Mt 2
2
A eb' mago xit' 'ilnc Jesús
1A 'a chon̈b' Belén 'a yol yic Judea, ata 'aljnac Jesús. A 'a jun tiempoal cha, a win Herodes 'aych sreyloc Judea cha. A yic 'ix 'alj Jesús, 'ix cot jun tzo'n̈ eb' winc tzcuch mago#Mt 2.1 A eb' mago tzalx tic, atn eb' tz'iln c'anal yuj yojcan 'el eb' tas tot 'oj ujc yaln eb'. 'a stojlal 'aj tzq'uel c'u, 'ix jaw eb' 'a Jerusalén. 2Sc'anb'n 'ec' eb' 'ixtic:
—¿'Aj 'ay jun win 'unn x'alji, win 'oj 'och sreyloc chon̈b' Israel? A 'aj tzq'uel c'u, ata xquil sq'uel jun sc'analil on̈. A tzch'oxni to 'ix 'alji. Yuj cha, on̈ cot quil on̈, yic tzwul ca'nc 'ejm qui b'a 'a on̈, xchi eb'.
3Ax yic 'ix yab'n win rey Herodes speclal jun cha, caw 'ix somchj chan̈ snab'en win yet' smasnil eb' 'aj Jerusalén. 4'Ix yawtn cot win smasnil eb' sat ya'mal 'och sti eb' israel 'a Dios, yet' eb' cuywjum 'a ley yic Moisés, 'ix sc'anb'n win 'ixtc 'a eb': ¿'Ajtil 'oj 'aljoc Cristo? xchi win 'a eb'.
5—A 'a chon̈b' Belén, 'a yol yic Judea, ata 'oj 'aljoc. Yujto 'ay jun schecb' Dios tz'ib'jnac can 'ixtic:
6A chon̈b' Belén tzcuch pax Efrata, wach'xam yunen̈ej chon̈b'al 'a scal jun tzo'n̈ xo chon̈b' 'ay 'a yol yic Judá, palta niwquil yel'ch 'a yib'n̈ jun tzo'n̈ cha, yujto ata 'oj pitzwc chan̈ jun yajal, a 'oj 'och yilmalc in chon̈b' Israel, xchi 'a Ch'an̈ U'un̈, xchi eb'.
7Xlajw cha, xya'n win Herodes 'awtxoc cot eb' mago chi 'a 'a. C'ultac sc'anb'j win yab'i', b'a'n̈i xch'ox sb'a jun c'anal chi 'a eb'. 8Xlajw yab'n winac, 'ix checn 'at win eb' 'a chon̈b' Belén. Yic mantzac 'at eb', xyaln win 'a eb' 'ixtic:
—'Ixquec 'a Belén cha. Cham wal e c'anb'n eyab' 'ajtil 'ay jun 'unn cha. Tzlajw schax eyu'uj, tz'ec' eyalnc 'ayin, sec 'oj 'at wac' 'ejm pax in b'a 'a jun xo, xchi cob' winac.
9Xlajw yab'n eb' jun tzo'n̈ cha, 'ix 'at eb'. Ax jun c'anal chi yiljnac eb' sq'uel 'a 'aj tzq'uel c'u, b'ab'l s'at yuj eb' masnto xc'och 'a stojlal yib'n̈ 'aj 'ay jun 'unn cha, ata x'och wa'an. 10A yic xyiln q'ue eb' jun c'anal cha, caw stzalj eb'. 11Yajn̈j wal cha, 'ix 'och eb' 'a yol jun n̈a cha, 'ix yiln eb' jun 'unn chi yet' snun, atn María. 'Ix 'em cumn eb' 'a jun 'unn cha, 'ix ya'n 'ejm sb'a eb' 'a 'a. Xlajw cha, 'ix sjacn eb' jun tzo'n̈ scaxa 'aj 'ay 'em jun tzo'n̈ siylab'. 'Ix siyn eb' oro 'a jun 'unn cha, 'ix siyn pax eb' jun tzo'n̈ te su'q'ui sjab' tzn̈usxi, atn incienso yet' te mirra. 12Palta 'ix alx 'a eb' 'a swayich, to man̈xtzac 'ec' yal eb' yab' win Herodes. Yuj cha, chuc junx b'e 'aj xpax eb', 'ix c'ochx eb' 'a schon̈ab'.
