Pr 13
13
1A eb' 'unnab'il wach' snab'en, tzchaj eb' yab' tennb'il tzyal smam 'a 'a; ax eb' tzyij chan̈ sb'a, matz chaj eb' yab'i'.
2Toto wach' qui nab'enec, wach' tas 'oj qui cha spacc tas tzcalec; ax toto 'ixtm on̈c 'anma', a owl tzquijec cot 'a quib'an̈.
3Toto tzqui nac qui b'a qui paxtini, mun an̈ tzqui tan̈wjec qui b'a; ax toto tz'e'x 'a yib'n̈ qui paxtinec, mun an̈ec tzquixtj 'el qui b'a.
4A eb' 'isaj, 'ay tas tznib'j eb', palta matz 'ilchj yuj eb'; ax eb' tzmunlji, caw wal 'oj niwtjoc tas 'ay 'a eb'.
5Toto wach' qui nab'enec, matz tzquixtjec quit 'anma'il; ax toto tu qui nab'enec, caw tzon̈ yajxec 'eli, tz'el qui q'uixwelec.
6Toto tojl qui b'eyb'alec, may tas tzon̈ 'i'ni; ax toto may qui ch'olnilec, caw wal tzquijec cot 'a quib'an̈.
7'Ay eb' may xon jac tas 'ay 'a 'a, palta 'icha xo rico tzyutj sb'a eb'; 'ay pax eb' til wal tas 'ay 'a 'a, 'icha pax meb'a tzyutj sb'a eb'.
8A eb' rico, tztac' smann 'el sb'a eb' 'a yol sc'ab' eb' 'elc'm yuj sricoal; palta ax pax eb' meb'a', toc 'ay 'aj tz'el'x 'at eb'.
9Toto tojl qui b'eyb'alec, lajn on̈c 'icha junc luz caw tzictzni yilx yoc; ax toto may qui ch'olnilec, lajn on̈c 'icha junc cantil wan stupi.
10Toto tzqui b'an̈c qui b'a, cojn owl tzq'ue wan cujec; ax toto 'emmquilal queq'uec, caw jeln on̈c 'ixta'.
11A ricoal yajn̈j cha tzniwtj yuj maysch'olnil, yajn̈j wal cha tzsatx can 'ejmi; ax ricoal to c'ojnc'ojnil tzyam sb'a yuj munljel, caw tzniwtj cha'an̈.
12Toto matz 'el'ch tas tzca'c 'och yipc qui c'ojol, caw tzjaw qui cusc'ojlalec; ax toto tz'el'ch tas tzqui nib'jec, caw wal tzon̈ tzaljec.
13Toto may yel'ch jun tzo'n̈ checnb'il 'a qui satec, tzjaw yailal 'a quib'n̈ec; ax toto 'ay yel'ch 'ayn̈ec, caw wach' 'oj cajc 'el'chi.
14A cuynb'il tzyac' eb' jeln snab'en, 'oj yac' qui q'uinlec, tzon̈ 'ijxec 'el 'a yol sc'ab' chaml yu'uj.
15A eb' 'ay snab'en, caw nib'b'il eb' yuj eb' 'anma', ax eb' tz'ixtn eb' 'anma', yajn̈j cha tzsatl eb'.
16Toto 'ay qui nab'enec, tzcham wal quilnec tas tzqui b'o'o, ax toto tu qui nab'enec, a tas tzqui b'o'ec, a tzch'oxn 'el qui man̈ nab'enalec cha.
17A junc checb' to man̈ wach'c tz'aj 'el'ch junc checnb'il yu'uj, cojn owl tzyij coti; ax junc checb' caw wach' tz'aj 'el'ch schecnb'il cha, caw 'ay junc'ojlal yu'uj.
18A meb'a'il yet' q'uixwc'ojlal, a tzjaw 'a quib'n̈ec toto matz qui chajec cab' junc tennb'ilal tzalx 'ayn̈ec; ax toto tzqui chajec cab'i', caw tzon̈ alxec wach'il.
19A yic tz'el'ch tas tzqui nib'jec qui b'o', caw tzon̈ tzaljec. Ax eb' tu snab'en, toxn matz nib'j eb' tzyij 'el sb'a 'a scal maysch'olnil.
20Toto jun tzon̈ 'e'c yet' eb' wach' snab'en, caw 'oj qui jelnb'iec; ax toto a yet' eb' tu snab'en tzon̈ 'eq'uec, 'oj qui satc 'eli.
21Toto maysch'olnil qui b'eyb'alec, caw tza'n xo 'och yailal cujec; palta toto wach' qui nab'enec, wach' spac quiquec 'oj 'ajxoc.
22Toto wach' qui nab'enec, 'ay tas wach' tzca'c can smacloc eb' quichicnec; ax sricoal eb' maysch'olnil, tzcancn 'a eb' wach' snab'en.
23A slum eb' meb'a', til wal sb'al wach' ya'ni, palta a eb' 'ixtm 'anma', a eb' tz'i'n 'ec' 'a eb'.
24A mach may schamc'ojlal 'a yunnal, matz yac' cuenta yunnal cha; ax mach 'ay schamc'ojlal 'a yunnal, caw wal tzyac' cuenta yunnal chi 'a yic yune'al.
25A mach to tojl snab'en, caw 'ayn̈j tas 'oj sc'uxu', ax mach to tu snab'en, wejln̈ej yaj 'a smasnil tiempo.
Currently Selected:
Pr 13: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
