Sal 103
103
SALMO 103
Alj wach' paxti 'a Jehová
Sb'it David jun tic
1Wal 'a smasnil in c'ojol, 'oj wal in wach' paxti 'a Jehová.
2Tzwal in wach' paxti 'a 'a, a swach'c'ojlal 'ayin, may b'a'n̈ 'oj 'at satc'ojlal wu'uj.
3Yujto tzyac' niwnc'ojlal smasnil in mul, tzya'n b'oxc in c'ojol yic 'ay in yailal.
4A tzin coln 'el 'a yol sc'ab' chamel, tzin schamc'ojlani, tz'o'ch pax sc'ojl 'ayin.
5A tz'a'n tas wach' tzin c'uxu, yuj cha, coynto tzin quelmax pax tzwab' 'icha junc no salt'iw.
6A Jehová tojl tzyutj sb'onyaj junc mach tz'ixtx yuj eb' 'ixtm 'anma'.
7'Ix yac' 'ojcaxc 'el snab'en yuj Moisés, ax sb'ob'en satjub'tac yilxi, 'ix sch'ox yil eb' schon̈ab'.
8Caw wach' snab'en Jehová, c'un yo'ch sc'ojl 'ayn̈ec, man̈ comnoc tzcot yowal, yujto caw 'ay schamc'ojlal.
9Man̈toc junjn rato tzon̈ stumnec, man̈ smasnilc tiempo 'ay cot yowal.
10Ma'oj yac' qui tup lajwquec qui mul mto qui maysch'olnilalec, 'a 'icha wal yoclemal.
11Yel xo wal niwn schamc'ojlal 'a eb' yiclum 'a 'a, 'icha wal schan̈il yajb't satchan̈ 'a yib'n̈ lum lum tic, 'ixta schamc'ojlal chi 'a eb'.
12Caw wal najt 'ix ya'cn 'at qui mulec yic 'ix yi'n 'el 'ayn̈ec, 'icha wal snajtil scal 'aj tzq'uel c'u yet' 'aj tz'ejm paxi, 'ixta 'aj x'at ya'cni.
13'Icha wal yo'ch sc'ojl junc mamb'il 'a yunnal, 'ixta yo'ch sc'ojl Jehová 'a 'ayn̈ an̈ yiclum on̈c 'a 'a.
14Yujto yojtac tas 'ajnc on̈c qui b'o'i, a yet' lum pococ b'ob'iln̈ec.
15A qui q'uinlec an̈ 'anman̈ec tic, lajn wal 'icha sq'uinl te c'ultac; tzq'uib' cha'an̈, tznichni;
16ax yic tzjaw 'ic' tzma'n can tacjoc, 'ixta tz'aj satx can 'ejm te 'a yet'l cha.
17Palta a schamc'ojlal Jehová, may slajb' 'a 'ayn̈ to yiclum on̈c 'a 'a. A swach'c'ojlal 'ayc'n̈ej 'a yib'n̈ quin̈tlec b'aq'uin̈;
18'ayc' 'a yib'n̈ eb' tzyiclni strato, atn eb' matz yac' sat sc'ojl 'a schecnb'il.
19A Jehová sb'o sdespacho 'a satcha'an̈, ax ya'n Yajlil 'a yib'n̈ smasnil yolyib'n̈q'uinal.
20Ex yángel Jehová to 'ay eyip, alc e wach' paxti 'a 'a, ex to yiclum ex 'a tas tzyala.
21E masnil ex 'aj satcha'an̈, alc e wach' paxti 'a Jehová, yujto wan eya'n servil 'icha tznib'ej.
22¡Alx cab' wach' paxti 'a Jehová yuj smasnil tas b'ob'il yuj 'a yol smacb'en!
¡'A smasnil in c'ojol, 'oj wal in wach' paxti 'a Jehová!
Currently Selected:
Sal 103: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
