Pr 11
11
1A Jehová, matz chaj sc'ojol eb' tzc'anlb'an junc 'echtab' man̈ tz'acnoc, palta ax eb' tzc'anlb'an 'echtab' tz'acan, caw tzalj yet' eb'.
2Toto tzqui b'an̈c qui b'a, cojn q'uixwelal tzquijec cot 'a quib'an̈, yuj cha, toto jeln on̈ec, yel xo wach' 'emmquilal queq'uec.
3Toto tojl qui b'eyb'alec, a qui tojl b'eyb'alec chi tzon̈ 'i'nec b'eyoc, palta toto tzquixtjec quit 'anma'il, mun a qui tu b'eyb'alec chi tzon̈ satnec 'eli.
4A wal yic 'oj jawc jun c'u yic 'oj 'och b'eyc'ojlal 'ayn̈ec, caw wal man̈x 'a yel'ch qui ricoalec cha, cojxn qui tojl b'eyb'alec, a 'oj qui colnec 'el 'a yol sc'ab' chamel.
5Toto tojl qui nab'enec, a tzon̈ tojlb'tzanec 'och 'a jun b'e wach', palta toto tu qui nab'enec, 'oj cot 'a quib'n̈ec yuj qui tu nab'enalec cha.
6Toto tojl qui b'eyb'alec, wan qui colnec qui b'a 'a tas maysch'olnil; palta toto man̈ tojloc qui b'eyb'alec, caw tzqui yalejec qui b'a yuj qui saynec 'ec' tas tzqui nib'jec 'ochi.
7A yic tzcham eb' maysch'olnil sb'eyb'al, a tas 'aych yipc sc'ojl eb', yajn̈ej tzsat 'ejm yet' eb', man̈xtzac 'el'ch tas 'aych snab'en eb' sb'oni.
8A mach tojl sb'eyb'al, tzcolx 'el 'a scal yailal yuj Dios; ax junc tu sb'eyb'al, a tz'ochx can syailal sjelc jun cha.
9A junc maysch'olnil sb'eyb'al, tzjuw 'el yit 'anmal yuj yalm peclal, ax junc tojl snab'en, caw tzcol sb'a yet' sjelnal.
10A yic tzniwtj sb'isl eb' wach' sb'eyb'al, caw wal tzalj eb' chon̈b' yuj eb'; tzalj pax eb' yic tzcham eb' tu sb'eyb'al.
11Yuj swach' b'eyb'al eb' tojl snab'en, yuj cha, tzq'ue'ch junc chon̈ab'; palta yuj stu b'eyb'al eb' man̈ tojloc snab'en, yuj cha, ton̈j tzwach' lajw can 'ejm junc chon̈b' cha.
12A eb' may snab'en, tu tzyal eb' 'a spatc yit 'anma'il; ax eb' 'ay snab'en, may tas tzyal eb'.
13A eb' alm peclal, a tas cob' c'ultac tzalx 'a eb', c'uxn tzyal-l eb'; ax eb' wach' snab'en, ton̈j tzmolcn eb' 'a snab'en.
14Toto may snab'en junc mach tzjucb'tzan junc chon̈ab', caw wal tzlajw 'ejmi; ax toto niwn eb' tz'a'w nab'en, wach'n̈j tz'aj 'el'chi.
15A mach tzya'ch sb'a fiadoral 'a junc chuc 'anma'il, caw man̈ wach'c tz'aj 'el'chi; ax toto matz ya'ch sb'a 'a jun cha, may tas tzna'a.
16A 'ix 'ix wach' snab'en, caw tz'ijx chan̈ sb'i 'ix, ax win winc amancotan, tzyac' ganar stumin, palta patcab'il 'eli.
17Toto tz'o'ch qui c'ojlec 'a eb' quit 'anma'il, 'oj qui chac wach'il; ax toto may yel'ch junc 'anma chi 'a qui satec, 'oj cot 'a quib'n̈ec yuj qui tu nab'enal cha.
18Toto maysch'olnil tz'el sb'on junc mach, 'oj scha spac, atn tas man̈ nib'b'ilc yu'uj; ax toto wach' tas tzb'o'o, a wal tas yel xo wach', a chi 'oj scha spacoc.
19Toto tzon̈ 'ochc tza'n yuj tojlal, wan qui 'atc 'a jun b'e yic q'uinal, ax toto tzon̈ 'atc 'a maysch'olnil, to 'ixta' wan qui 'atc 'a jun b'e yic chamel.
20Tzchacl Jehová eb' 'anma tu snab'en, ax eb' tojl sb'eyb'al, caw wal tzalj yet' eb'.
21Wal yel, a eb' maysch'olnil sb'eyb'al, yowlal 'oj jawc yailal 'a yib'n̈ eb', ax eb' tojl sb'eyb'al, may tas 'oj jawc 'a yib'n̈ eb'.
22A swach'l yilx junc 'ix 'ix may snab'en, lajn 'icha junc q'uen argoya nab'a oro 'aych 'a sn̈i junc no chitam.
23A wal tas wach', a chi tznib'j eb' wach' snab'en, ax tas 'oj jawc 'a yib'n̈ eb' maysch'olnil, atn yowl sc'ojl Dios.
24'Ay wal eb' 'anma caw wal 'ela', b'ecn sc'ojl spojn 'ec' tas 'ay 'a 'a. A eb' cha, yel xo wal niwn tzyutj eb' schan spac. 'Ay pax eb' 'anma caw b'as, tzjaw meb'a'il 'a yib'n̈ eb'.
25A eb' tz'el 'a sc'ojl ya'n junc tas, tzniwtj tas 'ay 'a eb'; ax eb' tzcolwji, 'oj colxoc pax eb'.
26A eb' ton̈j tzmol strigo, caw tu tzyal eb' 'anma 'a eb'; ax eb' tzchon̈n 'ixim, caw tzalx eb' wach'il.
27A eb' tzb'on tas wach', a swach'c'ojlal eb' 'anma tz'ilchj yuj eb'; ax eb' to a maysch'olnil tzsayq'ui, 'oj yamchjoc eb' yuj stul cha.
28A eb' tzya'ch sricoal yipc sc'ojol, 'oj 'em eb' 'icha tz'aj yem stacn̈il xil te te 'a yich, palta ax eb' tojl sb'eyb'al, 'oj yic' eb' yip 'icha tz'aj syaxb' sc'ab' te te'.
29A eb' tu tzyutj sb'a 'a smam snun, mto 'a eb' yu'tac, man̈x 'a tas 'oj can 'a eb'. A eb' may snab'en, 'oj 'och eb' schecb'oc eb' jeln snab'en.
30A tas tzb'o eb' tojl sb'eyb'al, a chi tz'a'n sq'uinl eb'; a eb' jelan, caw wal tzmontchj eb' 'anma yuj eb'.
31Toto a eb' tojl sb'eyb'al 'oj scha eb' spac yic 'a sat lum tic, ocxom wal eb' may yel'ch Dios 'a sat yet' eb' 'ajmul, yel xo wal ya 'oj 'ec' eb' schan spac tas sb'o'o.
Currently Selected:
Pr 11: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
