Mt 16

A eb' sc'anjnac yil junc milagro

(Mr 8.11-13; Lc 12.54-56)

1'Ay jun tzo'n̈ ewin fariseo yet' ewin saduceo xjaw 'a Jesús, yujto tznib'j ewin tzya'lj prowal. Yuj cha, sc'ann ewin yil junc milagro tzcot 'a Dios.

2Palta xyaln 'ixtc 'a ewinac:

Ax tic, 'ay 'aj tzeyal 'ixtc 'a junc yemc'ual: A q'uic'an man̈x 'oj yac' n̈ab', yujto tz'a 'asun, xe chi. 3'Ay 'aj tzeyal pax 'a junc sq'uin̈b'ial: A ticnec musan, caw q'uic' 'asun, 'oj yac' n̈ab', xe chi. Jeln ex ton eyiln jun tzo'n̈ 'asun, tzeyalni toto 'oj yac' n̈ab', mto ma'ay. 'Ay wal jun tzo'n̈ xo senya tzch'oxni, tas yaj jun tiempoal tic, palta 'in matz nachj 'el jun tzo'n̈ chi eyu'uj, yuj cha, caw chab'sat ex. 4A wal ax 'anmax 'a jun tiempoal tic, caw may e ch'olnil, man̈oc wal 'a Dios tzeya'ch e nab'en. Yuj cha, ton̈j tze c'an eyil junc milagro, junc tzch'oxn spoder Dios. Palta cojn jun milagro 'oj 'ajxoc eyila', atn jun 'icha sch'oxjnac Dios yet' win Jonás, xchi 'a eb'.

Xlajw cha, xyactn can eb', 'ix 'atxi.

A jun tzo'n̈ scuynb'il ewin fariseo

(Mr 8.14-21)

5'Ix 'at Jesús yet' eb' scuywum 'a junx sc'axpil a mar. Ax eb' scuywum cha, ma'ix sna eb' yi't tas tzc'uxu. 6'Ix yaln Jesús 'ixtc 'a eb':

—'Ab'ec, tzeyil wal e b'a. A wal yich span ewin fariseo yet' yich span pax ewin saduceo, caw 'ay smay tzex juw 'el yu'uj, xchi 'a eb'.

7Yuj cha, xlaj yal-lanc eb' 'ixtc yuj jun tzo'n̈ xyal cha:

—Tzyal 'ixta', yujto ma'ix quijec cot qui pan, xchi eb'.

8Ax Jesús, yojtac tas wan yaln eb', yuj cha, xyaln 'ixtc 'a eb':

—¿Tas yuj tzeyala to may e pan? Caw jab' wal tzeya'ch e c'ojl 'a Dios. 9¿Tom an̈ja matz nachj 'el eyu'uj? ¿Tom matz e na coti yic wa'n 'ec' o'e pan 'a o'e mil winac, jaye xuc b'ut'j can paxi, yic 'ec' e chanc can pax jantc ya'jnac sobra? 10Yet' 'a yic wa'n 'ec' uque pan 'a scal chan̈e mil winac, ¿tom matz e na coti, jaye xuc b'ut'j can paxi, yic 'ec' e chanc can pax jantc ya'jnac sobra? 11A yic xwaln 'ayx yuj yich span ewin fariseo yet' yich span ewin saduceo, ¿tas yuj ma'ix nachj 'el eyu'uj, tas tzyal 'el'chi? A e nani to a jun tzo'n̈ caw pan xwala, xchi 'a eb'.

12At yic xyaln Jesús jun tzo'n̈ chi 'a eb', atta xnachj 'el yuj eb', to man̈oc jun caw yich pan 'ay smay xyal 'a eb'. Palta atn jun tzo'n̈ scuynb'il ewin fariseo, yet' ewin saduceo tzyala.

Yaljnac Pedro to a Jesús atn Cristo

(Mr 8.27-30; Lc 9.18-21)

13A yic xc'och Jesús yet' eb' scuywum 'a Cesarea 'a yol yic Filipo, 'ix sc'anb'n 'a eb' 'ixtic:

—An 'Ochnc in 'Anmal tic, ¿machn yal eb' 'anma tzeyab'i? xchi 'a eb'.

14—'Ay eb' tzalni tolab' Juan Bautista ach. 'Ay pax eb' tzalni tolab' Elías ach. 'Ay pax eb' tzalni tolab' Jeremías ach, mto junc xo schecb' Dios 'e'nc 'a pecti', xchi eb' 'a 'a.

15—Ax xo, ¿machn tze na'a? xchi 'a eb'.

