Neh 12
12
Eb' xmeltzj yet' Zorobabel
1-7'Ay jun tzo'n̈ eb' ya'mal 'och sti eb' 'anma 'a Dios, yet' eb' levita 'ix meltzj paxt yet' Zorobabel win yunnal Salatiel, yet' pax Josué.
Atn sb'i eb' tic: Seraías, Jeremías, Esdras, Amarías, Maluc, Hatús, Secanías, Rehum, Meremot, Iddo, Ginetón, Abías, Mijamín, Maadías, Bilga, Semaías, Joiarib, Jedaías, Salú, Amoc, Hilcías yet' Jedaías. Atn jun tzo'n̈ eb' tic yajl yaj 'a scal eb' yit ya'mal-l 'och sti eb' 'anma 'a Dios, yet' 'a eb' yican eb' 'a yol stiempoal Josué.
8Ax eb' levita cha, atn eb' tic: Josué, Binuy, Cadmiel, Serebías, Judá, yet' Matanías, atn eb' tic tzb'itnan b'it yic alj wach' paxti yet' eb' yican. 9Ax Bacbuquías yet' Uni yican sb'a eb' yet' eb', a eb' tz'och lin̈n 'a yojltac eb' yic tzb'itn eb'.
10A eb' yin̈tl Josué, atn Joiacim, Eliasib, Joiada, 11Jonatán yet' Jadúa.
12-21A 'a yol stiempoal Joiacim, atn slistail eb' ya'mal 'och sti eb' 'anma 'a Dios tic, a eb' yajl yaj 'a yib'n̈ eb' yican: a Meraías a yajl yaj 'a yib'n̈ eb' yin̈tl Seraías; a Hananías a yajl yaj 'a yib'n̈ eb' yin̈tl Jeremías; a Mesulam a yajl yaj 'a yib'n̈ eb' yin̈tl Esdras; a Johanán a yajl yaj 'a yib'n̈ eb' yin̈tl Amarías; a Jonatán a yajl yaj 'a yib'n̈ eb' yin̈tl Melicú; a José a yajl yaj 'a yib'n̈ eb' yin̈tl Sebanías; a Adna a yajl yaj 'a yib'n̈ eb' yin̈tl Harim; a Helcai a yajl yaj 'a yib'n̈ eb' yin̈tl Meraiot; a Zacarías a yajl yaj 'a yib'n̈ eb' yin̈tl Iddo; a Mesulam a yajl yaj 'a yib'n̈ eb' yin̈tl Ginetón; a Zicri a yajl yaj 'a yib'n̈ eb' yin̈tl Abías; a Piltai a yajl yaj 'a yib'n̈ eb' yin̈tl Miniamín, yet' Moadías; a Samúa a yajl yaj 'a yib'n̈ eb' yin̈tl Bilga; a Jonatán a yajl yaj 'a yib'n̈ eb' yin̈tl Semaías; a Matenai a yajl yaj 'a yib'n̈ eb' yin̈tl Joiarib; a Uzi a yajl yaj 'a yib'n̈ eb' yin̈tl Jedaías; a Calai a yajl yaj 'a yib'n̈ eb' yin̈tl Salai; a Eber a yajl yaj 'a yib'n̈ eb' yin̈tl Amoc; a Hazabías a yajl yaj 'a yib'n̈ eb' yin̈tl Hilcías, a Natanael a yajl yaj 'a yib'n̈ eb' yin̈tl Jedaías.
