Mt 3
3
A Juan Bautista yaljnac 'el spaxti Dios
(Mr 1.1-8; Lc 3.1-9,15-17; Jn 1.19-28)
1A 'a jun tiempoal cha, 'ix c'och Juan Bautista 'a jun cusltac lum 'ay 'a yol yic Judea. Ata xyal-l spaxti Dios 'a eb' 'anma tzlaj c'och 'a 'a. 2'Ix yaln 'a eb' 'ixtic:
—Nac e b'a yuj e mul, yujto jab'xoj 'oj wach' 'och jun 'aj satchan̈ Yajlil, xchi.
3A jun schecb' Dios Isaías sb'i, 'aycto stz'ib'n can yab'xil Juan 'a Ch'an̈ Un̈ 'ixtic:
'Ay jun mach 'a cusltac lu'um, 'oj 'awjoc cha'an̈, ax yaln 'ixtic: B'oc junc sb'e Cajlil, caw tojl tzeyutj e b'on 'a 'a,#Mt 3.3 A jun versículo tic ata tz'ilchj 'a Isaías 40.3. Ata tzyala to "caw tojl tzeyutj e b'on sb'e qui Diosal." A San Mateo tzyala to tzb'o sb'e Cajlil, tzyal 'el'chi, atn Jesús. 'oj schioc, xchi 'a Ch'an̈ Un̈ cha.
4A Juan cha, a xil no cameyo 'aych spichloc, ax sjalul tz'u'um. A jun tzo'n̈ noc' 'icha b'ojch'in a tzchi'a; ax no calte'al yal chab' tzyuq'uej. 5A eb' 'aj Jerusalén smasnil, yet' eb' 'ay 'a junjn chon̈b' 'a yol yic Judea, yet' pax eb' 'ay 'a sla'nil a niwn a Jordán, xitc eb' 'ab'xnoc 'a 'a. 6'Ix laj yal q'uet eb' smul 'a Dios. Xlajw cha, xya'n 'ajxc bautisar sb'a eb' yuj Juan 'a yojl a Jordán cha.
7Til wal eb' fariseo yet' eb' saduceo xlaj c'och 'a 'a, sec tz'ajx bautisar eb' yu'uj. Palta xyaln 'a eb' 'ixtic:
—Ax tic, caw 'ixtm 'anma 'ex, lajn ex 'icha junc chan. ¿Mach 'ix aln 'ayex, to 'oj stac' e coln 'el e b'a 'a jun niwn yailal 'oj jawoc? 8Nac e b'a yuj e mul, yowlal wach' tzeyutj e b'eyb'al, sec tzcheclj 'eli, chajtlto yel tzeyala. 9Man̈ laj eyal 'ixtic: May pena, an̈ec tic yin̈tl on̈ec can Abraham, man̈ xe chioc. Yujto an tzwal 'ayex, toto tznib'j Dios, tztac' tz'och jun tzo'n̈ q'uen q'uen tic yin̈tloc Abraham e jeloc. 10A jun niwn yailal 'oj jawc cha, lajn 'icha junc winc lista yaj yet' sch'acb' 'a yich te 'awb'ente'. Jantcn̈ej te maysch'olnil sat tzyac'a, c'uxn tzu'l win smasnil, ax sjuln can 'at win 'a yib'n̈ c'ac'. 11An tic, wal yel tzex wac' bautisar 'a a a', sec chequel to xe na e b'a. Palta 'ay wal junx tza'n to sjaw wu'uj, a 'oj eya'n bautisar yet' Yespíritu Dios mto pax c'ac'. A jun 'oj jawc cha, yel xo wal niwn yel'ch 'a wib'an̈. Yuj cha, man̈ in mojc wa'n servil, wach'xam ton̈j tzwij 'el xan̈b' 'a yoc. 12A jun cha, lajn 'icha junc winc tzchayj strigo, tz'el stzapil 'a scal. Tzlajw schayni, tzmoln strigo chi 'a yet'ul. Ax stzapil 'ixm cha, tzlan̈cn 'at 'a yib'n̈ junc c'ac' may b'a'n̈ tztupi, xchi Juan chi 'a eb'.
'Ajxnac bautisar Jesús
(Mr 1.9-11; Lc 3.21-22)
13A 'a jun tiempoal cha, 'ix 'atx Jesús 'a Galilea, 'ix c'och 'a a niwn a Jordán, 'a 'aj 'ayc' Juan yic tzya'n 'ajxc bautisar sb'a yu'uj. 14A 'a b'ab'el, ma'ix yal sc'ojl Juan chi xyac' bautisar, 'ix yaln 'a Jesús 'ixtic:
—An tic, yowlal an tzin 'ajx bautisar o'oj. Yuj cha, man̈ smojc a 'ayn tzwul ac' bautisar a b'a, xchi 'a 'a.
15—Yowlal 'oj a b'o jun tic, yujto smoj tzqui yiclj jantcn̈ej tas tzyal Dios, xchi Jesús 'a 'a.
'Ixta to b'i'an, xyaln sc'ojl Juan cha. 16Ax yic xlajw yajx bautisar Jesús, 'ix q'ue paxt 'a yojl a'. Yajn̈j cha, xjacw satcha'an̈, 'ix yiln Jesús chi yeml Yespíritu Dios, 'ix 'ejm 'a yib'n̈ 'icha junc no parama. 17'Ix yab'n eb' yalx 'emt jun paxti 'a satcha'an̈, 'ix yaln 'ixtic:
—Atn jun tic Wunnal, caw chamc'ojlb'il wu'uj, caw wal tzin tzalj yet'oc, xchi.
Currently Selected:
Mt 3: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.