Pr 31
31
Spaxti win Lemuel
1A spaxti win rey Lemuel, caw wal niwn yel'chi. A 'a jun tzo'n̈ paxti tic 'aj cuyb'il win yuj snun. Yaljnac 'ix 'a win 'ixtic:
2Ach wune', a Dios ach 'a'n 'ayin, yuj spac tas xin c'an 'a 'a.
3Man̈ ac' juwc 'el a b'a yuj eb' 'ix 'ix; yujn̈ej eb' 'ix, til wal ewin rey tzjuw 'el sb'eyb'al.
4Ach Lemuel, man̈ wach'oc toto 'oj oc' te 'an̈ caw ow. Man̈ smojc pax yu'n eb' et yajlil te 'an̈ cha,
5axta laj x'aji, tz'at satc'ojlal ley eyu'uj. Toq'ue yuj cha, ax eyixtn eb' 'anma 'emmquilal yeq'ui.
6A cab' eb' 'aych 'a syailal tz'u'n te 'an̈ cha, eb' 'aych 'a somc'ojlal,
7sec 'oj sat sc'ojl eb' 'a tas tzyutj sb'a. Man̈x 'oj sna cot eb' smeb'a'il yet' syailal.
8'Ac' a b'a yuj eb' matz uj yaln sb'a; colwjan̈ 'a eb' may mach tzcolni.
9'Ac' ep a b'onyaj eb' 'a stojlal; col eb' meb'a', yet' eb' 'emmquilal yeq'ui, xchi 'ix 'a winac.
A 'ix 'ix wach' snab'en to c'asn paxi
10A 'ix 'ix wach' snab'en to c'asan, man̈ comnoc tz'ilchj 'ix; yel xo wal niwn yel'ch 'ix 'a yib'n̈ q'uen q'uen caw chan̈ stojol.
11Caw wal yipc'ojlal yaj 'ix yuj yichmil, may 'aj tzap tas 'ay tz'och yuj 'ix 'a yet'ul.
12Tzaljc'ojlal yaj yichmil 'ix yuj 'a smasnil tiempo.
13Tz'at 'ix sman lana, yet' te lino ch'al; yet' wal smasnil sc'ojl 'ix tzch'alw 'ix.
14'Icha junc te barco najt tzyij cot chon̈, 'ixta 'ix, caw najt tzsay cot 'ix tas 'ay tz'och yu'uj.
15A yic 'ayt sacb'i tzq'ue wan 'ix, tzlaj ya'nc wa 'ix eb' yune', yet' eb' 'ix schecb' cajb'il yu'uj.
16Tz'at yilcn 'ix junc lum yet' sat, 'ixta to b'i'an tzmanni, ax stumn tzyac' ganar cha, a tzya'lb'ej yic tz'awx 'ejm yuva.
17Caw tzb'o sb'a 'ix, caw wal tzyac' 'ix yip smunlji.
18Tzcham wal yiln tas tz'aj sb'ey schon̈, sc'ual yac'wlil smunlji.
19Tzch'alwi, tzjalw paxi.
20Caw wal 'ela 'a eb' meb'a', yet' 'a eb' 'ay tas sc'a'l tz'och yu'uj.
21A yic tzya'n si'ic, matz 'och 'il yuj eb' yune', yujto caw wach' yajch spichl eb'.
22Mun tzb'o 'ix sc'u tzc'u'ej; a wal pichl caw wach' a tzya'chi, tzb'o 'ix yet' te ch'al púrpura mto lino.
23A win yichmil 'ix cha, caw wal 'ojcab'il win si'mb'il yuj eb' yajl 'a schon̈ab', 'aych win stz'acb'oc eb' niwc winc 'a yol schon̈b' cha.
24Tzb'o 'ix pichul yet' jalul, ax 'a eb' chon̈m nip, axta tzlaj schon̈ 'ix.
25Caw te'n yaj 'ix, niwn yel'ch 'ix 'a sat eb' 'anma', toc 'ay tas tzna 'ix yuj tas 'ay tz'och yuj 'a smasnil tiempo.
26Caw wal jeln spaxtini, yet' wal schamc'ojlal tzcuywji.
27'Aychn̈ej 'ix yiln tas sb'ey yol yatut, may 'ajtil ton̈j tz'ec' tiempo yuj 'ix.
28A eb' yune 'ix cha, yet' win yichmil 'ix, tzyal eb' wach' paxti yuj 'ix, tzyaln eb' 'a 'ix 'ixtic:
29Til wal eb' 'ix 'ix caw wach' sb'eyb'al, palta cojn ach tic, yel xo wal wach' a b'eyb'al 'a yib'n̈ eb' 'ix 'ix smasnil, xchi eb'.
30A eb' 'ix 'ix wach' yilx yet' sniwnal, 'ay 'ajtil ton̈j montnub'l yaj eb' 'ix. A swach'l yilx sat eb', yajn̈ej tzjelmj yilxi, palta a 'ix 'ix to 'ay yel'ch Jehová 'a sat, smoj wal to niwn yel'ch 'ix.
31Calc wach' paxti 'a 'ix 'a sat smasnil 'anma'; alx cab' wach' paxti 'a 'ix yuj smasnil tas tzb'o'o.
Currently Selected:
Pr 31: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