22'Ix tz'ib'x eb' levita yajl yaj 'a yib'n̈ junjn macn̈ 'in̈tal, yet' eb' ya'mal 'och sti eb' 'anma 'a Dios 'a yol stiempoal Eliasib, Joiada, Johanán yet' Jadúa, masnto 'a yol stiempoal Darío 'aj Persa. 23Ax pax eb' yajl yaj 'a yib'n̈ junjn macn̈ eb' levita, 'ix tz'ib'x eb' 'a yojl ch'an̈ libro yic yab'xil tas ujnac, masnto 'a yol stiempoal Johanán, yixchicn Eliasib. 24A eb' yajl yaj 'a scal eb' levita tzb'itni: atn Hasabías, Serebías, Josué, Binuy yet' Cadmiel. Ax jun tzo'n̈ xo eb' yican eb' cha, lin̈n 'ec' eb' 'a yojltac eb' yic tzb'itn eb'. Tzyaln eb' yuj diosal 'a Jehová, yic 'aych eb' 'a yopiso 'a stzolil, 'icha yutjnac win schecb' Dios yaln 'a pecti, atn David. 25A Matanías, Bacbuquías, Obadías, Mesulam, Talmón yet' Acub, tan̈m puerta eb', atn eb' 'aych stan̈malc jun tzo'n̈ cuarto 'aj tzmolx tas 'ay yopiso. 26A jun tzo'n̈ eb' tic, 'ayc' eb' 'a yol stiempoal Joiacim, yunnal Josué, yixchicn Josadac; atn 'a yol stiempoal win gobernador Nehemías, yet' Esdras ya'mal 'och sti eb' 'anma 'a Dios.
Tz'ajxcan 'och muro*r* 'a yol sc'ab' Dios
27A yic 'ix c'och sc'ul yajx can 'och smuroal Jerusalén 'a yol sc'ab' Dios, 'ix 'awtx cot eb' levita 'a smasnil lugar 'a 'ajtil cajn eb'. 'Ix jaw eb' 'a Jerusalén yuj jun q'uin̈ cha, yet' yuj yalx wach' paxti', tzb'itnax b'it 'a tzaljc'ojlal yet' platillo, arpa yet' lira. 28A eb' levita tzb'itn cha, xlaj cot eb' 'a sla'nil Jerusalén yet' 'a yaldeail Netofá, 29yet' 'a yol yic Bet-gilgal, 'a yol smacb'en Geba yet' 'a yol yic Azmavet, yujto ata cajn eb' 'a jun tzo'n̈ aldea 'a sla'nil Jerusalén cha. 30Xlajw cha, 'ix sacb'tzan sb'a eb' ya'mal 'och sti eb' 'anma 'a Dios yet' eb' levita. 'Ix sacb'tzan pax sb'a eb' chon̈ab', 'ixta to b'i'an 'ix sacb'tzan eb' spuertail chon̈ab' yet' smuroal.
31Xlajw cha, an Nehemías in tic xin checn q'ue eb' yajl yic Judá 'a yib'n̈ muro, xwa'n 'och cha macn̈ eb' tzb'itni. A jun b'ab'l macan̈ tzb'ey 'a yib'n̈ muro 'a qui wach' c'ab' masnto tzc'och 'a stojlal puerta 'aj tz'at can c'alem. 32-35Ax 'a spatquil eb' tzb'itn cha, tza'n 'och Hosaías yet' spacl eb' yajl yic Judá, atn Azarías, Esdras, Mesulam, Judá, Benjamín, Semaías, yet' Jeremías. Ajun pax eb' ya'mal 'och sti eb' 'anma 'a Dios yet' scacha: atn Zacarías, yunnal Jonatán yixchicn Semaías. Eb' smam yicham, atn Matanías, Micaías, Zacur yet' Asaf. 36An̈jtona', ajun pax jun tzo'n̈ yican eb' yet'oc, atn eb' 'et'jnac jun tzo'n̈ yamc'ab' yic tz'och b'it 'a Dios, atn Semaías, Azarel, Milalai, Gilalai, Maai, Natanael, Judá yet' Hanani; atn eb' tic 'et'jnac jun tzo'n̈ yamc'ab' cha, 'icha yaj yaln can rey David, win schecb' Dios 'a pecti'. Palta a Esdras win cuywjum, a b'ab'l s'at yuj eb'. 37'Ix 'ec' eb' 'a yib'n̈ puerta yic a pac'b'a', 'ix 'atn̈j eb' 'a yojltac 'a yib'n̈ muro cha, 'ix q'ue eb' 'a sc'ochal sb'el Schon̈b' rey David, yet' 'a sla'nil yib'n̈ sdespacho can win rey cha, masnto 'a spuertail 'aj tz'elt eb' 'ix 'ix cuchj a', 'a stojlal 'aj tzq'uel c'u.
