Flp 2

A Cristo 'emmquil wul yutjnac sb'a

1A Cristo tzon̈ jucb'tzanec. Tzya'n sniwnal qui c'ojlec, 'ay schamc'ojlal 'ayn̈ec. Junxn̈ej tzon̈ 'ajc yet' Yespíritu ticnec. A tz'a'n qui chamc'ojlalec, sec tz'o'ch qui c'ojlec 'a eb' quit 'anma'il. 2Yuj wal jun tzo'n̈ tic, caw junxn̈ej tzeyutj e nab'en ta'. Junxn̈ej tzlaj eyutc e chamc'ojlan e b'a. Junxn̈ej tzlaj eyutc e nan pax smasnil tas. Junc'ojlaln̈ej tzeyutj e b'a. Toto 'ixta tzeyutj e b'a ta', 'oj wach' jawc in tzaljc'ojlal eyuj 'a tic. 3Caw matz tac' qui'nec chan̈ qui b'a, mto tzqui b'an̈nec qui b'a. Palta caw 'emmquilaln̈ej tzlaj cutquec qui b'a. Junjn 'on̈ec, yowlal tzqui na'a, to yel xo cab' niwn yel'ch eb' quit creyenteal 'a quib'n̈ junjn on̈ec. 4Man̈ cojnoc on̈ tzqui na qui b'a qui ch'ocoj. Yowlal tzqui na pax tas tz'aj eb' quit creyenteal smasnil.

5Caw lajn tzcutjec qui nab'en 'icha yutjnac sb'a Cristo Jesús. 6A Cristo, caw junn̈j yet' Dios 'a yictax pecti'.

Wach'xam junn̈j yet'oc, palta x'el 'a sc'ojol, xyactj can jun 'aj 'ay yaln yic yet' Dios cha. ma'ix sna xon jab'oc, yic xyactn cani.

7Yuj cha, xyactn can smasnil yic cha, xcoti, wul ya'nc 'och sb'a checb'al. Wul ya'nc 'aljoc sb'a 'anma'il.

8Ax yic 'aych 'anmal cha, caw 'emmquilaln̈ej yutjnac sb'a. Yiclumn̈ej yutjnac pax sb'a, masnto xchami. Caw ya'jnac techjoc smilx cham 'a spenc te culus. Caw q'uixweltac x'aj schami.

9Yuj cha, yel xo wal caw niwn yel'ch yuj Dios ticnec. A Dios chi 'a'jnac pax jun sb'i. A sb'i cha, yel xo niwn yel'ch 'a yib'n̈ smasnil.

10'Ixta yutjnac Dios, sec wach' jantcn̈ej eb' 'ay 'a satcha'an̈, yet' eb' 'ay 'a sat lum tic, yet' pax eb' 'ay 'a yol lu'um, a yic 'oj yab'nc eb' sb'i Jesús, c'uxn 'oj 'em cumn eb' 'a 'a.

11Ax yaln eb' smasnil 'ixtic: Atn Jesucristo Cajlilec, 'oj schic eb'. 'Ixta 'oj 'aj scheclj 'eli, chajtlto caw niwn yel'ch qui Mam Dios.

'Icha c'anal, 'ixta eb' creyente

12Yuj cha, ex chamc'ojlb'il wu'uj, yiclumn̈ej cab' tzeyutj e b'a 'icha xon e ley. Caw tzeyac' eyip 'a 'emmquilal, 'a xiwc'ojlal, sec 'oj 'el'choc e colnb'il eyu'uj. Man̈ cojnoc yic 'ayn 'ec' eyet' ta', 'ixta tzeyutj e b'a. Palta tze wach' b'oj jun tzo'n̈ tic, yic man̈ in 'ayc 'ec' eyet'oc. 13Yujto a Dios 'aych quet'ec. A tz'a'n qui nib'quec qui b'oc wach'il. A tz'a'n pax quip qui b'onec 'icha tas tznib'ej.

