Pr 3
3
A tz'aj yi'n junc mach sjelnal
1Ach wunnal, man̈ ac' sat a c'ojl 'a jun tzo'n̈ in cuynb'il tic, molcn jun tzo'n̈ in checnb'il tic 'a a nab'en,
2sec 'oj najtxb'oc a q'uinal, caw tzaljc'ojlal 'oj eq'ui.
3Man̈ actc can a b'eylb'an chamc'ojlal yet' yiclumal, molcn wal 'a a nab'en, man̈ ac' sat a c'ojl 'a 'a.
4Toto 'ixta', caw tzalj Dios et'oc, ax ach sb'inan pax eb' 'anma'.
5Yet' wal smasnil a c'ojol, tza'n 'och a nab'en 'a Jehová, man̈ a'ch a jelnal yipc a c'ojol.
6Na cot Jehová yet' smasnil tas tzlaj a b'o', sec a 'oj e'n 'at 'a jun wach' b'eyb'al.
7Man̈ a na', chajtlto caw yel xo jeln ach; 'ay cab' yel'ch Jehová 'a a sat, 'ij 'el a b'a 'a scal maysch'olnil.
8Toto 'ixta', a Jehová 'oj 'a'nc a tzatzil, ax ya'n ste'nal a niwnal.
9'Ac' yofrendail smasnil tas 'ay 'ayach, yuj e'n chan̈ sb'i Jehová. Tza'n pax yofrendail sat awb'en tzb'ab'l 'el-li.
10Toto 'ixta', 'oj b'ut'jc a c'un̈a yuj sat awb'en cha, caw 'oj b'ut'joc pax yet'l yal a uva.
11Ach wunnal, a yic tzach ya'n cuenta Jehová, man̈ a na' to may yel'chi. Man̈ ach tzactzjoc, yic tzach stenn 'och wa'an.
12Yujto a eb' chamc'ojlbil yuj Jehová, caw tzyac' cuenta eb' 'icha wal tzyutj junc mamb'il ya'n cuenta yunnal to tzalj yet'oc.
13Caw tzaljc'ojlal yic junc mach tzyij sjelnal, tzq'uib' pax snab'en.
14Yujto yel xo caw wach' jun chi 'a yib'n̈ q'uen plata, 'ec'b'alto swach'l 'a yib'n̈ q'uen oro.
15A jelnal cha, yel xo wal 'ec'b'al yel'ch 'a yib'n̈ q'uen q'uen man̈x jantcoc sja'l yilxi, matz tac' slajb'tzax yet' jun tzo'n̈ tas caw wal nib'b'il.
16Toto tzqui b'eylb'ej jelnal, tznajtxb'i qui q'uinal, tzon̈ 'och ricoal, caw niwn tzon̈ 'aj 'el'ch yu'uj.
17Toto tzqui b'eylb'ej jelnal, caw tzaljc'ojlal tzon̈ 'eq'ui; 'ay pax qui junc'ojlal yu'uj.
18Toto tzqui b'eylb'ej jelnal, caw wal 'ay qui q'uinl yu'uj, caw tzaljc'ojlal quico', toto tzqui molcn jun jelnal chi 'a qui nab'en.
19A yet' sjelnal, yet' swach' nab'enal Jehová, 'ix sb'on satcha'an̈, yet' lum lum tic.
20Yuj sjelnal cha, tzpac' q'uet eb' a a', tzcot pax n̈ab' 'a scal 'asun.
21Ach wunnal, man̈ ac' sat a c'ojl 'a a jelnal yet' 'a a wach' nab'enal, man̈ e'l a sat 'a 'a.
22Toto 'ixta, 'oj najtxb'oc a q'uinal, caw wach' 'oj el'ch 'a sat eb' 'anma'.
23Caw junc'ojlal 'oj eq'ui, may tas 'oj e'ni.
24A yic 'oj elji, may junc tas 'aj 'oj a xiwi, caw tzaljc'ojlal 'oj a wayi.
25Ma'oj a xiwi, toq'ue tza na'a to 'ay junc tas 'ay smay 'oj jawc 'a eb'n̈ 'icha tz'aj sjaw 'a yib'n̈ eb' maysch'olnil sb'eyb'al.
26Yujto a Jehová tza'ch yipc a c'ojol, ma'oj ach scha 'ejm yuj junc ya'al.
27Man̈ a b'asc junc tas 'a junc mach tznib'j tzach colwj 'a 'a. Toto 'ay tas 'ay 'a yol a c'ab' tzela, 'ac' 'a jun cha.
28Toto tztac' a colwj xon 'a mu'c tzela, man̈ al 'a jun et 'anmal chi 'ixtic: Paxan̈, at q'ui'n tzwac' 'ayach, man̈ xa chioc.
29Man̈ a na a b'on junc tu nab'enal 'a junc et 'anmal tzaljc'ojlal cajn 'a a tz'ey.
30Man̈ ac' owl yet' junc mach, toto may tas tu tzyutj 'ayach.
31Man̈ a nib'c 'och ricoal 'icha tzyutj sb'a eb' matz 'o'ch sc'ojl 'a yit 'anma'il, man̈ ach 'och tza'n 'a sb'eyb'al eb' cha.
32Yujto matz tzchaj sc'ojl Jehová eb' maysch'olnil snab'en, palta ax eb' wach' sb'eyb'al, caw tzalj yet' eb'.
33Tzya' cot Jehová catb' 'a yib'n̈ eb' maysch'olnil, palta ax eb' wach' sb'eyb'al, a yaxilal tzya' cot 'a yib'n̈ eb'.
34A Dios tzchac sb'a yet' eb' b'an̈quintac yeq'ui, ax 'a eb' 'emmquilal yeq'ui, tzyac' swach'c'ojlal 'a eb'.
35A eb' tzb'eylb'an jelnal, caw 'oj 'ijxoc chan̈ eb', ax eb' matz b'on wach' nab'enal, 'oj q'uixwc can 'el eb'.
Currently Selected:
Pr 3: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