38Ax junx schamacn̈il eb' tzb'itn cha, ata x'atcn eb' 'a stojlal qui surito. An xo tic, tza'n in yuj eb' tzb'itn chi 'a yib'n̈ muro cha, yet' nan̈l xo eb' 'anma', xqui chajto 'at 'a jun torre tzcuch Hornos masnto 'a jun muro lewn sat. 39On̈ 'ec' 'a jun puerta yic Efraín, 'a jun puerta tzcuch Jesaná, 'a spuertail yic no chay, 'a jun torre tzcuch Hananel yet' 'a jun torre tzcuch Hamea, masnto 'a spuertail yic no calnelu; on̈ 'och wan 'a spuertail yic no calnelu, on̈ 'och pax wan 'a spuertail yic eb' tztan̈wni puerta cha. Ata xqui chaj qui b'a qui chac'ajil. 40Yajn̈ej 'ix c'och eb' chamacn̈ tzb'itn chi 'a yatut Dios; in c'och pax yet' nan̈l xo eb' yajl ajun wet'oc.
41-42Ax eb' ya'mal 'och sti eb' 'anma 'a Dios, a eb' tz'utz'n scacha: atn Eliacim, Maaseías, Miniamín, Micaías, Elioenai, Zacarías, Hananías, Maasías, Semaías, Eliazar, Uzi, Johanán, Malquías, Elam yet' Ezer. Ax eb' tzb'itn cha, caw wal 'ip sb'itn eb', ax Izrahías a 'ix jucb'tzan eb'.
43A wal yic jun c'ul cha, man̈x jantcoc xajmb'al x'ajxi. Ax eb' 'anma cha, caw 'ix tzalj chan̈ eb', yujto a Dios x'a'n jun niwquil tzaljc'ojlal chi 'a eb'. An̈jtona', caw 'ix tzalj pax eb' 'ix 'ix yet' eb' 'unin. A jun tzaljc'ojlal 'ix uj 'a Jerusalén cha, caw 'ix 'ab'x 'a najat.
Tz'ajx tas tzc'ux eb'*r* ya'mal 'och sti eb' 'anma 'a Dios
44A 'a yic jun c'ul cha, 'ay jun tzo'n̈ eb' x'ajx 'och yopiso stan̈wni yet'l 'aj tzmolx ofrenda, atn sb'ab'l sat 'awb'en, yet' diesmo, a tzyal jantc tas tzcot 'a junjn lugar 'a yol yic junjn chon̈ab'. A jun tzo'n̈ cha, yic eb' ya'mal 'och sti eb' 'anma 'a Dios, yet' jun tzo'n̈ xo eb' levita, yujto a eb' chon̈ab' caw wal tzalj eb' yet' eb', yujto tz'a'w servil eb' 'a yatut Dios. 45'Ix syiclj eb' ya'n servil Dios, syiclj pax eb' ya'n jun tzo'n̈ xajmb'al. An̈jtona', 'ixta pax eb' tzb'itni yet' eb' tan̈m puerta, yowlal tzyiclj eb' tas alb'il can yuj rey David yet' Salomón, atn yunnal. 46Yujto a 'a yol stiempoal David yet' Asaf, a eb' tzb'itni 'ay syajlil eb', atn eb' tzb'itnan wach' paxti yet' alj yuj diosal 'a Dios.
47Yuj cha, a 'a yol stiempoal Zorobabel wet' an Nehemías in tic, smasnil eb' quit israelal tzyac' eb' tas tzc'ux eb' tzb'itni, eb' tan̈m puerta yet' pax eb' levita to 'ay yaln yic schan yico'. Ax eb' levita chi tz'a'n pax yic eb' yin̈tl Aarón.
Currently Selected:
Neh 12: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
