Nm 3
3
A tas yowlal tzb'o eb' levita
1Atn eb' yunnal Aarón yet' eb' yic Moisés tic, 'a yic spaxtin Jehová 'a Moisés 'a sjolm lum witz Sinaí: 2Eb' yic Aarón: atn Nadab win b'ab'l 'unnab'il, tza'n win Abiú, Eleazar yet' Itamar. 3A eb' chan̈wn̈ tic, 'ix si'x 'el eb' yic tz'ochcn eb' ya'malc 'och sti eb' 'anma 'a Dios. 4Palta a Nadab yet' Abihú, 'ix cham eb' 'a yojltac Jehová 'a lum cusltac lum yic Sinaí, yujn̈ej to xya'ch eb' jun c'ac' chuc yel 'a yojltac Jehová, mant 'a xon yunnal eb'. Yuj cha, cojxn Eleazar yet' Itamar 'ix 'och ya'malc 'och sti eb' 'anma 'a Dios 'a yaln̈ schecnb'il Aarón, atn smam eb'.
5'Ix yaln pax Jehová 'a Moisés 'ixtic:
6'Awtj cot smasnil ewin yin̈tl Leví, yic tz'och eb' colwjoc yet' Aarón win ya'mal 'och sti eb' 'anma 'ayin, a tas 'oj yala', a 'oj sb'o eb'. 7A eb' 'oj sc'anlb'oc Aarón yic tz'a'w servil eb' 'a eb' chon̈ab', 'a jun Mantiado 'aj tzin chaj in b'a eyet'oc. 'Ixta 'oj yutc eb' ya'n servil smasnil eb' eyit chon̈b' israel 'a in cajnub'. 8Tztan̈wni pax eb' smasnil syamc'ab'il jun Mantiado cha, 'ixta tz'aj ya'w servil eb' 'a eb' israel 'a smasnil munljel 'a in cajnub'. 9Pojl eb' levita 'a scal smasnil eb' eyit israelal, yic wach' tzc'anlb'ej Aarón eb' yet' 'a smasnil eb' yin̈til. 10Cojn Aarón yet' eb' yin̈til, cojn eb' tz'ochcn yopiso ya'malc 'och sti eb' 'anma 'ayin. Toto 'ay junc 'anma man̈ 'ayc 'och jun 'opiso chi 'a yib'an̈, tzlajw cha, tzb'on 'icha tzb'o eb' 'ay yopiso cha, yowlal tzchami, xchi Dios.
A eb' levita yic Jehová yaj eb'
11'Ix yaln Jehová 'a Moisés 'ixtic.
12A ticnec 'ix in si'cn 'el eb' levita sjelc junjn b'ab'l winc 'unn 'a scal eb' et israelal, yujto wic yaj eb' levita cha. 13A yic xwa'n cham smasnil eb' sb'ab'l winc 'unn eb' 'aj Egipto, 'ix in colcn 'el eb' sb'ab'l winc 'unn eb' et israelal yic tz'och eb' wico'oc. 'Ixta pax smasnil sb'ab'l 'une no scajb'en noc' eb', wic yaj no'. An Jehová in, an tzwala, xchi Dios.
'Ix q'ue wan sb'isl eb' levita
14'Ix paxtin Jehová 'a Moisés 'a lum cusltac lum yic Sinaí, 'ix yaln 'ixtic: 15'Ij q'ue wan sb'isl eb' levita, a tzyal smacquixtacl yaj yin̈tl eb', tz'el yich 'a eb' jun 'ujl sq'uinal yet' 'a yojltac, xchi Dios. 16Yuj cha, 'ix yi'n q'ue wan Moisés sb'isl eb', 'icha wal xyutj Jehová yalni.
17A eb' yunnal Leví: atn Gersón, Coat yet' Merari. 18A eb' yin̈tl Gersón: atn Libni yet' Simei, a tzyal smacquixtacl yaj yin̈tl eb'.
19-20A eb' yin̈tl Coat; atn Amram, Izhar, Hebrón yet' Uziel; eb' yin̈tl Merari, atn Mahli yet' Musi.
A jun tzo'n̈ eb' tic, yajl yaj eb' 'a junjn macn̈ eb' yin̈tl Leví.
21A eb' yin̈tl Gersón: atn eb' yic Libni yet' eb' yic Simei. 22A sb'isl eb' winc 'a smasnil, x'el yich 'a eb' jun 'ujl sq'uinal yet' 'a yojltac; a 'a smasnil 'ay 7,500 sb'isl eb'. 23A smasnil jun tzo'n̈ eb' tic, ata 'ay smantiado eb' 'a stojlal 'aj tz'em c'u 'a spatquil 'el scajnub' Dios. 24A pax mach yajl yaj 'a eb' yin̈tl Gersón cha, atn Eliasaf yunnal Lael. 25A eb' tz'iln jun tzo'n̈ smacl yib'n̈ Mantiado yet' te cortina 'aych smacloc sti 'aj tzon̈ 'ochi, 26yet' te cortina 'aych smacloc sti 'amac', yet' pax te 'aych smacloc 'aj tzon̈ 'och 'a 'amc' cha, atn te oyn 'och 'a scajnub' Dios, yet' 'a yet'l xajmb'al, yet' pax sch'an̈l 'aych syamnub'loc.