14A yic tz'ajx e b'o junc tas, man̈ e b'o yet' e chichnc'ojlal. Man̈ laj eyal-l tas yuj tz'ajx e b'o'. 15Man̈ e b'o 'ixta', sec may mach 'oj alnoc, to 'ay e mul, mto e paltail. Wach'xam 'ayx 'ec' 'a scal eb' 'anma maysch'olnil, mto eb' tu snab'en, ax xo yel yunnal ex Dios, man̈x 'a maysch'olnil 'aych 'ayx yet' eb'. 'Icha jun tzo'n̈ c'anal, caw tzictzni yilx 'a q'uic'q'uinal, 'ixta ex 'a scal eb'. 16Yujto tzeyal-l spaxti Dios 'a scal eb', atn tzaln yuj qui q'uinlec 'ay 'a jun 'ejmn̈ej. Yuj cha, a yic 'oj jawc Cristo, caw 'oj jawc in tzaljc'ojlal eyu'uj, yujto wojtac, man̈ nab'an̈ejoc xwac' 'ip in munlj 'a e cal. 17Yujto eya'jnac 'och e c'ojl 'a Cristo, wan eya'n 'och e b'a 'a yol sc'ab' 'icha junc xajmb'al. An xo tic, tzwac' in b'a 'a Cristo pax eyet'oc. Yuj cha, wach'xam 'oj in milx chamoc yic tz'acw junc e xajmb'al cha, 'oj in tzaljn̈ej pax eyet'oc. 18Ax xo, tzaljan̈ec. 'A'c wojcoc 'el pax jun e tzaljc'ojlal chi eyet'oc.

Yaljnac Pablo*r* yuj Timoteo yet' yuj Epafrodito

19Tzin nib'j tzin checb't Timoteo tic 'ayx yic jaye c'u, toto 'ixta tznib'j Cajlil Jesús. Yujto tzin nib'j tzwab'i, tas eyaj ta', sec 'oj jawc in tzaljc'ojlal eyuj 'a tic. 20Yujto may wal eb' lajn snan wet' 'a tic. May wal eb' tzex nan coti. 21Yujto junjn eb', cojn yic eb' tzlaj sna'. Matz na xon eb' jac smunljel Cristo Jesús. 22Palta eyojc xoni, a Timoteo tic, checl xon yaj sb'eyb'al. 'Icha junc 'unnab'il yet' smam, 'ixta tzyutj sb'a 'ayin. Caw tzyac' servil Cajlil wet'oc, yic tzcaln 'el wach' 'ab'x yic colnb'il on̈. 23Yuj cha, at yic 'oj wila', chajtl 'oj waj 'a tic, ax in checn 'at Timoteo tic 'ayx ta'. 24An̈jtona', tzwa'ch Cajlilec yipc in c'ojol, chajtlto caw an stac' 'oj 'at ex wila'. Yaln̈ej 'ajan̈ej c'u 'oj 'at ex wila'.

25An̈jtona', tzin na'a, tecn yowlal 'oj in checb't pax cu'tac Epafrodito. Atn jun cu'tac tic e checjnac cot 'a tic, yic tzin wul ya'nc servil. Caw te'n tzyutj sb'a smunlj wet' 'a Cajlil. 26Tznib'j tz'at ex yilx cani, yujto tzex sna'a, 'ix eyab'i, chajtlto caw ya'ay 'a tic. 27Yel toni, jab'xoj wal ma'ix cham 'a tic, palta x'o'ch sc'ojl Dios 'a 'a. Yuj cha, 'ix b'oxi. Man̈ cojnoc 'a Epafrodito tic 'ix 'o'ch sc'ojl Dios. 'Ix 'o'ch pax sc'ojl 'ayin, yic xb'ox sc'ojl cha, sec wach' man̈xtzac wach' jaw in cusc'ojlal 'a tic. 28Yuj cha, caw tzin nib'j tzin checb't pax 'ayex, sec 'oj e tzalji, ax eyiln sc'ochx 'ayx jun 'ejm xo. Toto 'ixta', an xo tic, 'oj wach' sat in cusc'ojlal 'a tic. 29Caw tzaljc'ojlal tze chaj sc'ochx 'ayx ta', yujto eyu'tac e b'a yet' 'a yol sc'ab' Cajlilec. Jantcn̈ej eb' lajn snab'en yet'oc, 'ay cab' yel'ch eb' 'a e sat. 30A jun cu'tac tic, jab'xoj wal ma'ix chami, yujn̈ej to wan ya'n servil Cristo. Wach'xam 'ijn xchami, yujto wan in ya'n servil 'a tic, palta ma'ix sna jab'oc, toto tzchami. Ax xo tic, matz tac' in wul eya'nc servil, yuj cha, a 'ay cot in wul yac' servil 'a tic e jeloc.

Currently Selected:

Flp 2: CSS

Highlight

Copy