Pr 22
22
1Yel xo wach' toto wach' qui b'inaxec 'a yib'n̈ pax to til wal q'uen oro, mto q'uen plata 'ay 'ayn̈ec.
2A eb' rico yet' eb' meb'a', lajnn̈ej yel'ch eb', a Jehová xb'on eb'.
3A mach 'ay snab'en, tzyil tas 'ay smay, yajn̈ej tzcoln sb'a 'a 'a; ax junc may snab'en, ton̈j tzwach' 'at 'a yojltac, masnto tz'ejm yuj yailal.
4Toto tzquijec 'ejm qui b'a, yet' 'ay pax yel'ch Jehová 'a qui satec, 'oj qui chac ricoal, 'oj qui b'inaxec, ax yajx najtxb'oc qui q'uinlec.
5A 'a yol sb'e eb' maysch'olnil, til wal q'ui'ix yet' ch'an̈ yal 'ay 'ejmi, ax eb' tzya'ilj sb'a, ma'oj can eb' 'a jun tzo'n̈ ch'an̈ yal cha.
6Cuyc eb' 'unn 'a wach' b'eyb'al, sec ax yic 'oj 'och eb' 'ichm 'anma'il, ma'oj yi'l eb' snab'en 'a jun cuynb'il tic.
7A eb' rico, 'icha junc rey 'ixta yaj eb' 'a scal eb' meb'a', a eb' tz'a'n tumn majnil, yajl yaj eb' 'a scal eb' tz'och majan.
8A mach tzb'on jun tzo'n̈ tas man̈ tojloc, cojn yailal 'oj jawc 'a yib'an̈, man̈x 'oj stac' yixtx eb' yit 'anmal yu'uj.
9A mach 'ela 'a yit 'anma'il, 'oj scha wach'il, yujto tzpojc' tas tzc'ux 'a scal eb' meb'a'.
10Toto tzquijec 'el eb' ch'an 'a qui calec, tztup 'ejm tejb'ail, owal, yet' chacjb'ail.
11A win rey caw tzalj win yuj junc wach' nab'enal, tzch'ox win swach'c'ojlal 'a mach wach' spaxtini.
12A mach 'ay snab'en, tan̈b'il yuj Jehová, palta tztenc' tas tzyal eb' 'a'm 'es.
13A mach 'isaj, tzyal cob' 'ixtic: 'Ay jun no león 'a yol b'e, snib'j no in smil chamoc, xchi; tzyal 'ixta', yujto matz nib'j munljoc sb'a.
14A spaxti junc 'ix 'ix tzmuln 'a yol sc'ab' yichmil, lajn spaxti 'ix 'icha xab'l yich junc jul, ata tz'atcn eb' tzcatb'tzax yuj Jehová.
15A man̈ nab'enal 'aychn̈ej 'a eb' 'unin, ax yic tzma'x eb' yet' jixc'ab'te', tz'el jun chi 'a eb'.
16A mach yuj snib'n 'och sb'a ricoal, yuj cha, tzyixtn eb' meb'a', yet' junc mach tz'a'n junc tas 'a eb' rico yic tzmontn eb', a eb' cha, 'oj lajwc 'ejm yuj meb'a'il.
A lajn̈schawinc nab'en
17Sictac tzex 'aj e maclni eyab' jun tzo'n̈ tic, tzcham wal e cuyn cani. 'Oj ex in cuy 'a tas yaljnac can eb' jeln snab'en.
18Wach' toto tze molcn 'a e nab'en, yic wach' tztac' eyalb'tan̈n smasnil.
19A ticnec, tzwa'cn eyojcoc 'eli, sec tzeya'ch e c'ojl 'a Jehová.
20Tic tzin tz'ib'j can lajn̈schawinc paxti tic 'ayex; a jun tzo'n̈ paxti tic, 'ay nab'en, 'ay pax jelnal yet'i.
21Toto 'oj e cuyu', 'oj eyojcoc 'el tas wach' yet' tas yel, sec caw wach' tzeyutj eyaln 'a eb' tzc'anb'n yab' 'ayex.
Jun
22Man̈ eyixtc eb' meb'a' yujto matz tac' scoln sb'a eb', man̈ eyixtc pax eb' to matz uj scoln sb'a 'a sat eb' yajal,
23yujto a Jehová 'oj colnoc eb', ax 'oj 'a'noc spac 'ayx yuj tas tze b'o cha.
Cha'ab'
24Man̈ ex 'och tza'n yuj eb' 'anma amancotn snab'en, yet' eb' c'un scot yowal,
25toto ma'ay, ax 'oj 'ajoc, ax e cuyn stu b'eyb'al eb' cha, 'icha to 'oj e jal cham e b'a.
'Oxe'
26Man̈ eya'ch e b'a fiadoral yuj sb'oc junc xo mach,
27toq'ue may tas wach' eya'n stojloc junc cha, ax 'oj 'ajoc, 'oj 'ijxoc 'ec' e ch'at 'aj tzex wayi.
Chan̈e'
28Man̈ e t'un̈ smon̈jonal slum qui mam quichmec b'ob'il can yu'uj.
O'e'
29Toto wach' tzeyutj munljoc e b'a, 'oj eyoch munljoc 'a jun tzo'n̈ munljel niwc yel'chi, man̈oc 'a jun tzo'n̈ comn munljel 'aj 'oj e munlji.
Currently Selected:
Pr 22: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