16Yuj cha, 'ix ta'w Pedro 'ixtc 'a 'a:

—Ach tic Cristo ach, Yunnal ach Dios pitzan, xchi 'a 'a.

17Yuj cha, xyaln Jesús 'a Pedro 'ixtic:

—Simón, ach yunnal Juan, caw wach' eco', yujto a jun 'ix al tic, may junc 'anma 'ix aln 'ayach. A qui Mam 'ayc' 'a satcha'an̈, a 'ix aln 'ayach. 18An tzwal 'ayach, ach ton Pedro ach. (A Pedro tzyal 'el'chi, q'ue'en.) A 'a yib'n̈ jun niwquil q'uen tic 'oj in b'o wiglesia. A jun wiglesia tic, toxn ma'oj lajwc yuj chamel. 19A 'aych 'oj wac' syaveal yic tz'och eb' 'anma 'a yol sc'ab' Dios 'aj satcha'an̈. Tzann̈j tas 'oj ala', to 'ay yowlal 'a yolyib'n̈q'uinl tic, 'ay pax yowlal 'a sat Dios. An̈jtona', tzann̈j tas 'oj ala', to may yowlal 'a yolyib'n̈q'uinl tic, may pax yowlal 'a sat Dios, xchi 'a 'a.

20Xlajw cha, xyaln 'ixtc 'a eb' scuywum cha:

—'Ayt 'aj xeyala to an tic Cristo in, xchi 'a eb'.

'Aycto yaln can Jesús yuj schamlil

(Mr 8.31—9.1; Lc 9.22-27)

21Ax 'a jun tiempoal cha, 'ix syamn 'och Jesús yaln 'a eb' scuywum, tas 'oj jawc 'a yib'an̈. 'Ix yaln 'ixtic:

—Yowlal 'oj in 'at 'a Jerusalén, atta 'oj 'ajxc 'och 'a wib'n̈ yuj eb' 'ichmtac winc 'ay yopiso, yet' eb' sat ya'mal 'och qui ti 'a Dios, yet' pax eb' cuywjum 'a ley yic Moisés. 'Oj in smil eb', palta ax 'a schab'jial, ax in pitzw paxi, xchi 'a eb'.

22Yuj cha, ax Pedro 'ix yi'n 'el'ch Jesús sch'ocoj, stenn 'och wa'an, 'ix yaln 'a 'ixtic:

—Mamin, caw man̈ 'ichcta snab'en Dios. A jun tzo'n̈ 'ix al tic, ma'oj jawc 'a eb'an̈, xchi Pedro chi 'a 'a.

23Palta x'och wal q'ueln Jesús 'a 'a, 'ix yaln 'ixtic:

—Ach Satanás 'eln̈ 'a in tz'ey, yujto tza nib'j tzac' juwc 'el in nab'en. Man̈oc jun tzo'n̈ tas yic Dios 'aj tza'ch a nab'en. An̈j jun tzo'n̈ yic 'anma 'aj 'aych a nab'en, xchi 'a 'a.

24Xlajw cha, xyaln pax 'ixtc 'a eb' scuywum:

—Toto 'ay mach tznib'j tz'och in cuywumoc, yowlal man̈x yico'oc sb'a sch'ocoj. Yab' cab' syail, toxn̈ej tz'ajx 'och 'a spenc culus. Toto 'ixta', 'och cab' in cuywumoc. 25Yujto a eb' ton̈j tznib'j colchjoc sb'a 'a yolyib'n̈q'uinl tic, 'oj satl sq'uinl eb' 'a jun 'ejmn̈ej. Palta ax eb' 'oj yac' cham sb'a wu'uj, atn eb' chi 'oj scha sq'uinl 'a jun 'ejmn̈ej. 26Q'uinloc tzquique'ej smasnil tas 'ay 'a yolyib'n̈q'uinl tic, palta toto tzsatcn 'el qui pixn 'a jun 'ejmn̈ej, ¿tast wal qui ganar 'ixta'? ¿Tast wal 'oj cac' smannb'ilc colchjoc qui pixan? 27Yujto an 'Ochnc in 'Anmal tic, a yet' spoder in Mam 'oj in jaw yet' eb' wángel. Ax wa'n spac 'a junjn 'anma', a tzyala tastc 'ix sb'o eb'. 28Wal yel tzwal 'ayex, 'ay jun tzo'n̈ ex 'a tic, mantzac ex chami, ax in jaw an 'Ochnc in 'Anmal tic, ax wa'n yajlil, xchi 'a eb'.

Currently Selected:

Mt 16: CSS

Highlight

Copy