Sal 10
10
SALMO 10
Lesl yuj tzc'anx scolwal Dios
1Mamin Jehová, ¿tas wal yuj najt tzej can 'el a b'a? ¿Tas yuj tza c'ub'j 'el a b'a yic stiempoal 'ay yailal?
2A eb' tzb'on maysch'olnil caw tzyij chan̈ sb'a eb', tz'och eb' 'ajc'ojlal 'a eb' 'emmquilal yeq'ui; palta mun a eb' 'oj syaloc sb'a yet' jun sch'an̈ yal tzb'o cha.
3Mamin Jehová, a eb' tzb'on maysch'olnil, tzyij chan̈ sb'a eb' yet' tas tznib'j 'ochi. A eb' tznib'j 'och smasnil tas, tzb'uchwj eb' 'a 'ayach, tzach spatquiln can 'el eb'.
4A eb' tu sb'eyb'al may xon el'ch 'a sat, caw niwn yel'ch eb' snani, man̈ ach 'ayc' 'ec' 'a snab'en eb'.
5Caw tu tas tzb'o eb' 'a smasnil tiempo; matz nachj 'el yuj eb', toto ach 'oj a b'eyc'ojloc eb'. Tzpatquiln can 'el eb' smasnil eb' 'ajc'ojl yajch 'a 'a.
6Tznan eb' 'ixtic: May xon b'a'n̈ 'oj quem an̈ tic, may pax b'a'n̈ 'oj jawc somc'ojlal 'ayon̈, xchi cob' eb'.
7Cojn catb' paxti tzyal eb', tzlaj ya'n eb' 'es, tzlaj xib'tw eb' yet' spaxti', an̈j maysch'olnil tzyal eb'.
8Tzcomn 'ec' eb' ma'wjoc 'a eb' yit 'anmal 'a stitc 'el aldea, tzlaj milxoc cham eb' may smul 'a c'ultacl yuj eb', q'uelnn̈ej 'och eb' 'a eb' matz uj scoln sb'a.
9-10'Icha junc no león 'aych 'a yol sn̈aq'ue'en, tz'em lachan, tzb'in sb'a, tz'e'x lin̈n̈oc, 'ixta wal tzyutj eb' sc'ub'n 'el sb'a 'a yic tzmacn eb' yec' eb' 'emmquilal yeq'ui. Ax yic tzyamchj eb' yuj eb', tzyi'n 'at eb'. 'Ixta tz'aj syamchj eb' matz tac' scoln sb'a cha.
11Tznan eb' maysch'olnil chi 'ixtic: Satnc sc'ojl Dios 'ayon̈, chuc 'aj q'ueln 'ati, matz on̈ yil xon jab'oc, xchi eb'.
12Mamin Jehová, cotan̈. Colwjan̈ yet' 'a poder 'a eb' 'aych 'a somc'ojlal.
13Ach in Diosal, ¿tas yuj tza chaj to tzach spatquilj can 'el eb' maysch'olnil? A snan eb' to ma'oj a b'eyc'ojloc eb'.
14Ach wal 'ix ela to maysch'olnil tas xlaj sb'o eb', yuj cha, ach 'oj a pactzoc 'a eb'. Ach tzach colwj 'a eb' meb'a 'unn chamnc smam tzyal sb'a 'ayach.
15Mac' wecchjoc sc'ab' eb' tzb'on maysch'olnil. 'Ac' yowlal smaysch'olnilal eb' cha, tz'acn cab' tzyutj eb' stojn lajwc smul.
16Mamin Jehová Reych 'a jun 'ejmn̈ej. A jun tzo'n̈ chuc nacion̈al, 'oj 'ijxoc 'el eb' 'a sat lum a lu'um.
17Ach wal tzab' slesl eb' 'emmquilal yeq'ui, tza'n ste'nal eb', tzab'n pax tas tzyal eb'.
18Ach tza b'oyaj eb' meb'a 'unn chamnc smam, yet' eb' 'anma tz'ixtxi, yic wach' a eb' 'anma tu snab'en, eb' to chamlb'a yaji, man̈xtzac xib'tx eb' 'emmquilal yec' yuj eb'.
Currently Selected:
Sal 10: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
