' a paxti'.

159'In tzela to caw tzin chamc'ojlej jun tzo'n̈ a checnb'il tic, 'ac' in q'uinl 'icha wal yaj in a chamc'ojlani.

160A smasnil tas alb'il can oj 'a a paxti', caw yeln̈j eb', may b'a'n̈ to 'ay slajb' eb'.

Junschawinac

161May in mul, palta in spech b'eyc'oc eb' niwc yajal, ax a paxti', caw wal niwn yel'ch 'a in sat.

162Caw tzin tzalj yet' a paxti tic, 'icha junc mach tz'ilchj nan̈loc tumn yu'uj.

163Matz in nib'j jun tzo'n̈ 'es, caw wal tzin yajl eb', ax a cuynb'il a chi tzin chamc'ojlej.

164'A junjn rato tzwaln in wach' paxti 'ayach, yujto tojl yaln jun tzo'n̈ a ley tic.

165A eb' tzchamc'ojlan jun tzo'n̈ a cuynb'il tic, caw junc'ojlal yaj eb', yuj cha, may tas 'oj 'a'nc telwc eb'.

166Mamin Jehová, tan̈b'il a colwal wu'uj, yujto tzin b'eylb'ej jun tzo'n̈ a checnb'il tic.

167Caw tzin yiclj tas alb'il can 'oj tic, yujto caw wal tzin chamc'ojlej.

168Tzin yiclj a checnb'il yet' smasnil tas tzala, caw ojc pax yilx smasnil in b'eyb'al.

Chab'schawinac

169Mamin Jehová, 'ix c'och wal yel waw 'a ojltac, jawc cab' in nab'en 'icha yaln a paxti'.

170C'och cab' in lesl 'a ojltac, coln 'icha wal yaj aln can 'a a paxti'.

171Til wal cab' wach' paxti 'oj stac' waln 'ayach, yujto in a cuy 'a jun tzo'n̈ a checnb'il tic.

172'Oj in b'itn cab' yuj tas alb'il can o'oj, a smasnil a paxti', caw wal tojl eb'.

173Lista cab' yaj a c'ab' in a colni, yujto tzin nib'j jun tzo'n̈ a checnb'il tic.

174Mamin Jehová, tzin nib'j wal to tzin a colo, yujto 'ay in tzaljc'ojlal yet' jun tzo'n̈ a cuynb'il tic.

175Tzin nib'j to pitzn in, sec tztac' waln in wach' paxti 'ayach, ax a tojlal a tzcolwj wet'oc.

176In satc' 'icha tzyac' junc no calnelu tzsatq'ui, ach xo in a sayq'ui. In 'ilchj o'oj, yuj cha, matz wac' sat in c'ojl 'a jun tzo'n̈ a checnb'il tic.

Currently Selected:

Sal 119: CSS

Highlight

Copy