27A eb' yin̈tl Coat, chan̈ macn̈ yaj eb', atn eb' yic Amram, eb' yic Izhar, eb' yic Hebrón yet' eb' yic Uziel. 28A sb'isl eb' winc 'a smasnil, x'el yich 'a eb' jun 'ujl sq'uinal yet' 'a yojltac, 'ay 8,600 eb', a eb' tz'iln scajnub' Dios. 29Ata 'ay smantiado eb' 'a schicn scajnub' Dios 'a stojlal sur. 30A mach yajl yaj 'a jun tzo'n̈ eb' tic, atn Elizafán yunnal Uziel. 31A eb' tic tz'iln te scaxail trato, te mexa, yet'l cantil, chab' yet'l xajmb'al, smasnil yamc'ab' tzc'anx 'a yol scajnub' Dios, yet' pax te cortina 'aych 'a yojol.
32A mach sat yajl yaj 'a scal eb' levita, atn Eleazar yunnal Aarón, atn win ya'mal 'och sti eb' 'a Dios, a tz'iln smasnil eb' tzmunlj 'och 'a scajnub' Dios cha.
33A eb' yin̈tl Merari, atn eb' yic Mahli, yet' eb' yic Musi. 34Ax sb'isl eb' winc 'a smasnil, x'el yich 'a eb' jun 'ujl sq'uinal yet' 'a yojltac, 'ay 6,200 eb'. 35A mach yajl yaj 'a eb', atn Zuriel yunnal Abihail, ata 'ay smantiado eb' 'a junx schicn scajnub' Dios 'a stojlal norte. 36A eb' tic 'aych yilmalc te 'a'nte yic scajnub' Dios, scan̈nub'al, yoyal, sb'achnub'al yalan̈ yet' smasnil syamc'ab'il, 37yet' pax te yoyl oyn 'och 'a sti yamq'uil, sb'achnub'al yaln̈ eb' te', yistacail yet' pax smasnil sch'an̈il.
38Ax 'a stojlal 'aj tzq'uel c'u 'a yojltac scajnub' Dios, 'a yojltac Mantiado 'aj tzchaj sb'a eb' 'anma yet'oc, ata 'ay smantiado Moisés yet' Aarón, yet' pax eb' yunnal Aarón cha, atn eb' tz'a'w servil 'a yojl scajnub' Dios sjelc eb' yit israelal. Toto 'ay mach tzcomn 'och 'a jun 'opiso cha, to man̈ yopisooc yaji, yowlal tzchami.
39A yic xyi'n q'ue wan Moisés yet' Aarón sb'isl eb' levita cha, a tzyal smacquixtacl yaj yin̈tl eb'. 'Icha wal xyutj Jehová yalni, 'ixta x'aji, x'el yich 'a eb' jun 'ujl sq'uinal yet' 'a yojltac, 'ay 22,000 eb' 'a smasnil.
A tas tz'och sjelc eb' b'ab'l 'unin
40'Ix yaln Jehová 'ixtc 'a Moisés:
'Ij q'ue wan sb'isl eb' sb'ab'l 'unnal eb' et israelal, tz'el yich 'a eb' jun 'ujl sq'uinal yet' 'a yojltac, yet' sb'i junjn eb'. 41A eb' levita tic, wic tz'aj eb' yuj sjelc sb'ab'l 'unnal eb' et israelal cha. 'Ixta pax yuj sb'ab'l 'une no scajb'en noc' eb', wic tz'ajcn scajb'en noc' eb' levita yuj sjelc no eyic cha. An Jehová in, an tzwala, xchi Dios 'a Moisés.
42Yuj cha, xyi'n q'ue wan Moisés sb'isl smasnil eb' sb'ab'l 'unnal eb' israel 'icha wal xyutj Jehová yalni. 43Smasnil eb' b'ab'l winc 'unn jun 'ujl sq'uinal yet' 'a yojltac, 'ay 22,273 sb'isl eb'.
44'Ix yaln pax Jehová 'ixtc 'a Moisés:
45An Jehová in, an tzwala: 'A'cn 'och eb' levita sjelc eb' b'ab'l 'unn 'a scal eb' chon̈b' israel. 'Ixta pax no scajb'en noc' eb' levita, a no tz'ochcn sjelc no scajb'en noc' eb' israel, yujto a eb' levita tic, wic yaj eb'. 46Palta yel xo wal niwn sb'isl eb' sb'ab'l 'unnal eb' israel tic 'a yib'n̈ eb' levita. 'Ay 273 eb' b'ab'l 'unn tzyac' sobra. 47A yuj eb' tzyac' sobra cha, tza c'an o'e'oc q'uen tumn plata yuj junjn eb', a tzyal yal-l q'uen tzc'anlb'ax 'a in cajnub', atn q'uen 11 gramos yalil. 48Tzlajw cha, tza'n q'uen 'a Aarón yet' 'a eb' yunnal, a q'uen tz'och sjelc eb' b'ab'l 'unn tzyac' sobra cha, xchi Dios.
49'Ixta xyutj Moisés syamb'tzan q'uen tumn x'och sjelc eb' b'ab'l 'unn xyac' sobra 'a scal eb' israel cha. 50A q'uen tumn syamb'tzej Moisés cha, 'ay 1,365 q'uen tumn plata, 'icha yal-l q'uen tzc'anlb'ax 'a scajnub' Dios. 51Xlajw cha, xya'n Moisés q'uen 'a Aarón yet' 'a eb' yunnal, 'icha wal xyutj Jehová yalni.
Currently Selected:
Nm 3: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