'Atnc eb' 'elc 'a Egipto
13Xlajw spax eb' mago cha, 'ay jun yángel Cajlil 'ix ch'ox sb'a 'a José 'a swayich, 'ix yaln 'a 'ixtic:
—Q'uen̈ wa'an, 'ij 'at win 'unn tic et'oc, yet' snun winac. 'Eln̈ec muc'uc, 'ixquec 'a Egipto. Cann̈ecn̈ej ta b'el, masnto an 'oj wal 'ayach, yujto 'oj yac' win Herodes sayxc 'ec' jun 'unn tic yic tzya'n milxoc, xchi jun ángel cha.
14Yuj cha, xq'ue wan José cha, xyi'n 'at jun 'unn chi yet' snun 'a 'ac'wal, 'ix 'at eb' 'a Egipto. 15Ata xcan eb' ta', masnto xcham win Herodes cha. 'Ixta x'aji, sec tz'el'ch tas yaljnac can Cajlil yic spaxtin 'a jun schecb' 'ixtic: A 'a Egipto 'oj wawtc cot wunnal, xchi.
Ya'jnac Herodes milxoc cham eb' 'unin
16Ax win Herodes cha, 'ix yilni to man̈x 'ic 'ec' eb' mago chi 'a winac. Ton̈j 'ix yixtj can paxti eb' winac. Yuj cha, caw xcot yowal, 'ix ya'n win milxc cham jantcn̈ej eb' cotc winc 'unn 'ay 'a chon̈b' Belén, yet' eb' 'ay 'a sla'nil jun chon̈b' cha. 'Ix cham eb' 'ayx schab'l ab'il, yet' eb' mantzac 'el 'a schab'l ab'il. Yujto 'ixta stiempoal ye'cn eb' mago chi 'a winac. 17'Ixta x'aj yel'ch tas tz'ib'b'il can yuj jun schecb' Dios Jeremías sb'i, yic yaln can 'ixtic:
18Caw tz'ab'x yoch 'aw 'a chon̈b' Ramá, 'ay mach caw wal ji'jmtac yoc' yuj yailal. A 'ix Raquel caw wal tz'oc' 'ix yuj eb' yune', man̈xtzac snib'j 'ix tz'ajx sniwnal sc'ojol, yujto man̈x 'a eb' yune 'ix 'ayq'ui, xchi can Jeremías.
19Ax yic xcham win Herodes cha, 'ix ch'oxn pax sb'a jun yángel Cajlil 'a José 'a swayich, yic 'ayc' 'a Egipto cha, 'ix yaln 'ixtc 'a 'a. 20Q'uen̈ wa'an, 'ij 'at jun 'unn tic yet' snun. Paxn̈ec 'a chon̈b' Israel jun 'ejm xo, yujto a eb' xnib'n milnc cham jun 'unn tic, chamnc xo eb', xchi jun ángel cha.
21Xlajw cha, 'ix q'ue wan José, 'ix yi'n cot jun 'unn chi yet' snun 'a chon̈b' Israel. 22Ax xyab'n José, chajtlto a jun yunnal Herodes Arquelao sb'i, a 'aych can pax yajlil sjelc smam 'a Judea cha. Yuj cha, xiw sc'och cajn ta'. Palta 'ix yaln Dios 'a waychil 'a winac tas tzyutj sb'a. Yuj cha, x'at eb' 'a yol yic Galilea. 23Yic xc'och eb' ta', 'ix can cajn eb' 'a chon̈b' Nazaret. 'Ixta x'aji, sec tz'el'ch tas yaljnac can eb' schecb' Dios 'a pecti'. Tz'ib'b'il can yuj eb', chajtlto 'oj yal eb' 'anma', to 'aj Nazaret Jesús.
Currently Selected:
Mt 2: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.