Flp 4

Yowlal tzon̈ tzaljec 'a Cajlil

1Ex wu'tac, ex wanab', chamc'ojlb'ilx wu'uj. Caw tzin nib'j tz'at ex wila', yujto eyu'uj, 'ay in tzaljc'ojlal. Eyu'uj, ax in chan spac wico'. Yuj cha, ex chamc'ojlb'il wu'uj, caw te'n tzeyutj e b'a eya'n 'och e c'ojl 'a Cajlilec.

2A ticnec, tzin tew 'at 'aych wanb' Evodia yet' 'aych Síntique, sec junxn̈ej tzeyutj e nab'en, yujto e nulj e b'a 'a yol sc'ab' Cajlilec. 3Ach xo wu'tac, yel quit munljumal qui b'a. Yuj cha, tzin tew 'at 'ayach, caw tzach colwj a b'onyaj jac eb' canb' chi ta', yujto a eb' cha, caw te'n yutjnac sb'a eb' smunlj wet'oc, yic 'ec' walnc 'el wach' 'ab'x yic colnb'il. An̈jtona', 'ix munlj pax Clemente wet'oc, yet' jun tzo'n̈ xo eb'. A eb' cha, tz'ib'b'ilx sb'i eb' 'a jun ch'an̈ libro 'aj 'ay qui b'i an̈ec 'ay qui q'uinl 'a jun 'ejmn̈ej.

4Tzalj coyc 'a Cajlil 'a smasnil tiempo. Tzwaln pax jun 'ejm xo, caw tzalj coyec. 5Yowlal caw wach'n̈j tzcutjec qui nab'en yil eb' 'anma smasnil, yujto jab'xoj 'oj jawc Cajlilec.

6Man̈ on̈ 'ochc 'il yuj junc tas. Jantcn̈ej tas tzqui na'ec, calc 'a Dios, tzon̈ leslwiec. A yic tzqui c'annec tas 'a 'a, yowlal tzca'c pax yuj diosal 'a 'a. 7Toto 'ixta tzcutjec qui b'a, 'oj yac' Dios sjunc'ojlal 'ayn̈ec. A sjunc'ojlal tic, matz nachj 'el cujec, yujto man̈x 'a yalnb'il jantac. A sjunc'ojlal tic, a tztan̈wni qui pixnec, yet' qui nab'enec, yujto yic on̈c xo Cristo Jesús.

Tzca'c 'och qui nab'en 'a tas wach'

8Ax ticnec ex wu'tac, ex wanab', caw ca'c 'och qui nab'en 'a jantcn̈ej tas yel, 'a jun tzo'n̈ smoj 'ay yel'ch 'a qui satec, 'a jantcn̈ej tas tojol, 'a jun tzo'n̈ may spaltail, 'a jantcn̈ej tas wach', 'a jun tzo'n̈ niwn yel'chi. An̈jtona', yet' 'a jantcn̈ej tas wach' 'a sat Dios, yet' 'a jun tzo'n̈ 'aj smoj yalx wach' paxti', ata tzca'c pax 'och qui nab'en.

9Caw tze b'eylb'ej jun tzo'n̈ cuynb'il, yet' jun tzo'n̈ xo tas xeyab' 'ayin. Jantcn̈ej tas eyab'jnac 'ayin, yet' tas eyiljnac, a chi tze b'eylb'ej. Toto 'ixta tzeyutj e b'a, ax Dios 'oj 'och eyet'oc. Atn Dios tz'a'n qui junc'ojlalec.

A ofrenda chab'il yuj Pablo

10A ticnec, caw tzin tzalj 'a Cajlilec, yujto in e na paxt jun 'ejm xo, yic eya'n cot e colwal 'ayin. Wojtac, an̈ja nan in eyu'uj, palta may wal 'aj tzeyac' cot e colwal 'ayin, yujto matz tac' eyu'uj. 11Ton̈j tzwalb't jun tzo'n̈ tic 'ayex. Man̈ yujoc tas 'ay sc'a'l tz'och wu'uj, tzwaln 'ati. Yujto tox 'ix in cuy in b'a. Tzann̈j jac tas 'ay 'ayin, tzin tzaljn̈ej yu'uj. 12Smasniln̈ej tas xwa'lej. 'Ay 'aj may jac tas 'ayin. 'Ay 'aj caw tzyac' pax sobra. Yuj cha, toxn̈ej b'ut'n in, tzyac' sobra tas 'ay 'ayin, toxn̈ej tz'och in wejel, may xon jac tas tzin c'uxu, palta c'aync in, tztechn̈ej wu'uj. 13Tzann̈j tas tzta'n̈j wu'uj, yujto a Cristo tzyac' spoder 'ayin. 14Palta ax xo, caw wach' xeyutj e b'a, yujto xeya' cot e colwal 'ayin, yic 'ayn 'och 'a in yailal tic. Ax ticnec, 'icha to ax wan eyab'n syal wet' 'a tic.

15Ex 'aj Filipos, eyojc xoni, yic in yamn 'och waln 'el wach' 'ab'ix, yic in cot 'a Macedonia, cojn ex colwjnacx 'ayin. Cojn ex eya'jnac 'at in gasto ta'. 16Ax yic wec' 'a Tesalónica, eya'jnac 'at pax cha'ox'ejm e colwal 'ayn ta yuj in gasto. 17Man̈ yujoc ton̈j tzwa'ch in nab'en 'a e colwal, tzwaln 'at jun tzo'n̈ tic 'ayex. Caw tzin tzalji, yujto wan sniwnb'i spac eyic 'a sat Dios. 18An xo tic, man̈x jantcoc tas xin cha'aj, 'ay pax tzyac' sobra ticnec. A jun e colwal xwul yac' Epafrodito tic, caw colb'iln̈ej tzcolwj 'ayin. 'Icha junc tas tz'ajx 'a Dios, caw su'q'ui sjab', mto junc xajmb'al caw wach', 'ixta jun e colwal tic, caw tzalj Dios yet'oc. 19Yuj cha, a qui Diosalec 'oj 'a'nc jantcn̈ej tas 'ay tz'och eyu'uj. Yujto man̈x jantcoc tastc wach' 'ay 'a 'a. Atn jun tzo'n̈ chi tzyac' 'ayn̈ec an̈ yic on̈c xo Cristo Jesús. 20Niwn cab' yel'ch qui Diosalec, qui Mamc 'a smasnil tiempo. 'Ixta cab' tz'aji.

Tz'ajx 'at stzatzl sc'ojl eb'

21Tic tzwa't stzatzl e c'ojl e masnil ex yic ex xo Dios ta', ex junxn̈ej eyaj yet' Jesucristo. Ax eb' cu'tac tic 'ayc' wet' 'a tic, tic tzya't pax eb' stzatzl e c'ojl jun xo. 22An̈jtona', jantcn̈ej eb' yic xo Dios 'a tic, yet' eb' creyente tzmunlj 'a win yajl 'a Roma tic, tic tzya't pax eb' stzatzl e c'ojol.

23Tzin nib'ej, a Cajlil Jesucristo tzyac' swach'c'ojlal 'ayx ta e masnil. Ya' cab'i'.

Currently Selected:

Flp 4: CSS

Highlight

Copy