Mt 28

Pitzwnac pax Jesús

(Mr 16.1-8; Lc 24.1-12; Jn 20.1-10)

1Xlajw yec' sc'ul 'iljelal, 'ix sacb' 'el 'a Domingo, sb'ab'l c'ul seman. 'Ix 'at María Magdalena yet' junx María 'a 'aj 'ix 'ajx can 'och sniwnal Jesús. 2Ax yic wan sc'och eb' ta', 'ix 'ec' jun quixcab' caw ow, yujto a jun yángel Cajlil a 'ix 'emt 'a satcha'an̈, 'ix c'och 'a jun q'uen cha. Slocn 'elt q'uen smac cha, 'ix 'em wocn 'a yib'an̈. 3Caw tzictzni yilx 'icha letz'lo'om, caw sac pax spichl 'icha sacb'at. 4Ax eb' soldado 'ayc' stan̈wc q'uen q'uen cha, yic xyiln eb', caw x'ib'x eb' yuj xiwlal. 'Ix telw eb', 'icha to chamnc xo x'aj eb'. 5Ax jun ángel cha, 'ix yaln 'ixtc 'a eb' 'ix 'ix cha:

—Man̈ ex xiwoc, wojtac wan e sayn 'ec' Jesús, atn jun x'ajx 'och 'a spenc culus. 6Man̈x 'ayc' 'och 'a tic, tox 'ix pitzw pax 'icha yaj yaln can 'ayex. Cotn̈ec nab'an, wul 'iltec yet'l 'aj xwul ya'ch eb'. 7'Ixquec, 'at alc mu'c 'a eb' scuywum, chajtlto xpitzw pax 'a scal eb' chamnac. 'Oj b'ab'l c'och 'ayx 'a Galilea, ata 'oj eyila'. Atn jun tzo'n̈ tic tzwul wal 'ayex, xchi jun ángel chi 'a eb' 'ix.

8Yajn̈j wal cha, xyactn can eb' 'ix jun q'uen cha, caw xiw eb' 'ix, palta caw xtzalj pax eb'. Yuj cha, carela x'at eb' yal 'a eb' scuywum Jesús. 9Ax yic wanto sb'ey eb', 'ix ch'oxn sb'a Jesús 'a eb', 'ix sc'anb'n sc'ojl eb'. Yuj cha, xwach' c'och eb' 'a stz'ey, 'ix ya'n 'ejm sb'a eb' 'a 'a, 'ix syamn eb' yoc. 10'Ix yaln 'a eb' 'ixtic:

—Man̈ ex xiwoc, 'ixquec 'at alc 'a eb' wu'tac yet' 'a eb' wanab', to tz'at eb' 'a Galilea, yujto atta 'oj in yil eb', xchi 'a eb' 'ix.

A tas yaljnac eb' soldado

11Yic wan s'at eb' 'ix cha, ax eb' soldado 'ayc' stan̈wc q'uen q'uen cha, x'at eb' 'a chon̈ab', 'ix c'och eb' 'a ewin sat ya'mal 'och sti eb' israel 'a Dios. C'uxn xyal eb' tas 'ix uji. 12Xlajw yab'n ewin jun tzo'n̈ cha, 'ix 'at sc'umnoc sb'a ewin yet' eb' 'ichmtac winc 'ay yopiso. 'Ix laj yalnc ewinac, to niwn tumn 'oj yac' ewin 'a eb' soldado cha. 13Yuj cha, xyaln ewin 'ixtc 'a eb' soldado cha:

—Yowlal tzeyal 'ixtic: Yic waync on̈ 'a 'ac'wl on̈, a eb' scuywum xit' 'inc 'elt sniwnal cha, xe chi. 14Toto tzyab' win gobernador speclal jun tic, man̈ e na', 'oj 'at qui b'oyaj yet' win on̈, xchi ewinac.

15Yuj cha, xchan eb' soldado chi jun tzo'n̈ tumn cha. 'Ix 'ec' yalnc 'el eb', 'icha yaj yaln ewin 'a eb'. Yuj cha, an̈ja ya'n ewin jun 'es chi 'a scal eb' israel cha.

Schecjnac 'at Jesús eb' scuywum

(Mr 16.14-18; Lc 24.36-49; Jn 20.19-23)

16Ax eb' scuywum Jesús yuxlchwan̈il, 'ix 'at eb' 'a Galilea, atta xc'och eb' 'a jun tzaln 'aj yaljnac can 'a eb'. 17Ata xyil eb' Jesús, 'ix ya'n 'ejm sb'a eb' 'a 'a, palta 'ay jaywn̈ xo eb' mant 'ix ya'ch wal 'a sc'ojol. 18Ax Jesús, 'ix wach' c'och 'a stz'ey eb' scuywum yuxlchwan̈il, 'ix yaln 'a eb' 'ixtic:

—In 'ajx 'och Yajlil 'a yib'n̈ smasnil tas 'a satcha'an̈ yet' 'a yolyib'n̈q'uinl tic. 19Yuj cha, 'ixquec cuywjoc 'a junjn chon̈ab', sec 'oj laj 'och eb' in cuywumoc. Tzlaj eyac' bautisar eb' 'a sb'i Dios Mamb'il, 'a sb'i Dios 'Unnab'il, an ton tic, yet' 'a sb'i Yespíritu Dios. 20Tz'ec' laj e cuy eb', sec wach' jantcn̈ej tas waljnac can 'ayex, 'oj laj syiclc eb'. An tic 'ayn 'ec' eyet' 'a smasnil tiempo, masnto 'oj lajwc 'ec' yolyib'n̈q'uinl tic, xchi Jesús 'a eb'. [B'o cab' 'ixta']

Currently Selected:

Mt 28: CSS

Highlight

Copy